|
叙苑粉麵茶餐廳：歡敘一堂
|
|
山區麵包王
2015-06-20
1219
0
|
分享
收藏
每年都會同屋企人上嚟慈雲山一趟，事緣要到鑽石山墳場掃墓，依家同屋企人分開住，唔喺過時過節，就喺依類死忌掃墓嘅日子，先至彼此聚一聚，食吓飯，傾吓偈。過往幾年，不約而同到喺嚟敘苑粉麵茶餐廳食晏，唔喺貪佢有咩好，只喺由墳場行番出巴士站第一間茶記就見到喺佢啫。
除碟頭飯，粉麵亦喺好多茶記必備嘅種類之一，細妹要咗一碗牛筋河，牛筋、河粉兩者嘅份量都唔少，據佢講，牛筋十分軟腍，但香味唔夠。此外，叫碟頭粉麵飯，加$8可配熱飲，加$10可配凍飲，就算點湯粉麵，一樣有咁嘅優惠。
每日超值快餐就啱我多啲，抵吖嘛，$39大大碟碟頭飯加嘢飲。個超值快餐日日唔同款，每日有6款選擇，送例湯或餐茶，凍飲加$2，轉紅豆冰加$3。
依個喺細佬嘅選擇，果然夠抵食，大大件牛扒，不過，牛扒唔喺煎，喺炸完再淋上黑椒汁，塊火腿亦無點煎過，我細佬對食無咩要求，所以，佢話OK其實都作唔到參考。
記得第一次幫襯食佢個咖喱牛腩飯，啲咖喱牛腩有青椒、紅椒、洋蔥，做到好似生炒咁，之後再食佢嘅咖喱滑雞飯，好味又份量足；不過，今次再翻兜咖喱類，雖然做法無咩點變，價錢比以往亦唔喺貴好多，但牛肉少得可憐，大部分都喺配菜，咖喱汁底則仲算OK！
餐飲方面，細佬妹就要凍奶茶少甜、凍檸茶，而小弟要杯凍啡，若非天氣熱到爆外面成三十幾度，晌茶記就一定飲熱奶茶。我杯咖啡麻麻哋，啲冰溶曬都仲唔夠凍，而且，啲咖啡味道帶酸澀。
雖然整體嘅味道仲過得去，但比起以往，感覺上喺退步咗。下年，應該會轉食另一間吧！
個人評分
味道：6/10 環境：6/10 服務：6/10 抵食：7/10 平均每人消費：HK$40
餐廳資料：
叙苑粉麵茶餐廳 慈雲山毓華街72號萬年戲院大廈地下 2322 3286
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | 叙苑粉麵茶餐廳 (慈雲山店) |