衛徑第五段 ﹣沙田坳至九龍水塘 SeeWide

又係星期六既行山練習，今日唔行港島，反而練習衛徑中最易既第五段 ﹣由沙田坳行到九龍水塘（馬騮山）。

6點鐘係黄大仙地鐵站等，我一心係行上法藏寺，點知佢地話搭車，算啦！搭18M綠巴，由黄大仙地鐵站到沙田坳村。跟住由法藏寺行斜路上山，唔駛半個鐘就去到獅子亭啦！正式既衛徑五段，就係由獅子亭出發，行到大埔道。

我哋夜晚7點鐘由獅子亭士多出發，一路行都係比較闊既車路又有街燈。過咗一個鐵閘位，居然有條小路，先係衛奕信徑。沿小路，比較窄，加上係泥地，之前一晚都有落雨，所以比較濕同滑。過咗泥地，之後就狂落樓梯，估唔到無上山都要落咁多樓梯。落完樓梯就行引水道。唔知係唔係打完風後落得太多雨呢？居然見到幾條瀑布。

條路除咗落咗15分鐘樓梯，基本上都係行引水道，足足行咗個半鐘引水道。一路望住沙田既夜景都算唔錯。唯一係無端端有石像，同埋去到尾段既馬騮山，俾馬騮嚇親，其實真係無咩嘢。亦係咁平坦既關係，行行吓落大雨，都唔需要著雨褸，攞住遮行街咁feel，都無問題。

最後兩小時零七分，行完呢8.15公里既路。