八仙嶺 - 因為十幾年前既山火，令我真係有d 怯，所以行晒三尖、毅行者，都仍然未行過。終於我都要試吓挑戰呢條長程山路啦！
今日四個人一齊向八仙出發。9點半係大埔墟火車站集合，之後搭20C到達大尾篤。沿汀角路行，無耐就會見到山火指示牌，上山既路正式開始。
行咗一陣車路，無耐會見到入口，寫住八仙嶺自然教育徑。噢！開始行樓梯上山啦！行咗幾十級既樓梯，就見到記念八仙嶺山火既清風亭！跟住既路都係比較簡單，上下幾級樓梯，間中又行吓平路。又望住整個船灣淡水湖，風景都非常唔錯，加上今日天氣都算好好，美景盡入眼簾。
行咗40分鐘簡單既路，見到八仙嶺既牌，開始上樓梯啦！經過初二、初三既行山，上樓梯既路無之前咁緊張，斷估唔會氣喘得好勁。再加上阿per
不停講雞公山都上得到，其他既樓梯路都無難度！咁我都好認同，不過每次一見到天梯，都係低頭行唔望返而好d，一望返而會覺得要停底。不停既樓梯，上咗二十
分鐘，終於到咗第一個峯 - 仙姑峯！
超多人企咗係呢個峯頂，攪到連標柱都影唔到！不過係度望住之後要行既山峯，八仙嶺既山脈又真係幾靚！只係唸都要幾多上上落落，不過望到唔係好甘姐！
好，繼續起行！望住船灣淡水湖，船灣海同埋觀音像，景色真係唔錯！只係開始有d曬，除咗帽，我又無帶遮，係山頂行，真係曬到甘！大約十分鐘，都咗第二個峯
- 湘子峯。之後大家好似上晒電咁，好快又去到第三個峯 - 采和峯。真係行多六、七分鐘，又到第四個峯 - 曹舅峯。
雖然都要上上落落先去到下一個峯，不過其實路程真係好短，七分鐘後又去到第五個峯 - 拐李峯。再行一陣去到第六個 - 果老峯。轉眼間，又到咗第七個峯
- 鍾離峯，好似集郵咁影底晒d牌。好！行多十分鐘，到第八個峯 -
純陽峯。去齊晒八個峰啦！唔知八仙既故事，亦唔知呢八個山坡同八仙既人物有冇相同之處，不過今日既目的征服八仙已經完成啦！
行完八仙，我哋既路程當然未完結啦！我哋只係行咗四份一左右。距離鶴藪仲要行多三個半小時。踏日中午時份，太陽越嚟越晒，可能無帶防曬手袖，散熱真係好少少，雖然都好驚又頭痛，不過補補曼秀雷敦都頂到。而手臂就唯有不停補防曬算啦！
唔知我地係唔係好唔夠呢？明明有兩條路， 一條行山腰、一條行山頂，我哋永遠都向山頂出發！估唔到真係要行成三個鐘，先落到去水塘。整條路行咗成五粒鐘。不過今日既行山仲未完結！
望到水塘後，原先應該沿水塘家樂徑出鶴藪村，出返市區。不過見到一條通往沙螺洞既樓梯，發哥都成日去影相，我又未去過，所以我哋決定走埋佢。上完幾十級水塘樓梯，行吓簡單既山路，大約半個鐘既路程，我哋就去到沙螺洞啦！
![]()
呢度有幾間古屋，不過好似無人住，得返一戶人家，而佢亦好似士多咁提供行山者所需。我哋坐底休息，仲食咗碗豆腐花，抖咗半個鐘，又再起行。
我哋沿馬路出去，不過可能無人住關係，已經無咗專線小巴入嚟，亦唔覺有其他車駛入。一路行，出咗村，終於見到有高樓大廈，不過都仲要繼續行馬路落山。望住起緊樓既鳯園，一路直出至汀角路。足足行咗七小時。
但結局仲未完，因為係大埔工業村附近，唸住搭巴士出返大埔，點知架架車都唔停，忍無可忍，決定行去大埔墟站！但係呢程就甘！平時踩單車好快，但係行其實都
幾遠，同埋行咗七小時，你話隻腳幾疲累。仲要係大埔海濱公園被困咁！人行真係唔知行咩路。繞咗一圈，終於去到火車站！全日行咗八小時，攰爆！
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
| 