行山練習 - 夜行柏架山 SeeWide

今年無參加毅行者，但公司有繼續組團參與，所以 Jonah 再次披上戰衣連同新既隊友參加毅行者。今次４個全男班，應該會俾我哋舊年快。雖然唔參加姐，但都可以一齊練習。今日第一次練習選擇一條比較簡單，又近公司既路線起行。

食完晚飯，大約８點半鐘左右就開始由鰂魚涌柏架山既斜路上山。唔知係今日無咁熱或是今日條路比較涼爽，居然一路行都有d 風。唔駛一小時，我哋已經行到去大風坳！居然咁快就好似行咗一半咁！跟住我哋向大潭方向行去。一路都係落斜既車路，去到有分叉路既位，正在猶豫之際，見到四個西人，佢哋話行左邊，我亦都覺得左邊條路闊d，所以行咗去，點知行咗半個鐘，都去唔到大潭，仲要無路，而睇地圖，條路似上返大風坳。唯有原路去返分叉口，向右邊條路行。

去返分叉口，仲要俾Simon 狂串，點解覺得左邊闊d呢？呢條路好闊啊！嗰刻真係唔知點解？繼續向前行，終於見到水塘，仲見到頭先個四個人添！佢哋居然係水塘跳水同游水，仲飲埋酒，實在太危險！

之後嗰咗堤壩，又有分叉路！今次唔估啦！大家用Google map 搵出路，左邊原來出大潭水塘大壩，而右邊就係去陽明山莊，最後我哋當然揀咗右手邊啦！因為一定有的士嗎！

雖然呢邊係斜路上山，不過好短姐！所以好快就到，我哋連埋行錯路都係用咗兩個半鐘左右就到，仲可以搭地鐵返屋企添！

感謝 vi老篤日記提供以上資料

vi老篤日記的個人網誌: http://vivi-1212.blogspot.hk/

~END~

商店

柏架山道自然徑


抱歉，發生點錯誤。重新載入


(0)	(0)	(0)