|
香港第三尖 @ 釣魚翁
|
|
ally
2013-06-21
1705
0
|
分享
收藏
| 2013 - 6 - 9 由五塊田到布袋澳大廟呢條行山徑，舊年同一班唔多行山的同事一齊行過，果陣小妹依然未知咩叫行山，不過同事話呢條路好易架乍，平路多，行完仲可以去布袋澳海鮮檔食海鮮添﹗ 人生如棋，世事難料，雖然呢兩句好老土，但事實真係咁﹗上年仲著對平底鞋兼波波裙去行山的小妹，行幾個鐘對腳痛兩三日﹗估唔到一年之後竟然己經行過哂全長100公里的麥里浩徑，50公黑的港島徑，全港三尖之稱的：蚺蛇尖﹑青山﹗最後一尖：釣魚翁﹗ 上年只係離遠望一望個尖頂，哇，傻咗咩﹗行上去﹗ 今日就有三個傻人去挑戰﹗ 傻更更去行山又出發啦﹗晨咁早的荷里活廣場都無乜好選擇，M 記早餐細個好鐘意食，移家返早班太早唔會出街食，返下午就更加唔會特登起身食早餐啦﹗所以一有機會，都會好掛住小妹最愛的M記早餐﹗食完早餐，落樓下巴士總站搭 91 號巴士。 車程都幾長架，成大半個鐘，五塊田落車﹗行過對面馬路沿著石級上山就啱啦﹗ 上山無幾耐，見到一個寫住大廟方向的牌，順住呢個牌行就得﹗ 呢條路除咗行山徑，亦係越野單車徑﹗哇﹗呢條路普通人行上去都有D辛苦啦，仲要踩單車？膽量十足﹗ 五塊田布袋澳呢條行山徑真係幾好架，雖然係泥路，但唔落雨時都幾乾爽，平路多，易行架﹗ 企係上洋山，今日個天超清，可以望到西貢呀﹗香港的海岸線真係好靚好靚呀﹗ 最鐘意影D 白雪雪的雲﹗今日多得佢地，遮住個大太陽，無咁曬﹗行山徑大部份路段都無遮無掩，大熱天時去行都會曬死﹗ 全長100公里麥徑有山有海有植被，仲有瑩火蟲，但原來呢度都有好多得意的物種架﹗沿途見好多不同的果子﹑仲有蜘蛛，同蝴蝶添﹗ 雖然叫唔出佢地的名，但一個鐘之內起碼見過十種唔同的蝴蝶，無奈佢地飛得太快啦，好難捕捉佢地的倩影﹗停低時又合起雙翅，欣賞唔到七彩斑斕的翅背﹗ 離遠望見今日的挑戰重點：釣魚翁啦﹗果然係有D斜度呀吓﹗ 去到一個分叉路, 直行係大廟方向，往左係去清水灣路﹗三個傻人都係第一次去釣魚翁，出發前，問過同事，話有好清楚既的指示牌架 遠望清水灣，炎炎夏日，好多人坐遊艇出海﹗雖然人人都話香港係石屎森林，但其實在香港，只要坐一個鐘頭的巴士，十蚊港紙以內，就可以去到很多郊野公園行山徑﹑家樂徑﹑樹林研習徑，仲有好多水清清地，沙幼幼地的海灘添，你話，香港人其實真係好幸福架﹗ 正當我地陶醉在藍天白雪青山綠樹之際，同伴突然話：咦，個釣魚翁去咗邊呀？ 係喎﹗前後左右都見佢唔到既？前面的山咁低無理由會遮住架？ 見到其他行人士，即刻上前問吓：釣魚翁？過咗好遠啦﹗之前的分叉路己經係落山點﹗ 吓﹗好在離分叉路只係行咗大約五分鐘，三個傻人即刻掉頭﹗ 原來上釣魚翁的起點係好早之前己經錯過咗，攀過三個山頭再落山，就會見到呢個往清水灣道的路牌﹗ 無辦法啦，我地又唔知上山起點係邊，唯有掉轉又終點上山﹗唔知會唔會無咁難呢？ 路牌後面的小路就係上山的路﹗ 雖然係三尖之中最容易的，但話哂都叫做三尖呀，斜度十足，絕無欺場﹗不過小妹己經唔係一年前果個從來都唔運動，運動唔識拉筋的小妹﹗所以...山.....只要望得到就會行得到﹗ 雖然斜，但無太多碎石亂石大石，所以都算好輕鬆就上到山頂啦﹗ 上山容易落山難﹗蚺蛇尖同青山一樣，上山都算輕鬆，但落山就苦不堪言﹗蚺蛇尖碎石滿地，定力少D 平衡力少D 都好易會跌倒﹗青山的路好窄極斜，覺得自己隨時會碌落山，每一步都必須極之小心翼翼﹗一步一驚心﹗行完落山，腳攰心仲攰﹗直頭神經緊張添呀﹗ 釣魚翁雖然無咁難，但都係小心D好﹗ 有驚無險，順利完成香港三尖之一的釣魚翁啦﹗用咗半年的時間，挑戰蚺蛇尖﹑青山﹑釣魚翁﹗超開心呀﹗雖然只有短短一年的行山資歷，但可能就係因為呢種挑戰高處的征服感，登頂完成的滿足感，令小妹一次又一次往更高的難度進發﹗ 原來今日行山最大的挑戰不是上山落斜，突然間天降甘霖，小妹即刻搵棵小樹擋吓先﹗大樹好遮蔭，小樹好避雨﹗ 好在大雨驟來驟往，轉瞬即逝﹗但落山條路忽然間變咗小森林﹗只係隱約見到條人行出黎的小泥路，兩邊的樹差唔多成兩個人咁高，差少少就見唔到條路﹗啱啱落完雨，D雨葉完部濕漉漉，三個傻人好似D汽車入咗洗車機入裡，不停被竹葉做按摩，洗到乾淨哂﹗不過無吹乾服務，行咗五分鐘濕之森林，出番黎，成個人好似係泳池撈出黎咁呀﹗陰公﹗不過天時咁熱，當係降溫啦﹗
話說我地因為見唔到上山個路口，就掉番轉行，不過其實一樣咁斜，都無乜著數到﹗好似過山車咁，行去前面兜個圈上山再向前行﹗原來由五塊田出發，上咗第一個山之後，路邊左手邊突然有個指示牌指大廟方向，指示牌後面一段木欄杆，欄杆後面條小路就條上山架啦﹗ 如果想去布袋澳食海鮮就向大廟方向行，若果想出番鑽石山，就過咗清水灣之後，再向前行一段落山路，見到巴士站的指示牌左轉五分鐘就可以出到大馬路﹗ 沿著大馬路向左邊行，就係91號巴士，可以去到鑽石山啦﹗ 第一次見到野山的百合花﹗ 仲以為釣魚翁係講釣魚的阿伯﹗原來釣魚翁係一種雀仔的名哦﹗呵呵﹗ 一月：蚺蛇尖 五月：青山 六月：釣魚翁 香港三尖，挑戰成功﹗ |
~END~
| 商店 | 釣魚翁 |