星期六嘅大清早，仲諗住好少人會嚟幫襯，因為好多人唔使返星期六，此外，附近又有快餐店及茶餐廳，但原來都幾多客，坐吓坐吓到我哋8:50am離開時，都有八乘幾滿。餐廳內嘅環境，又的確比快餐店好坐嘅，斯文客居多，所以，唔會好嘈吵。

早餐，一張餐牌睇晒，款式一雙手數得埋，合共只有7款。老婆想食得清新健康啲，所以，農夫比得包最啱佢，小弟就想試試牛角酥，所以，選上火腿香腸鮮茄湯通粉配熱脆牛角酥，所有早餐均配基本餐飲，如想升級飲得特別啲，如特色果茶、意式咖啡、鮮果汁……等等，可額外+$8轉飲。晌收銀處點好餐，再由店員送嚟，我頗鍾意依種銷售模式，尤其人多，唔使捧住個餐周圍搵位。

熱脆牛角包

面層都幾脆，包身鬆軟就仲算鬆軟，不過談不上一個「熱」字，入口喺室溫嘅攤涼狀態，最弊喺欠牛油香，怪唔之得奉上果醬外，仲有一小盒牛油啦！

火腿香腸鮮茄湯通粉

有唔少料喎，火腿同香腸落得真喺唔少，質素當然唔會話特別高，但香腸唔會好似啲廚師腸得個鹹字。至於個鮮蕃茄湯，唔算好濃，夾雜少少香草味，味道跟質感屬OK。

農夫比得包

雖然幾十蚊食個「蔬菜」素包，但最緊要啱食及好食，沙律菜非常新鮮，入口爽脆，仲加有車厘茄、青瓜、紫洋蔥，以油醋調味，豈止健康，食落好清新，讓人晌大清早有種醒神嘅開始。

咖啡、檸水

雖然無專登加錢轉其他意式咖啡，不過，眼前杯咖啡已夠好飲，醇香馥郁。

大多數嘅星期六，都會同老婆出街食早餐，所以，久唔久有「我的星期六美孚早餐」系列出現，今次，離開美孚，移師葵芳，亦享受到個唔錯嘅早餐。深夜食堂，每次都以一道菜式來講一個人與人之間嘅故事，我哋今次嘅早餐故事，或許就喺個農夫比得包！

個人評分
味道：7/10
環境：8/10
服務：8/10
抵食：7/10
平均每人消費：HK$34

餐廳資料：

euro go go
葵芳興芳路223號新都會廣場1樓168-171號舖
2428 1168