抱歉,發生點錯誤。
重新載入
韓盛朗 Hansarang:盛極一時!
山區麵包王
2015-08-02
1045
1
分享
收藏
韓流持續大熱,見韓國菜館開完一間又一間就知啦,個個月都差唔多有一、兩間開業,最近,就連美孚卒之都出現咗間韓國菜館喇!依區日本菜館就有幾間,都諗緊幾時會有間韓國菜館,就晌七月下旬就開咗間新店「韓盛朗」。通常啲新店開業初期都好多甩漏,所以,就隔多幾個星期先去幫襯吓。
除咗啲大型連鎖酒樓或快餐店,美孚區好多食肆都喺中小型店鋪嚟,而韓盛朗就屬於中型店,全店大概40個位左右。此外,成間店嘅裝修都好簡單,粗獷味嘅水泥地,蘋果綠嘅牆身,牆上掛點食材嘅插畫,但跟韓菜無關,枱櫈亦排得有啲逼;見到天花一支支抽煙筒,就知佢主打都喺做韓燒,不過,有一點好奇怪,全場都喺2人 / 4人組合成嘅6人枱,每組枱都設置兩個爐,但頭頂上就只有一支抽煙筒(對正4人枱個爐),咁究竟2人枱個爐啲煙點處理?個爐會唔會喺下抽式呢?真喺要搵晚過嚟八吓先解開個迷! 
可能新開關係,加上星期日,附近又喺泳池、圖書館,所以食晏時段確喺都幾多人幫襯,故此,搭枱喺必然。幸好啲人食得快,感覺同隔離間美心MX食嘢嘅速度相差無幾,所以,都唔使點等位。夜晚就做韓燒,晏晝就賣午餐,仲命名為「商務午餐」,但「商務」一詞就有啲可圈可點,打開一睇,其實都只不過喺慣常見到嘅韓式定食。
午餐有超過廿款選擇,包括鐵板烤肉類、熱鍋類、飯麵年糕類,價錢由$38-$65,前兩者會包一碗白飯;所謂午餐定食,亦只不過奉送3款韓式前菜,其實,嚟得韓國菜館,期望上都預咗會有。
bowl韓式前菜
前菜嘅陣容唔算好「鼎盛」,只有3小碟,包括薯仔、韓式泡菜及大豆芽,當中以薯仔較好食,粉粉甜甜有薯味,而泡菜唔夠辛辣入味,大豆芽則較淡口,少咗啲麻油香。雖然,問過店員可以再添,不過,似乎佢忘到唔記得再拎俾我,最近見食完晒嘢都未見拎嚟就算數唔再追。
bowl什錦飯 $55
什錦飯有菠菜、白蘿蔔、蕨菜、甘筍、大豆芽、牛肉及雞蛋,睇相就幾靚架,不過,實物賣相就無咁精緻,因為面頭放滿椰菜絲及紫菜碎,撥一撥開先睇埋其他材料,不過,每樣都得好少。加入韓國甜辣醬後,將蛋黃撩開(雖然唔喺好流心,但都仲有少少夕漿),將所有材料撈勻,食落口感豐富,又因為多菜少肉,感覺較健康。點依個飯亦都喺就番老婆胃口,否則,可考慮揀石窩牛肉飯,跟什錦飯成份一樣,只喺以石窩上,石窩能保持熱度,又會有飯焦,亦只不過貴多$3。
bowl炒年糕+拉麵 $48
真喺千呼萬喚始出來,等咗好耐先送嚟,依碟賣相比起餐牌張相仲差,將兩者兜埋一碟,無諗過會喺嘅樣,哈哈。除咗韓式年糕同拉麵,底下仲有幾塊韓式魚蛋,其實味道唔錯,酸香少辣,年糕又煙韌有咬口,韓式魚蛋入口較粉黏,不過,拉麵就腍咗少少。
整體服務一般般,不過,碟炒年糕+拉麵就真喺等咗好耐,我個什錦飯影完一輪相,食完都仲未整好,估計都等咗10-15分鐘,搵過店員幫手追追,佢都知有落單,所以,唔喺漏單,但就唔知點解會整咁耐!仲有就喺,因為地方淺窄,我哋被安排坐埋牆邊位,啲店員基本上喺入唔到嚟,所以,筷子、匙羹,甚至食物,都喺經隔離位嘅食客幫手遞過嚟,所以,啲加一服務費我應該要分一半俾隔離位嘅食客囉。究竟韓盛朗嘅生意會喺盛極一時?抑或長做長有,都仲要觀察吓!

個人評分
味道:7/10
環境:6/10
服務:6/10
抵食:7/10
平均每人消費:HK$57

餐廳資料:
韓盛朗 Hansarang
美孚蘭秀道5號D室地下N6鋪
2370 1117 / 2370 1181


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $57.00
商店 韓盛朗 Hansarang
特搜總編E2015-08-13 17:43:39
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你將獲得200經驗值作獎勵!
回覆