抱歉,發生點錯誤。
重新載入
前門飯莊 The Door Northern Chinese Dining:裹足不前
山區麵包王
2015-06-14
1323
0
分享
收藏
最近舅仔搬咗,連帶佢太太有身孕,唔適宜走得太遠,地點就一於佢哋話事。原先揀咗青衣城嘅I- thai,原來執咗,結果改去前門飯莊食晚飯賀姨仔、舅仔牛一,一餐生日飯請晒佢兩個,就最益我俾少次錢。
以前曾同小組組員嚟過,不過已經都成年前嘅事,但環境無咩大變,紅襯白,一室古雅柔和,所以唔陌生。
前門飯莊主打滬菜,亦夾雜少少京川菜,冷盤、前菜、熱葷、點心、粉麵、甜品,款式超過70、80,部份圖文並茂當參考,今餐大部份菜式由舅仔發辦,因為佢口刁有要求嘛,哈哈,等佢揀唔使大家煩。茶錢無變,都喺收$7位,另收加一,之外就無其他雜費。
bowl五香烤魚 $58
上海菜中有一道「燻魚」,煙燻香濃,幾鍾意嘅冷盤之一;晌前門飯莊就無燻魚,不過,就有一道近似嘅「五香烤魚」,魚件以五香粉醃透再炸,好入味,肉質實淨得嚟又帶點鬆化。
bowl花素蔥餅 $37
一客3件嘅花素葱餅,類似啲蒸銀絲卷,口感鬆軟唔黏牙,裡面捲住啲蔥粒同蛋皮,素得嚟唔會太寡。
bowl京式蔥油餅 $37
有別滬式大大件嘅蔥油餅,京式個皮較為酥脆,因為並非煎,而喺炸,內裡包住好多蔥絲,好濃香嘅蔥味。
bowl灌湯小籠包 $50
一客5件,唔使爭,一人一粒。薄身嘅外皮包住濃鮮嘅湯汁,不愧為「灌湯」,豬肉餡挺鬆化,唔多帶肥肉,啱我屋企人,不過,摺位反映手工摺得麻麻,唔平均,唔細緻。
bowl北京鮮肉水餃 $47
啲鮮肉水餃送到嚟,粒粒反轉晒,真喺一烚完就放上碟,不加修飾,但勝在粒粒都包得飽滿。可能喺新鮮包,入口餃皮唔會死死實實,有份柔韌性,豬肉餡亦都鬆軟。
bowl砂鍋雲吞雞湯 $108(半隻)/ $210(全隻)
由於一枱都食物,所以,喺外邊分好先送過嚟,我哋5個人點半隻已好足夠,因為已經分到6份。個雞湯底好清甜,雲吞、雞件亦都好食。
bowl黑醋生炒排骨 $95
成晚最肉醱喺碟黑醋生炒排骨,因為份量上佢又唔喺多喎,但隻碟就非常之大,又無咩伴吓碟咁,賣相俾人感覺有點點寒酸啫。然而,啲生炒排骨加入黑醋炒,酸甜醇香,頗醒胃。
bowl竹笙荷花上素 $78
以竹笙、雪耳、珍珠筍、木耳、銀杏、蓮藕、車厘茄、甘筍……等等作為清炒,喺多元化嘅素菜,好健康嘅菜式,亦喺可以嚐到各類食材嘅原味。
甜品時間,由於家人對甜品嘅興致唔大,只喺舅仔話好想食高力豆沙,而小弟上次食過佢嘅棗泥拉糕,想推介吓,先至點咗依兩款甜點。
bowl高力豆沙 $55
外層嘅蛋白包身做得好鬆軟,綿柔有彈力,內裡墳滿晒清甜豆沙,入口又夠熱辣,真喺滋味;不過,好搞嘢啲糖霜另外分碟上,估計喺怕有啲人想食甜啲先點,其實,我覺得啲糖霜只喺灑少少薄薄晌面,等啲高力豆沙靚仔啲,分碟上嘥料又多餘。
bowl棗泥拉糕 $39
拉糕喺一種甚富上海特色嘅甜點,不過,今次嘅棗泥拉糕真喺走晒樣,好似放入微波爐翻叮咁嘅樣。幸而,味道都仲算唔錯,好濃嘅紅棗香味,拉糕煙煙韌韌,面頭又沾滿瓜子仁,富口感。
今晚我哋都叫幾多冷盤同點心,主菜就稍為少啲,菜式嘅味道都仲叫可以,不過,賣相顯然做得「求其」咗,好似花素蔥餅,跟餐牌嘅相比較,絕對喺做得隨意,鮮肉水餃、黑醋生炒排骨嘅擺盤就更加唔在講,整體感覺就喺有啲裹足不前。

個人評分
味道:6/10
環境:8/10
服務:7/10
抵食:7/10
平均每人消費:HK$140

餐廳資料:
前門飯莊 The Door Northern Chinese Dining
青衣青敬路33號青衣城3樓322B號舖
2186 7733


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 前門飯莊 The Door Northern Chinese Dining