|
圓山台灣料理 Grand Hill Taiwanese Restaurant：左右逢圓
|
|
山區麵包王
2015-04-09
1104
0
|
分享
收藏
成日都聽到朋友講話過台灣玩，仲要一年梗會過幾次，而小弟近十年嚟，都只喺去過寶島3次，第一次2007跟團齋去台北，超悶唔好玩；第二次2010自由行去台南高雄墾丁，雖然遇着打風，但玩得好開心；第三次2013自由行到台北跟宜蘭，喺一次寫意開心之旅。對台灣，印象唔錯，今晚嚟到圓山，唔知可唔可以重溫當日台旅之味？
圓山主打賣台菜，不過，都加入咗少少新元素：川菜，可謂左右逢源。食物分為涼菜類、台灣小菜、四川菜式、海上鮮、鮑參翅肚、湯羹、主食、甜品等，；亦另外加插一啲特別嘅廚師推介菜式，以及招牌海鮮推廣。茶水每位收$16，另加一服務貴，所以，喺屬中高檔消費嘅餐廳。
我哋5個人奉上兩小碟前菜，分別喺涼拌青瓜及魚仔花生，兩者均附上菜脯，前者爽脆帶濃濃蒜香，後者魚仔鹹香過過口癮。
據經理講鴨舌喺自家製，製作認真。咬落軟腍帶爽，質感具彈性，味道辣中帶麻，卻唔太過火，相當惹味。
如果喜歡台式小食，又夠人多，可以點個「台式四拼」，賣$238，可在指定9款涼菜中任拼4款，彈性大又划算。
鹽水鴨第一次接觸，顧名思義就知喺台灣彰化特產，除例牌，仲有半隻（$148）及全隻（$280），我哋人少少，例牌夠晒啦！
賣相普普通通，睇落好厚肉，入口鹹香，味道跟港式臘鴨勁似，但肉質鬆軟好多，而且，又唔會感覺好肥好膩，橫睇啲鴨件都喺瘦晒身，搵唔到絲亳肥膏。作為冷盤，再冰涼一點就更正嘞，推介一試嘅涼菜。
跟團嗰次去台北，算喺路過基隆，但對此地印象模糊。一窩花枝羹份量十分，大概可到7、8碗份量，而且，一撈起已見材料甚豐。
跟住介紹依道較重口味嘅喺豬大腸，大腸已去走大部份肥膏，而且，洗得頗乾淨，所以入口未算好肥，只有少許油膩感，但煮得好腍好軟化。
冰梅骨有啲糖醋骨嘅影子，以前都曾經食過，鍾意佢酸甜開胃嘅感覺。店家採用較大件嘅腩排，食落啖啖肉，炸過再上汁，外層有點焦脆；而個汁調得幾好，濃香酸甜，無話太嗆喉嘅弊病，比用醋所做出嘅酸味較天然。
餐廳有一系列嘅海鮮菜式，其中部份更會列入招牌海鮮名菜推廣優惠之中，所以，依道菜原價標為$298，依家就平一截就可以食到。
成條石班超晒骨，食用方便，炸後再加個炆涼瓜淋上面，魚肉挺嫩滑，沾上炆涼瓜嘅茨汁，帶些微微甘味。不過，個人都喺鍾意蒸魚，可嚐盡魚嘅鮮甜味！
尾聲，嚟一客新竹米粉作為主食打底，其實，主食有好多選擇，如常見嘅鹵肉飯、擔仔麵。新竹米粉喺個質感特別，幼細嘅米粉入口煙韌爽口，炒得嚟唔油膩，配以肉絲、甘筍絲、冬菇絲，簡單味美。
卒之去到甜品時間，經理嘅推介喺佢哋嘅秘製糖蕃薯，即撞豆腐花亦話都唔少人會點。
蕃薯色澤橙黃，淋上糖漿，睇見都覺得好甜蜜。入口好粉香，真喺蕃薯有蕃薯味，因為時下有時啲蕃薯真喺無乜味，而且，軟綿嘅蕃薯很有蜜香，熱呼呼嘅甜蜜感覺！
原來豆腐花喺以黃豆每日新鮮磨製，即點即撞，以木桶盛上，一桶大概可分到6-7碗，伴糖漿又得，伴黃糖都得，得咗！豆腐花入口滑溜無比，瀡一聲滑過喉嚨，不過，豆味略嫌失色，比較淡薄。
散叫或者覺得有啲貴，又好難預價錢，套餐喺咪划算啲又合你「筆直」呢？所以，餐廳有提供數款套餐，有平有貴。
台式套餐
龍蝦鮑魚套餐
除台菜嘅套餐，川菜套餐同樣有得揀，嗜辣者不妨挑戰吓。如果想左右逢源，又台菜，又川菜，咁就唯有散點番。
四川風味套餐
小弟雖然都喜歡台菜，但絕無食台菜嘅心得，只喺就着個人口味，覺得圓山都做唔錯。此外，服務都好稱心，添水換碟都非常到位。
個人評分
味道：8/10
環境：7/10 服務：8/10 抵食：8/10 平均每人消費：HK$220
餐廳資料：
圓山台灣料理 Grand Hill Taiwanese Restaurant
尖沙咀金巴利道25號長利商業大廈1及2樓 2721 9833
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | 圓山台灣料理 |