第一次到石湖墟熟食中心，一如好多市政嘅熟食中心，美食廣場格局，但估唔閒日晚依然咁旺場，人聲鼎沸，正式嘈喧巴閉，咁先喺本土嘅地踎風情。

日頭喺興記麵家，晚上遙身一變，成為三和火鍋雞煲。

餐牌唔多描述嘞，一張點菜紙（湯底、佐酒小食、海鮮、丸類、肉類、蔬菜、什項、粥品、飲品、啤酒）乜都睇晒。總之，今晚打正旗號嚟食雞煲，所以，火鍋料就變得其次，一起身就整兩款雞煲先，火鍋料就隨意點少少。

酸辣青瓜雲耳 $20

雞煲製作需要，先食住個酸辣青瓜雲耳間一間場，青瓜、雲耳同樣爽脆，尤其後者更喺有益健康之美食，灑上好多蒜蓉，酸辣開胃之餘，又有陣陣蒜香。

胡椒豬肚包雞 $238（全隻）

「煲」底有多款選擇，如胡椒蟹煲、澳門豬骨煲、椰子花蟹雞煲、滋補藥材花雕醉雞煲……等等，先試個胡椒豬肚包雞。話就話喺「包」雞，查實只喺全雞之上放上豬肚，未有做到真正包雞，因為外間好多店子都真喺做到成個豬肚包住整隻雞，雖然外觀上未有做到「原貌」，但味道不俗，湯底帶有濃濃胡椒香，豬肚爽口無臊味，雞肉入口又幾嫩滑，而且，份量實在唔講得少，所以，清晒啲雞煲料都唔需要點太多火鍋配料。

重慶麻辣雞煲 $208（全隻） / $138（半隻）

雞煲依家賣到成行成市，各家有各家嘅配方，因為個胡椒豬肚包雞只有全隻選擇，所以，個重慶麻辣雞煲就要半隻嘅份量。一打開煲蓋，一陣陣嘅麻辣香氣隨即四竄，香氣四溢，雞肉既腍滑，又入味，雖然只要小辣，一樣惹味。

手切肥牛 $188

本地肥牛，油花唔算好多，但勝在肉味濃，輕灼入口，腍滑好食。不過，諗住入到嚟上水，成本應該相對低啲，但賣$188嘅肥牛都唔喺好多。

鹽燒芝士丸 $38

芝士丸一向大有市場，依一款加入「 鹽燒 」元素，又會喺點？其實鹽燒個效果唔喺好突出，但溶透幼滑嘅芝士，令粒丸嘅美味度差極有個譜。

響鈴 $28、山根 $15

漸漸響鈴已成為打鞭爐例點嘅必然之物，其實好吊詭，究竟想入口喺脆，定喺索滿汁呢？所以，小弟反而鍾意食山根，索滿汁，腍腍滑滑咁，咬落又煙煙韌韌，有趣！

菜肉餃 $28、香菇貢丸 $28 

以餃類嚟打鞭爐小弟一向覺得麻麻，溝雜晒個味道之餘，好多時都煮爛咗；然而，啲香菇貢丸唔錯，內裡嘅香菇醬幾濃香。

脆鯇片 $38

睇起嚟頗為新鮮，輕灼一會就可以，放入口非常鮮甜，帶微微嘅脆口感。

鮮枝竹 $20 

兩個雞煲，讓大家食咗唔少肉，臨尾階段，喺時候補充番多少少纖維質，鮮枝竹貪佢有豆香及有嚼頭。

竹笙 $28 

朋友嘅至愛，竹笙打鞭爐又真喺幾好，一來佢本身有益健康，二來淥幾耐都唔怕，唔縮又唔會爛，口感實喺爽嘅，吸收湯汁，豈會唔好味。

唐生菜 $18 

蔬菜嘅嘢，都喺隨心點，用得嚟打鞭爐都唔喺食其菜鮮味，所以，食也菜由他人發辦可以喇。

加多寶 $10、各式汽水 $10

整體而言，雞煲甚有水準，份量又夠十足，定價合理，然而火鍋料嘅款式及質素雖則不俗，但算唔上好突出。另外，始終地點對好多九龍人及港島人會嫌遠有啲偏，較難得區外客撐場，不過，以其質素相信可吸納唔少粉嶺及上水區嘅客人。

個人評分
味道：7/10
環境：6/10
服務：7/10
抵食：8/10
平均每人消費：HK$150

餐廳資料：
三和火鍋雞煲
上水石湖墟新街市二樓CF23號鋪
9251 3637