抱歉,發生點錯誤。
重新載入
炑八韓烤 MeokBang Korean BBQ & BAR:耳炑一新
山區麵包王
2015-06-23
1303
0
分享
收藏
晌「開飯喇」查一查,韓式餐廳接近400間,當中主打做韓燒有近1/3,無正式統計過,只喺從朋友、雜誌所聽聞,粗略估計,每個月大概有2-3間韓式餐廳新開業。近日,就同朋友嚟到九龍城嘅「炑八」嘆韓烤,喺近排擴展得幾快嘅韓烤餐廳。
雖然小弟有睇吓韓劇,但對韓文一竅不通。餐牌內頁有一段文字介紹「炑八」,頗引起小弟傻笑,「炑八」(먹방)嘅韓文發音為「meokbang」,意思睇番張餐牌內頁就知,識小弟嘅朋友都知我一向撐廣東話(寫文更盡量唔會又中又英),如果以廣東話讀番嗰兩個韓文字,同「茂炳」個音幾相近,所以,今晚難得兩位朋友陪小弟依個「茂炳」嚟食韓燒,真喺賞心悅「炑」。
餐廳地方頗大,枱與枱之間都幾有距離感,感覺闊落,有4人圓枱,有4人卡位,亦有可組合成嘅大長枱,人多人少嚟都可以坐埋一齊。而抽油煙喺採用上抽式,效果還算不俗,至少食完都唔會覺得一頭「煙」。因為是晚閒日,客人唔多,所以,揀坐卡位,有得挨,自在好多。
bowl蘿蔔、泡菜、大豆芽、木耳(免費)
食韓國嘢,其一大特色就喺前菜,就算未點餐都一定會送上多款前菜,「炑八」都唔例外,先上嘅4款前菜,包括:大豆芽、木耳、蘿蔔片及韓式泡菜,幾款前菜都各有個性,做得唔錯,而蘿蔔片最得小弟歡心,因為以酸醋醃漬,清爽酸香,除淨食,更用嚟夾烤肉,平衡一下油膩最好不過。更開心嘅喺,所有前菜都歡迎無限添加,實在大方。
bowl胡麻醬沙律(免費)
除有免費前菜,仲有一大碗胡麻醬沙律,確實慷慨。以清新翠綠嘅沙律菜配車厘茄,淋上胡麻醬,將胡麻醬跟沙律菜撈勻,啖啖沙律菜都有芝麻香味,簡單味美嘅餐前開胃菜。
揭開餐牌,所有烤肉已經分門別類,由豬肉、雞肉、牛肉、海鮮、到菇類,有圖有相有價錢,清晰不過。
此外,其他如鍋類、煎餅、湯類、飯類、麵類、甜品、飲品及酒水類,亦一應俱全,羅列晒出嚟,其中印有「黃色廚房帽」喺店方推介,不妨多加考慮。
為顧及有啲客人唔想傷腦筋,又想一次過試多啲嘢,幾款套餐就喺懶人嘅上算提案,套餐亦好有彈性,分為2人($468)、2-3人($688)、4人($868)及8人($1680)。此外,見佢仲新推出咗兩款2人份嘅頂級套餐($520 / $590)。
bowl邊爐蛋 / 粟米芝士
晌食前菜、沙律期間,店員已為我哋預備好邊爐烤泡菜蛋及粟米芝士,睇見都好吸引,邊爐蛋以前都食過,但粟米芝士就第一次,雖然粟米搭芝士唔喺咩新奇事,但邊爐烤,都有種耳目一新嘅感覺。前者,烤蛋啱啱好,蛋身軟綿綿,底部有微微焦脆,蛋香中有啲泡菜辛辣,過癮過癮;後者,待芝士溶得七七八八就可以食,莫沙里拉芝士拉出一絲絲「芝」味誘惑,好玩好食。
喺時候講番啲烤肉嘞,我哋點咗兩款肉及兩款海鮮,好快所有嘢一次過送晒上嚟,霎時間成枱都喺,實在墟撼。食韓燒,其實仲有「兩寶」要出動,其一喺包住啲肉嚟食嘅生菜,其二就喺醬料(海鹽及辣豆瓣醬),不過,成晚我都無乜點用啲醬料,多數夾吓生菜、蒜片同酸蘿蔔片嚟食。題外話,啲生菜好新鮮,入口非常爽脆。
bowl特製護心豬肉 $128 / 200g
之前都食過護心肉,不過就喺牛肉嚟,所以,見有護心豬肉,亳無疑問要試吓,基本上有原味、蒜味、辣味,我哋揀辣味貪其更惹味。咪以為200g好少,其實一碟份量都幾夠,足夠3-4人食。
啲護心豬肉都幾大件頭,醃得頗為入味,雖然喺辣味,未喺想像中咁辣。因為喺豬肉關係,唔敢燒得太生,所以,熟啲燶啲,有啲焦香位,肉質軟腍唔韌,口感豐厚。
bowl牛肉雜錦拼盤 $458
雜錦拼盤實在讓人心動,一大份包括牛肋骨、牛肉眼、上肩胛肉、牛舌及牛胸肉,排列井然,最緊要喺睇落去新鮮紅潤有光澤,唔會喺瘀黑黑嘅劣貨。全部都以原味狀態示人,食嘅就喺基本肉味同質感。
牛肋骨
將一整條牛肋骨拉開,真喺超過成呎長,我哋都剪開3截嚟燒。牛肋骨油花唔會好多,但肉香絕對一流,而且,切得較厚身,極有咬口,小弟就較為喜歡淨食,集中品嚐佢嘅肉味。
牛肉眼
一致認為喺成碟牛肉雜錦拼盤最搶鏡嘅肉,因為,厚厚一大塊牛肉眼,估計都有成16安士重,放晌烤爐上,都被佢佔晒成塊鐵板。烤熟後為咗方便食,剪成一條條,入口啖啖肉,同樣頗有肉味,又黐住啲肥膏,入口甘香。
上肩胛肉
上肩押肉本身已經喺一條條,油花多而平均分佈,燒好後原來入口都唔喺好油膩,口感鬆軟,小弟就鍾意配酸蘿蔔片食,感覺更能故出油香。
牛舌
牛舌我就喜歡食厚切,因為夠有咬口,薄切就變得另一番風味。由於牛舌真喺切得好薄,所以唔使燒太耐,轉深色就已經可以。牛舌配酸蘿蔔片或包生菜食都無問題,食落仍帶有牛舌獨有嘅「羶味」,口感又帶少許韌勁,唔客氣都食多幾片。
牛胸肉
有啲似煙肉嘅樣,脂肪亦比較多,一路燒就一路逼出唔少油份,所以,不得不夾住生菜食。因為薄身緣故,肉味唔會話好強,油脂又比較多,但肉質軟腍。
bowl生蠔 $88 / 6隻
唔知喺餐牌幅圖搞錯,定喺啲字打錯,總之,送到上枱嘅生蠔就喺跟幅圖一樣有8隻。燒生蠔都喺第一次,之前燒過嘅喺連殼,較易處理,今次則有啲難,因為易黐底,最好留番少少牛肉眼啲肥膏當「起鑊」用,烤蠔就無咁易黐。蠔味算喺不俗,亦挺鮮甜,算抵食。
bowl鮮帶子 $168 / 8隻
另一款海鮮就揀咗鮮帶子,又喺唔連殼,烤帶子記緊留番少少肉眼或牛胸肉啲肥膏,咁煎出嚟嘅帶子就更金黃香口,而帶子嘅質感十分爽口,滋味滿足。
bowl泡菜牛肉熔岩炒飯 $128
雖然唔喺店家嘅廚師推介,但睇唔少人嘅食評都推介食道菜,單喺個即場製作過程已非常吸引。橙紅色嘅泡菜牛肉炒飯放晌鐵板上,熱辣辣嘅鐵板,放入大量莫沙里拉芝士碎,再倒蛋漿,快手快腳拌勻即成,嘩!每口飯既有點點泡菜辛辣,又有芝士嘅濃香,飯粒圓潤煙糯,的確值得一試,不過,牛肉粒得好少,少到都唔覺有食到。
bowl菠蘿梳打 $32
飲韓烤點可以唔飲住啲冰凍嘢飲點得,除餐廳提供嘅冰水,梳打好啱小弟,梳打有3款口味:菠蘿、士多啤梨、柚子檸檬,哈哈,小弟較鍾情菠蘿多啲啫。其實喺梳打水加入菠蘿糖漿同罐頭菠蘿粒嘅成品,唔會抱有期望,只求一刻涼快就已足夠。
bowl炑八豆粉紅豆冰沫 $48
食咗咁多烤肉,除飲住凍飲,最直接又即時嘅降溫大法當然來一害韓冰啦,店家有提供多款韓式冰沫:豆粉紅豆、Oreo朱古力、士多啤梨、宇治金時、純.Oreo共5款。我哋簡簡單單揀咗最基本嘅豆粉紅豆冰沫,堆到成座山一大碗嘅冰沫灑滿黃豆粉,又加入大量紅豆蓉、杏仁片及麻糬,冰沫刨得非常幼細,紅豆又清甜,麻糬煙韌有嚼勁,配合埋脆脆嘅杏仁片,為今餐劃上滿足又稱心嘅句號。
綜觀今晚所試嘅食物,對其質素不容置疑,不過,唔知喺咪新店,加上好多店員都好後生,服務比較生手,有時仲有啲手足無措,希望啲後生仔努力啲,可以盡快上手,他日變得刮「炑」相看。

個人評分
味道:8/10
環境:8/10
服務:7/10
抵食:8/10
平均每人消費:HK$300

餐廳資料:
炑八韓烤 MeokBang Korean BBQ & BAR
九龍城太子道西408-410號1樓
2716 0120


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 炑八韓烤 (九龍城店)