|
被偷吃了的雞下脾
|
|
Stellashea
2015-06-21
615
0
|
分享
收藏
| 好似已經好耐無打過速食店嘅食評啦，今次純粹不吐不快，就用比較口語嘅文字同大家分享下，希望會講得比較傳神啲。咁今晚屋企人去KFC買完個桶餐返黎之後，就不斷同我講店員服務質素唔好之餘，又唔記得比餐具佢地，返黎再打開睇到啲野食後就更加覺得離譜啦 桶餐包括有炸雞、薯格、雞粒、葡撻同雞皇飯，比起以前，炸雞真係細件咗好多，即使係雞上脾，基本上撕走咗塊炸皮之後真係得返勁少肉，不過都算有幾啖肉食下嘅. . .更離譜嘅係. . .睇下下圖. . 炸雞 ［評分：5/10］ 隻雞下脾細隻已經不在話下. . .重要炸到又乾又黑！重點喺. . .重要無咗一半咁. . .唔好以為衣隻係已經食完嘅雞骨！其實喺一啖都無食過㗎！而另一隻係完整啲嘅！但都好似發育不良咁！唉！味道方面，係香口嘅，但啲肉質，已經炸到嚡咗了。更加唔好想像入面會有肉汁 葡撻 ［評分：6.5/10］ 其實以前都幾鍾意食kfc啲葡撻，但越整就越細個，不如改埋名轉做迷你葡撻啦，咁樣心理上會好好多，加上蛋面凹陷，酥皮超油. . .好彩都重算香口嘅. . . 炸雞粒 ［評分：6/10］ 外賣返黎唔脆係正常嘅，辣辣地幾惹味，但都幾多脆漿，個脆皮好油，雞肉少之外又係炸到乾晒啦 薯格 ［評分：6/10］ 今次可能要讚下佢個薯格㗎啦.. .雖然又凍又油，入口唔脆，但總算食到入面嘅薯肉，已經好過上次係廚房放得太耐搞到又乾又硬，好咗㗎啦. . . 肯德基家鄉雞 (青衣) 青衣青敬路33號青衣城3樓301號舖 ～～～～～～～～～～～～～～～ 味道：5/10 環境：6/10 服務：4/10 衛生：6/10 抵食：6/10
感謝 Stellashea 提供以上資料 Stellashea的網誌: http://www.openrice.com/zh/gourmet/reviews.htm?userid=30477712&city=hongkong
|
~END~
| 商店 | 肯德基家鄉雞 KFC (青衣城店) |