|
太古Ruby Tuesday
|
|
MissH
2011-02-22
737
0
|
分享
收藏
呢兩日唔係咁開心. 有朋友知道我唔開心專登出黎陪我去食飯.
夜晚我地去左太古Ruby Tuesday. 呢間分店, 其實我同屋企人成日都去,
今個月都第三次去了, 好多waiters都認得我地, 招呼好, D野又好食,
我地仲申請左VIP好多年添. 都幾抵, 諗住今晚同朋友去食, 借細佬張咭去食, 有半價.
今晚去到, 都唔算好多人, 帶位帶左我地去一張檯, 但我地想坐梳化位,
不過見有人岩岩先走, 仲未執檯, 所以就睇住食乜先. 我朋友少去食,
想知道D野食係點. 咁我就打算係手機俾D相佢睇, 點知有位女侍應"Sheena"走黎我地度,
態度唔太友善. "洗唔洗叫左野食先" 當時我地坐低十分鐘都未夠.
佢咁樣問, 俾我感覺唔係咁好. 我覺得佢好似覺得我地o靚妹食唔起,
一黎到禁禁禁手機. 但我都算. 我朋友點菜, 我地叫左芝士薯條, 同雞翼,
野飲都未叫, 佢已經走左, 佢連覆一次我地叫左乜都冇. 仲要連水都冇杯.
我朋友話見到triple play張相好似好正, 好想食. 咁我地再加單.
我同女侍應"Sheena"講我地想要多個triple play, 呢個侍應係我地呢邊幾張檯既server.
佢聽完之後話, "加多個triple play" 之後又即刻想行開. 都冇話問下洗唔洗要野飲,
已經水又唔俾人. 乾啃?! 我叫停佢, 我話要多2杯可樂. 佢又走, 我都未講完,
但我依然好有禮貌咁問佢, "我地可唔可以搬去呢個梳化位坐呀,
我地想坐得舒服D, 唔該哂" 點知佢態度超差, 好悔氣咁"得"過黎, "我問下人先" ....
完全係囧哂. 冇幾耐佢行返過黎, 好悔氣咁話, "你地淨係呢自己野過去得架喇".
我都仲好有禮貌地同佢講 "唔該哂" , 反而我朋友聽到佢咁既語氣唔彩佢.
咁"Sheena"就幫我地搬野過去, 但佢又搬緊, 我地又點行呢, 因為就係隔離檯, 好窄,
可能佢幫我地先搬左D碟同刀叉, 轉頭再返黎搬2碟食物. 見我地仲坐係度,
佢又再好悔氣講一次, "你地淨係呢自己野過去得架喇". 語氣比之前果次強烈.
其實我已經好唔鐘意, 邊有人咁樣同人講野架, 佢真係一D都唔客氣架.
但我搬左過去都仲同佢講"唔該哂"
到埋單果陣, 佢問我地有冇會員咭, 我話有, 之後俾左佢, 佢一路行一路睇,
之後掉轉頭返黎好寸咁同我講, "唔好意思張咭唔可以轉讓架喎!"
其實我唔知唔可以轉讓. 因為之前都試過拎細佬張會員卡去食, 幾次都OK既.
咁我就即刻call細佬過黎啦. 其實我都知, 人地話唔可以轉讓, 咁我地真係拎左人地張咭,
人地話唔得就係唔得. 係自己唔岩, 但係我真係好唔妥呢個"Sheena",
係因為佢由頭到尾都係用好刻薄既態度去serve我地. 於是到細佬過到黎,
呢個"Sheena"問係咪埋單果陣, 我就問佢, 洗唔洗對返身份證, 肯定係呢個人? 佢就話唔洗!!!
我話你話唔可以轉讓. 你咁肯定佢真係咭主?!?! 佢就話佢地係唔會查.
(我估佢係睇咭上既MR同MS黎衡量張咭係咪你)
我再問佢, 咁係咪求祈係出面搵個男人入黎埋單都得先.
佢就話, "你都可以咁講既" 咁我話, "咁即係你地都唔會真係去證明咭主係唔係真有其人啦!"
我覺得佢係因為我拎到呢個point窒佢, 佢唔憤氣, 即刻拎住張會員咭, 上下上下咁樣chok,
好似訓導主任去訓示學生, 佢好惡咁話, "我再重新一次,
你地申請呢張咭果陣個terms講左話唔可以借俾人, 就算你用左半價優惠,
我地都有權沒收你張咭" 之後我仲同佢講, "哇我好驚喎" 佢就行左去,
之後佢搵個經理走黎同我地講野. 但係個經理係異常之有禮貌地解釋張咭係唔可以轉讓,
我就做返頭先佢咁樣講野, 動作語氣, 我地更加講埋我地一坐落佢點樣態度招呼我地.
我地同經理講, 我地知道借左人張咭係唔岩, 我地嘈佢只係針對佢一直以黎既態度.
講真丫, 唔係佢一開始咁衰, 我都唔會寸佢洗唔洗對身份證. 真係冇野搵野黎嘈咩.
好無聊囉. 經理話會同佢講返態度問題, 係先好講!!!!!!
我次次同親屋企人去食都唔會咁, 佢地真係服務好好, 我都唔知點解今次同朋友去食,
會俾人睇唔起. 一路俾人刻薄對待, 我已經忍左成晚唔出聲, 諗住廢事同人嘈.
點知都係要嘈!!!! 唔係自己俾$$去食野大哂, 只係去得呢D餐廳度食, 除食物之外,
都係食佢環境同服務唧. 點知一直都俾人粗聲粗氣對待.
算啦, 我都知呢位"Sheena"都唔知自己態度差成咁, 佢只係覺得我地借咭仲大聲夾惡,
佢一定諗唔到, 人地咁樣都係全因佢既服務態度差. 希望佢永遠都係度做.
唔係去到茶餐廳, 一早俾D惡人燒佢掃寶啦.
講左出黎, 舒服哂~~~~~  我的Wardrobe Diary都會在我的fanpage上發放. 也會分享我的生活點滴, 歡迎大家加入.http://www.facebook.com/MissHxLizLisa 我的Blogspot http://misshbabydoll.blogspot.hk/ 我的Tickalookhttp://www.tickalook.com/member/profile/11496/babydoll-vip 我的微博http://weibo.com/misshxlizlisa我的DIY手作專頁 - Babydoll Handmadehttp://www.facebook.com/BabydollHandmade我的寶貝英國老虎狗喪B的專頁http://www.facebook.com/pages/%E5%96%AAB/212848058746512
感謝 MissH 提供以上資料 MissH的網誌: http://misshbabydoll.blogspot.hk/
|
~END~
| 商店 | Ruby Tuesday (太古店) |