門面印有可愛的店子Logo，兩手各拎住啤酒同炸雞，就知道終於到了。

入到去有位後生既韓藉店員招乎我們，不過佢識得講英文，所以落單唔成問題。如果好似小妹咁連英文都唔多識講既，請放心，呢度都有香港人店員的。

呢度環境唔算大，不過一到七點幾八點，開始愈黎愈多人，見到都有唔少韓國人幫襯呢，都有唔少人黎買外賣。

餐牌選擇唔算多，都以炸雞為主，亦供應沙律、年糕、泡菜薯條、拉麵、部隊鍋和魚片湯等。

Fruit Punch (Jar) $85

一(Jar)大約可分到4杯，不過要注意呢度既Fruit Punch係無汽既，所以飲落就好似酸酸甜甜，好似橙味既果汁咁，岩晒小妹。

Beergarita $130

S先生既啤酒，偷試左一啖，啤酒味好濃好濃。

忌廉羅勒香蒜炸雞 $178

今次黎到韓國餐廳又點炸雞喇，呢度既炸雞有約6-7款味道，比較特別既有大蒜豉油柞雞、忌廉尖椒柞雞，同今次所叫既忌廉羅勒香蒜炸雞。

一整盤上桌，忌廉羅勒醬和香蒜炸雞是分開上的，這樣便不會把炸雞浸腍呢，喜歡單食又得，沾醬又得，感覺到餐廳的細心。另更附上一小碟醃蘿蔔和沙律，賣相頗美觀呢。

不要小看這一小盤炸雞，份量都唔少，兩人分享是可以的。呢度既炸雞會先用洋蔥、肉桂、洋蔥和燒酒等20多款材料將雞肉醃24-36小時，再加入自家製醬汁煮至入味，再拎去分兩次炸。

炸雞的外皮果然咬落很香脆可口，而且內嫩的肉質仍帶有肉汁，就算唔沾醬都已經頗不錯，算係小妹近來食韓國炸雞中比較好味的。

沾上羅勒醬後係另一番味道，羅勒醬入口比想像中輕盈，沾滿醬都唔會覺得好膩，味道清香得來又不失惹味，估唔到同炸雞又頗夾。

卡邦尼年糕 $108

之前有食過School Food既卡邦尼年糕，覺得幾正，所以見到呢度有供應又叫返碟喇。

用上一小"砵"上桌，份量唔算多，不過望落去已經覺得好足料同creamy! 面頭放了少許香草，裡頭有韓式年糕、煙肉片和洋蔥片。

醬汁唔算好杰身，食落無咁膩，但又不失卡邦尼的濃郁惹味，那股奶香味還是很明顯的；韓式年糕煙煙韌韌，成日都覺得年糕既質感本身係吸收唔到醬汁既味道，所以裹在上面個層醬汁要好濃郁夠味先得，呢度正正做到；而且裡頭既洋蔥片切得薄薄的，吸收左醬汁，咬落亦很清甜，很喜歡呢，好快就食光。

火腿芝士卷 $75

呢個火腿芝士卷個賣相都幾吸引，像春卷皮既外面，除左包住芝士和火腿，裡頭仲加入左青椒粒，食落青椒佔既味道比較重，反而芝士味道很淡，身為芝士迷既小妹頗失望，另外仲附上一小碟蕃茄醬，可按喜好自行添加。

芝麻石鍋飯

店員話呢個飯係新菜式，內裡包括餐肉，芝麻葉、洋蔥、白蘑菇等，另付上醃菜和秘製醬油，可自行選擇是否添加，再拌勻。

味道方面算不上話有驚喜，不過加上醬汁後，味道帶點甜甜的，加上餐肉既鹹香，味道都唔差，S先生好鍾意食呢。

Chibee Chicken and Beer

地址: 銅鑼灣軒尼詩道499號永光商業大廈7樓

電話: 2838 5777

================================

(喜歡的，請按讚支持，是給我很大的鼓勵啊 )