不知不覺間又有一段時間無黎過上環，一向都話上環係一個覓食既好地方，近來呢頭又開左唔少新餐廳，包括呢間開業左無耐既西班牙餐廳La Postre，以後又多一個悠閒舒適既落腳點。

餐廳位於有多間食肆的昌盛大廈三樓，去到大廈樓下已見到食物賣相頗吸引既宣傳海報，更有港人甚喜歡的窩夫和甜品呢!

餐廳的環境裝修得優雅別緻，帶有悠閒氣息，連牆上的裝飾和吊燈也很有特色的，小妹很喜歡呢。

店內座位，感覺舒適唔迫狹。鍾意望窗外景既可以選擇坐高櫈座位。

餐牌設計十分色彩繽紛，食物選擇唔少，屬中價位，甜品價錢仲可以算係抵食，但賣相同味道絕不馬夫。

鮮製水果沙冰 $52

夏日炎炎，梗係要飲返杯涼浸浸既沙冰啦。呢杯沙冰用上多款鮮果打成，包括蘋果、菠蘿、荔枝和橙等，沙冰上更放了一片片水果肉，入口味道酸酸甜甜，帶濃郁果香，確係透心涼，好飲。

S先生既Sangria(西班牙冰鎮水果雞尾酒) $68，可揀配香檳/紅/白酒，佢呢杯就係揀左香檳，味道易入口，女仔都岩飲。

西班牙蛋餅 $68

西班牙傳统料理，蛋餅加左洋蔥同火腿等，食落蛋香四溢，仲有洋蔥香甜既味道，簡單得黎味道又唔錯。

牛肉墨西哥玉米片 $98

相信是用上Doritos玉米脆片再加上牛肉肉醬和芝士所製，牛肉肉醬就似肉醬意粉既味道，就咁一片片拎黎食味道較普通，發覺將所有材料拌勻再食，比較好食。不過小妹都係鍾情於中間有隻蛋黃可以拌勻黎食個種，每片脆片都沾上蛋黃汁，諗起都想食。

香蒜白酒藍青口 $168

白酒煮青口煮得頗入味，食落有陣陣白酒香氣，青口份量多又清甜，加埋惹味既香蒜提升味道，更加滋味。

另外附一小桶粗薯條，以迷你鋁桶盛著，很可愛呢。

西班牙海鮮飯 (2人) $268

海鮮飯有分2人或4人份量，價錢為$268及$448。

熱辣辣的用上鐵鍋上檯，賣相豐富吸晴，左右兩邊分別放了青口和大蝦，當中更有蜆肉和辣肉腸等，望落真係好足料呢!

青口同大蝦食落爽口彈牙，夠晒鮮味；飯既質感就較為濕潤，不過味道唔錯，入口微辣，頗惹味的。如果飯可以再煮得軟糯點帶些嚼勁會更好，

什果麻糬窩夫 (半份) $98

半份窩夫既份量係全份花型窩夫既一半，半份要$98，全份係$128，感覺好似叫全份較抵食。

窩夫既賣相同某間E字頭既餐廳好似，無論生果同窩夫既擺位都好似，望落都幾靚，又令小妹左影右影，等左陣終於可以開動啦。

半份窩夫切開後便以心型呈上，賣相美觀。側邊放了點草莓、芒果和奇異果肉等，另再配上吉士醬、忌廉和蜜糖，幾款選擇梗有一款岩你心意。

微熱既窩夫面頭灑左點糖粉，咬落去屬外脆內軟個種，不過內裡既蛋糕感唔重，食落會較輕盈。

見到裡頭白色的係麻糬，咬落去煙煙韌韌，有唔少麻糬在內，蛋香味還好，未算好重，仍有改善空間。

無花果脆批 $59

小妹就覺得呢個無花果脆批幾特別 ，用無花果做甜品比較少見同特別。酥皮餅底做得夠脆又薄，上面鋪左一塊塊無花果肉同一球雲呢拿雪糕，酥皮同無花果之間仲有層無花果醬，咬落會脆脆地，帶微酸，味道唔錯啊!

綠茶茉莉花布甸 $48

深綠色的綠茶茉莉花布甸，入口綠茶味頗濃，唔過甜，其實可以話唔甜。仲帶有陣陣綠茶甘澀既味道，但就唔太食得出茉莉花味。

La Postre

地址: 上環永樂街50號昌盛大廈3樓

電話: 2668 5802

營業時間: 星期一至日: 12:00-23:00

================================

(喜歡的，請按讚支持，是給我很大的鼓勵啊 )  

Connie's Food and Life Corner

   

============================================

感謝 糖小妹 提供以上資料

糖小妹的網誌: http://concon2016.blogspot.hk/

============================================