大朝早7:20am由小弟先去攞位，依啲時段，根本上你想坐邊度都得呀！就連啲員工都喺啱啱返無耐，見唔少老茶客自己動手沖茶。雖然，依間百樂門啲嘢食就一般般，不過，就幾鍾意佢個環境，因為闊落又樓底高，都幾好坐。

飲早茶就有樣好，抵食，有唔少優惠點心，$6.8一客章魚肉餅飯、$10一客鳳爪排骨飯、$11一碗金粟肉碎粥……等等；仲有個假日早市超級孖寶，$24.8一份，一客粥粉飯配一款點心，喺咪都好抵吓。以上優惠點心及超級孖寶逢星期六、日、公眾假期（7:30-10:00am）供應，當然，計埋茶位、加一，平均三十左右都可以落樓。

最後，我同老婆，加埋池記，一行3人，叫咗兩客孖寶，再加兩款點心，好夠食。孖寶揀咗金粟肉碎粥搭鮮蝦菜苗餃，以及家鄉炒米粉搭蜜汁叉燒腸，喺睇落最貴嘅組合。而山竹牛肉球及香煎蘿蔔糕亦喺兩款啱食又抵食嘅超值點心。註：以下所標示嘅都喺優惠點心嘅散叫價，實際唔使俾咁多！

金粟肉碎粥 $11 

依個粥就唔及海皇嘅南瓜粟米肉碎粥 ，因為，無論粟米粒定肉碎，都比較少及碎濕濕，還好粥底夠綿。

鮮蝦菜苗餃 $18

菜苗餃嘅餃皮好薄，菜苗刴得幼碎，夾雜唔少鮮蝦肉，好有咬口，又有鮮味，唯獨啲皮有少少黏牙。

家鄉炒米粉 $17

其實喺普普通通嘅炒米粉，亦無話有咩特別配料，都喺啲甘筍絲、蔥之類，可取之處就只有食落唔會油淋淋。

蜜汁叉燒腸 $18

腸粉皮拉得薄透，見到粒粒叉燒，而且，肥肉唔多，外皮又唔削，真喺意外嘅有水準。

山竹牛肉球 $10

雖然只喺賣嗰$10一籠，但一客有3球，球球都再番咁上下大，牛肉味就咪期望超濃郁，但加入馬蹄粒，香茜，令鬆軟嘅牛肉球多添幾分清爽口感，的確抵食。

香煎蘿蔔糕 $13

又喺抵食之選，無話賣得平，就裁得細件少少將貨就價，真喺抵讚。無論蘿蔔味，抑話個質感，都算喺咁啦，有點蘿蔔香味，入口都算挺實唔削身。

百樂門俾小弟嘅印象，屬於大眾化嘅茶樓，茶市有唔少優惠，定價合理，味道就不過不失，今次則屬少少偶有驚喜，既然咁抵食，就俾個笑面佢啦。因為都有啲親友及朋友同住美孚，所以，都仲會偶爾嚟幫襯一下。

個人評分
味道：7/10
環境：8/10
服務：7/10
抵食：9/10
平均每人消費：HK$32

餐廳資料：
百樂門宴會廳 Paramount Banquet Hall
美孚景荔徑8號盈暉臺盈暉家居城1樓126號舖
2328 8398