|
[親子旅遊] 錦田 石崗軍營 Shek Kong Barracks
|
|
kimfamilytravel
2015-07-01
2057
0
|
分享
收藏
| 傳說要凌晨三點去排隊先拎到飛既石崗軍營開放日 今日可以嚟大開眼界!! 有軍人睇, 直昇機睇, 坦克車睇.....仲有..... 
好多謝朋友仔既幫助, 可以拎到入場券! 今日早上已經到樹屋田莊玩完 基本上得番半條人命 之後再搭的士由林村去到石崗軍營 個太陽又曬到離哂譜 所以真係好攰! 
開放日3:00開始, 我哋坐的士大概3:10就到門口
我哋在門口前少少位置落車
因為門口位置已經有好多車塞住!
我拎住入場券準備定入場
好多解放軍人在場, 入場程序好嚴緊, 氣氛好嚴肅
不過軍人們都好有禮貌,
如果多番D笑容會好D!
行咗一陣都仲未需要搣飛!
影吓周圍先
呢度似係軍人營舍!
嘩行到呢度離入口5分鐘路程
有個檢察站喎
好似上機咁要SCAN過哂你帶嚟既嘢
開埋我個書包睇添!
經過檢察站繼續行, 見到個軍人,
佢肯同人影相架,
於是叫Hysan同佢影番張相,
之後都見唔到其他靚仔軍人喇, 哈哈!
再行行吓見到整個開放日時間表!
我哋睇唔到升旗儀式喇
不過仲睇到軍樂隊表演
行咗好耐都未見到有表演
跟住無端端殺出幾架軍車,
仲有d軍人行落嚟,
好似想拉人咁...
原來行到嚟呢度先至俾飛
飛係用嚟換呢d一袋袋既禮品
咁咪即係其實如果我唔要袋嘢, 就可以唔駛飛都入得?
我仲以為個禮物袋一定係紅色添!
沿路都有好多軍人係俾遊客合照
因為除咗第一個之外我都見唔到再靚仔D,
所以我冇叫Hysan同佢哋影喇...哈哈哈
相信呢個遙遠望過去的小建築物,
係俾軍人練習爬牆同打野戰的
揸住兩支旗影番張相先
行到嚟呢個大草地度, 見到咁多人,
佢哋喺度做咩呢?
我諗係天氣太熱大家都頂唔住要喺度抖一抖
仲有部份人知道一陣表演完咗呢度有活動玩,
所以排定隊
其實偉大祖國都有D嘢值得我哋學習既
紀律, 信念, 意志等...其他嘢就唔好學喇!
行咗咁耐終於行到嚟表演場地啦
因為人實在太多, 而且今日太多嘢拎冇帶長鏡,
所以只能影到咁遠
剛剛進行既軍樂表演
佢哋步操真係好齊整!
到下一個表演之前我哋見到有架軍車,
人人都坐埋去, 等我都同Hysan坐上去影張相先
下個表演又嚟啦,
嘩刺殺操表演,
起初聽到呢個名我有D驚
唔知會唔會好似殺破狼咁對打!
驚唔啱俾小朋友睇
好在點知原來只不過好似耍太極咁,
不過會唔會遠咗D呢...
之後到獵人戰鬥表演啦
氣氛好似好緊張咁,
見到有D軍人木咁樣企咗喺度
跟住喺我左手面突然殺出好多架軍電單車!
好型仔呀! 然後從四方八面唔知邊度殺出好多軍人嚟!
成班軍人一齊抬起碌木!
最後一齊舉起就收工(下巴都跌咗落嚟)
然後玩火啦! 軍人將個鐵架同鐵圈點上火
眼前既我都聞到好大陣燶味
軍人跳過火圈(影唔切), 跟住一路向前衝
然後有個軍人抬住個箱走,
其實都唔知咩嚟, 如果個廣播一路旁述緊係咩事會好D
睇完軍演我哋坐埋一邊休息吓先
睇吓戰利品係D咩....總共有4包!
有好多零食其中有「黑白配, 男仔女仔配」, 原來都幾好食
抖咗陣跟住同Hysan出去其他地方行吓
個傻仔話一D都唔熱!
見到咁大架直昇機好興奮呀!
差唔多放咗3-4架喺度,
再行前少少, 有架超大超巨型既直昇機呀
Hysan一路要影好多張跳起的動作
各位可以試吓咁樣同小朋友影相架,
順便大家可以睇吓我對親子攝影的少少心得!
http://kimfamilytravel.blogspot.hk/2015/07/blog-post_7.html
跟住我哋好大膽咁誇過去頭先軍人演習既大草地度
Hysan好開心享受咁瞓咗喺個大草地度
大人就唔會咁做, 因為實在太熱! 這就是天真幸福
原來頭先演習既磚牆都係木板做的
好奇的Hysan要走進去睇吓仲有咩
仲有少量軍人在演習場地中
在演習場地影番去直昇機展區,
你睇吓幾咁多人!
Hysan爬唔過呢個障礙物!
好攪笑...
跟住再嚟多張跳躍相!
同完直昇機影之後, 就同坦克車影啦!
嘩! 真係好大架同好靚呀...
可唔可以買架差唔多的上街行
曬完一輪, 又返番去頭先個地方休息吓飲吓水
今次架車冇哂人, 可以影過夠本
仲坐埋上去架車度添!
個軚盤喺Hysan隔離真係顯得好大
行番出去有好多個唔同既攤位
有好多唔同款既槍可以俾人影相!
Hysan攞番個靚POSE先
後面個大叔好似等得唔耐煩!
咁又係, 又熱又辛苦....
呢度好攪笑, 係派軍人平時食開既食物,
都係D饅頭麵包等等
原來呢度有個禮堂仔,
如果唔舒服可以入嚟俾軍醫睇吓,
最重要係呢度有冷氣,
原來大家都走入嚟呢度抖暑!
行番出嚟都仲係咁多人,
番去睇吓芊芊瞓醒未先!
兩兄妹係草地度玩得好開心
最後我哋沿路行番出去,
仲記唔記得一開始我話過有個地方好多人坐咗喺度
原來佢哋知道呢度有個射擊遊戲
其實出番嚟先排都得, 因為都水尾冇咩人玩
之後再繼續行! 我哋八八卦卦又見到有嘢睇, 所以又走咗入去
呢度其實係軍營宿舍,
有個內園, 同埋電腦室, 康樂室等等...
內園仲有4個大石頭,
上面都刻咗D紅字
我諗係作為一個軍人, 必須要有既嘢
呵呵, 原來軍人一樣需要有超巿, 餐廳同ATM機!
最後我哋就離開軍營喇,
一出去就已經有接駁巴士可以番元朗!
Photo by CANON 5D Mark III, Len | EF 24-70mm f/2.8L II USM
呀劍評分: 7分
呀劍評語: 以前Hysan細個嗰陣成日都話如果佢唔乖就帶佢去軍營軍訓, 今日帶佢嚟卻係好開心咁玩同認識軍人生活! 周圍環境舒服, 只係比較少有參與的活動, 大多數都係參觀跟睇表演! 不過計番佢一年先開放一次咁罕有, 都值得嚟一次!
石崗軍營 簡介
是中國人民解放軍駐香港部隊其中一座軍營，於香港殖民地時代為駐港英軍陸部駐地，香港回歸後成為中国人民解放军驻香港部队的其中一個主要營地，内有石崗機場。
地址
石崗錦田公路260號
交通
51 荃灣西站 ↺ 上村
(以上資料更新至文章當日)
感謝 呀劍萬帥 提供以上資料 呀劍萬帥的網誌: http://kimfamilytravel.blogspot.hk/
|
~END~
| 商店 | 石崗軍營 |