友人曾經嚟過，佢話以前裝修比較西化，有啲卡位，反而覺得依然嘅環境頗別致，幾得意，挺有古時客棧小店格局，全場都喺木枱及長板櫈。是夜，人客較疏落，所以，我哋都可以靜靜哋咁傾偈。

菜譜分頭盤、涼菜、特色菜、水煮、湯菜、辣子香鍋、湯羹、素菜、主食（飯麵）及甜品，部份菜色圖文並茂，辣定唔辣？有幾辣？可參考菜譜中嘅「辣椒」指數。

前後試咗三款涼菜，藍莓山藥曾在別家餐廳試過，又睇睇川熙樓做得如何？蒜泥白肉稱得上川菜嘅涼菜名物，反而椒麻鹽水蝦屬於首嚐，幾款涼菜都有唔同賣點。

藍莓山藥 $48

每片山藥沾滿藍莓汁，均被染成鮮藍，而山藥口感粉粉黏黏，味道則帶有藍莓鮮味，兼有少少薄荷味及些少甜味。事後，跟店主傾開，原來個藍莓汁有加入藍莓醬增加色感，而甜味嚟自蜂蜜。

蒜泥白肉 $78

賣相比較做得精緻，肥瘦相間嘅五花腩均勻，入口感覺唔肥，最鍾意喺師傅刻意將白肉捲住啲青瓜絲，除令賣相更立體之外，食落更添清爽，辣椒蒜泥亦令到白肉相當惹味，又帶少少麻香。

椒麻鹽水蝦 $78

外觀略帶咯嗲蝦風格，以高身玻璃杯盛載登場，再配點沙律菜做裝飾。晶瑩嘅蝦隻既大又爽，點點鹹味，並以花椒嘅麻較重，辣味則隱若少少，墊底嘅青瓜粒非常爽脆，咪錯過。

野菌燉雞湯 $238

又野菌，又燉湯，啱晒我啦，一大鍋野菌燉雞湯送到埋嚟，熱氣騰騰，香氣四溢。一大碟湯渣被你驗明正身，牛肝菌、姬松茸、老雞、赤肉 ……等等，燉足幾粒鐘，真喺唔醇香順喉就有鬼咯，可惜一鍋得5-6碗，想飲多啲都難。

自貢跳水娃 $188

餐牌中有一類叫特色菜，田雞（牛娃）實在好耐無食過，嚟一客自貢跳水娃，就睇睇有幾特色。望落去時，咪睇佢又辣椒，又青椒， 唔喺好辣咋喎，而田雞啲肉質十分之嫩滑，越食越滋味。

紅湯羊肉 $238

屬水煮、湯菜類，一大湯紅噹噹紅油咁款，未食都有種火辣辣嘅感覺。未知喺咪個辣湯，羊肉食落唔太羶，質感則頗軟腍，但就越食越辣，果然火辣辣，內裡仲有唔少大蔥同大豆芽，不過沾滿辣湯，食友就話投降，小弟就繼續挑戰。

香麻爬爬蝦（時價）

辣子香鍋類揀嚟爬爬蝦，想知喺乜傢伙，原來喺琵琶蝦，哈哈。依道菜以時價計，今晚就賣$50隻，叫多少隨意，亦唔見店員講話幾多隻起計。香麻爬爬蝦以大木盆盛載，顧名思義，主打喺喺香與麻，所以，盆面堆滿大量配菜：大蔥、紫洋蔥、唐芹、鮮胡椒、蓮藕條，誘發不同香氣；而琵琶蝦則藏晒晌底，雖然肉唔算多，但惹味到不得了。

杞子浸萵筍 $108

有句諺語叫萬綠叢中一點紅，依道萵筍嘅出場正正相反，喺是晚嘅萬紅叢中一點綠，更似一道清泉咁登場，因為碧綠嘅萵筍，有種淡然清新嘅嬌態。的而且確，萵筍入口爽脆清新，浸晌高湯中，伴以一啲菇菌、杞子，簡單天然。

臨尾環節，少不了甜品，單睇啲名稱，幾款甜品都已覺得蠻特別，不過，店長推介豆奶桃脂，一來因為坊間少見，二來桃脂依家嘢未必次次有貨，真喺可遇不可求，咁究竟桃脂乜？原來喺鎅開桃樹後所分泌嘅汁液凝結所致，琥珀色半透明，質感膠膠哋又好似啫喱咁！

豆奶桃脂 $38

以桃脂浸在豆漿中所做成嘅一道甜品，個人覺得豆漿稍淡，豆味亦唔夠濃，至於啲桃脂，其實無乜味，食落似雪耳嘅口感，但據介紹就營養豐富。

晌度食到嘅川菜，唔會只喺大麻大辣，稍為討我歡心嘅喺花椒都無放得太重，因為跑咗重慶山區十幾年，對花椒嘅麻，真喺食到「慣」，但就喺摜低個「摜」，而且，山區啲菜館下油超勁，就算唔喺地溝油，都食到你驚。

個人評分
味道：7/10
環境：8/10
服務：8/10
抵食：7/10
平均每人消費：HK$310

餐廳資料：
川熙樓 Chuan Xi Restaurant
尖沙咀亞士厘道17-19號2樓
2882 9020