係麥記等齊人後，就搭的士去到西灣亭。係呢個亭有好多人係度，大約十點三，係度出發！今日雖然熱同曬，但係天色好好。所以望向水塘都好清好靚。唔駛半個鐘就應該到咗吹筒坳，但係有好多童軍係度，所以都無停底影相。

呢條係分叉路，向下行就係到西灣，而我哋上山就係向浪茄嗰邊行。 

行多一個鐘，有一個觀望台既地方，可以望晒4個灣既景色，都真係幾靚！再加上有一段詩嚟形容呢度，真係正爆！

我哋繼續上山行，行多幾分鐘，就見到寫住西灣山既牌，再行前多少少，就見到西灣亭。不過呢個亭超多人。因為有工聯會既團友係度，佢哋應該好多人報名，分開咗好多隊行。見到有咁多人係度，我哋都無特別停係度啦！即刻急步，快快行去下一個亭。

過咗西灣亭後，雖然係落傾路，但係就只係一條碎石路，所以都行得幾慢！不過好快就行完，到咗另一個亭，嗰亭都係佈滿人，係另一隊行前既工聯會團友。見到咁既樣，我哋唔停又繼續行。因為應該行多一個鐘左右都會到浪茄！

果然去到12點9左右，我哋已經去到浪茄灣啦！

其實係浪茄灣前仲有一個戒毒所，環境都幾靚。戒毒都可以望住咁靚既景，真係唔知想點！

浪茄d沙真係好幼，加上又唔係游水季節，所以唔係好多人。我同carol 又發揮癲喪本色，係度狂影相。當然陳慧敏同per 都有玩啦！per仲要表演側手翻，勁啊！

玩咗半個鐘，我哋就上返山，向萬宜水庫水壩方向行。一路望返浪茄，其實都好靚。

行咗半個鐘去到浪茄觀望台，正想影張相時，一排人行到嚟，阻住晒，所以放棄啦！

不過行多十幾分鐘，就到咗萬宜水庫東壩啦！我哋都有行到落去壩度，因為我好想再睇一次六角柱石。上次嚟都無望真。今次就係度狂影相啦！影咗半個鐘就唸住走啦！不過等的士等咗好耐，最曬係呢個時候。

出到西貢，食個下午茶後，就返歸啦！仲有時間整理吓d相先再出去，Perfect! 

感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/