環境四四正正，唔似西環店咁一字長形，但同樣樓底高，無侷促感，牆身掛有唔少意大利裝飾，米黃襯啡，木椅配雲石餐枱，一派意大利小餐館氣氛，寫意閒舒。而餐廳尾嘅半開放廚房，只隔着一道玻璃，可以清楚睇到師傅搓薄餅，做沙律，特別吸引人多望兩眼。

上次簡單啲，直接點幾款是日精選就算，不過，友人話餐牌中都有唔少好嘢。經大家商量後，一道薄餅必然唔少得，前菜、意粉各樣都揀番啲。

等上菜期間，先點啲飲品解吓渴。友人揀嘅無酒精特飲，晌上次嘅食文都有分享過，不用再敘；小弟今次則試吓Piccolo Gunner（$28），色澤金黃，清爽冰涼，甜甜哋嘅梳打水。

Fried Portobello $115

炸龍葵菇依道前菜，喺今晚大家一致認為最驚喜嘅菜式，賣相唔算好好睇，但入口真喺有份驚喜感。成隻手掌咁大嘅龍葵菇，以吉列方式脆炸，再淋上燒牛肉汁，咬落外層香脆十足，裡面嘅龍葵菇軟綿多汁，加上啲燒牛肉汁濃香惹味；而菇上仲放有雞肉同煙肉，不過，雞肉有啲嚡，單單只放煙肉碎已足夠。

Beetroot & Rocket $80

另一道前菜紅菜頭火箭菜沙律，無諗過啲火箭菜多成咁，其實啲紅菜頭好清甜，又有益；雖然啲火箭菜已加上茴香、油醋，但始終火箭菜味本苦澀，唔喺個個啱食。

Pizza Bacon & Honey $145

蜜糖煙肉薄餅喺是日嘅精選菜式，上次食文都提過，餐廳每日都會推出一啲精選菜式。以自家砌嘅磚爐烘焗，心理上都覺得唔同啲，薄餅以莫沙厘娜芝士（Mozzarella）墊底，鋪上幾片意大利煙肉（Pancetta），再塗上蜜糖，烘得金黃吸引。意大利煙肉較平時常食到嘅煙肉少肥，但不失油香，而蜜糖帶出嘅甜味，跟火腿嘅鹹，有種平衡感，好特別，不愧是日精選。

Aglio Olio $120

有時做菜，簡單先見真章，依道香烤蒜蓉意粉其實真喺覺得有點貴，百幾蚊一客，真喺「齋意粉」嚟，用料只有橄欖油同蒜蓉。意粉好有咬口，質感可謂一流，油潤得嚟卻無多餘嘅剩油，啖啖都充滿蒜香，但隱藏嘅辣勁卻唔講得少，入口真喺頗辣。

Lasagna $160

肉醬千層麵略嫌表面放得太多芝士，一來焗出嚟賣賣無咁好睇，二來感覺太厚太膩；其實，個千層麵本身做得不俗，肉醬充滿蕃茄香，酸香鮮活，千層麵柔韌適中。幾位友人都覺得麻麻，又喺小弟出奉包底嘅時候！

最後，都總喺要點客甜品先叫人滿足離開。然而，餐廳只有兩款甜品，較一般意大利餐廳少，儘管喺咁，都想試試。

Chef Cheryl’s Tiramisu $60
意大利芝士餅，以杯裝形式，睇樣平平無奇，食落質素真喺有番咁上下。芝士味輕嘅馬卡風芝士部份打得幼細軟滑，而手指餅沾滿咖啡酒，口感濕潤，味帶香濃。

Panna Cotta $60

意式奶凍做晌新地杯中，加點士多啤梨及藍莓點綴。奶凍挺身軟滑，充滿雲喱拿及奶香，奶凍內清晰睇到雲喱拿籽，可見用料不賴。

Piccolo嘅薄餅確喺有水準，不過，最驚喜喺一道大磨菇菜式「炸龍葵菇」，另外，意粉亦都做得上乘，所以，大家都食得好稱心，最開心莫過於三五知己吹吓水，嘆吓美食。

個人評分
味道：8/10
環境：7/10
服務：8/10
抵食：7/10
平均每人消費：HK$245

餐廳資料：
Piccolo Pizzeria & Bar
灣仔大王東街22號地下4-5號舖
2824 3002