|
「泰」豐富 Tea Set
|
|
mjqueen7e
2015-05-17
528
0
|
分享
收藏
近排天氣總是陰晴不定，時晴時雨，加上工作勁忙，實在令人非常納悶。好不容易才撐到週末，決定拉老公兩口子外出，吃頓悠閒的下午茶，讓賞心悅目的食物，洗滌一吓疲累的身心。唔想又係食傳統的英式下午茶，咦，唔係喎，記得早一個星期母親節，有朋友帶咗媽咪去尖沙咀諾士佛臺的「泰燒遙」，品嘗了一頓《泰式滋補養顏 Tea Set》，據報個套餐用料非常豐富，而且幾款泰式美食，吃起來不但香口惹味，更有養顏功效，一於打去餐廳問吓仲有無供應先。 原來母親節 Tea Set 已經供應完畢，不過依家下午茶時段、即 3pm-5:30pm，餐廳仍然會有另一款下午茶套餐提供，當中包括有泰式沙律、燒烤串燒同甜品拼盤，而且隨餐仲會附送兩杯泰式特飲，二人同行埋單亦只需 $268 另收加一，聽落都幾吸引，況且筆者之前也曾來過餐廳吃晚飯，知道食物水準不賴，就一於拍板來這裡。 餐廳裝潢和早前來時分別不大，加上正值下午茶時間，人流不多，感覺有點靜焗。先選了個靠窗的座位，剛好可以欣賞窗外微風細雨的景色。 點了一客二人份量的「泰」豐富 Tea Set，原來套餐是以一個線條簡約的三層架子奉上，分成 3 層，由下至上，最底層就包括有燒虎蝦兩隻、燒豬頸肉同豬牛雞肉串燒各一；而中間的沙律則分別有鮮蝦柚子、青芒果軟殼蟹及泰式鳳爪 3 款口味；至於頂層，除了法包配咖央醬外，仲有椰汁西米糕、芝麻西米糕、咖啡西米糕及紅豆大菜糕 4 款特色甜點，內容十分豐富，而且賣相亦充分展現夏日情懷。 先由底層開始，其實食物非常吸引，特別是兩隻虎蝦，來自越南的白蝦，肉厚彈牙，燒至剛熟，吃起來爽口鮮甜，啖啖都充滿膏香，是整個下午茶中的亮點之一。至於旁邊的豬牛雞串燒，據說廚子先以秘製醬汁醃足一日，唔怪得食落咁濃郁入味，配燒至帶炭香的豬頸肉一起吃，啖啖滋味。另外隨餐亦會附上四款餐廳自製的海鮮醬、沙嗲醬、咖喱汁同青檸汁，用來配襯燒烤吃，醒胃味美。 接著品嘗中層的食物，這層以沙律為主，先介紹鮮蝦柚子沙律，成品用上柚子汁和泰國柚子肉做成，加上蝦肉爽彈鮮甜，而柚子肉亦夠曬大顆，入口味道酸酸甜甜，清新開胃。至於青芒果軟殼蟹沙律，軟殼蟹外形頗有分量，咬下酥脆可口，而青芒果亦味道酸甜清新，用來配搭軟殼蟹同吃，食味一流。之後是去了骨的泰式鳳爪，初頭吃時，的確有點猶豫，怕鳳爪會過於酸辣刺激，幸好吃起來又唔算好辣，反而覺得幾爽口，值得一試。 最後輪到頂層的甜品拼盤，不過品嘗甜點前，先吃切條多士，據服務員稱，用多士來蘸點旁邊的粉綠色醬汁吃，更添食味。多口一問，原來這一小兜咖央醬是用了班蘭同椰汁混合炮製而成，難怪醬汁入口不但帶淡淡斑蘭的芳香，啖落更充滿椰汁的甜美。 至於甜品方面，款式雖然唔算好特別，都係一些大路的泰式糕點，不過就覺得這裡的廚子，都幾肯花心思，甜品盤上除了有大家較熟悉的椰汁西米糕同紅豆大菜糕外，還有口味較新穎的芝麻西米糕及咖啡西米糕，而且全部入口都甜而不膩，味道輕盈。 下午茶包括兩杯泰式特飲，客人可於珍多冰、椰汁冰、香茅茶、青檸梳打、鹹檸檬七喜、泰式咖啡、泰式奶茶當中，任揀 2 杯。點了青檸梳打同泰式咖啡各一，前者以新鮮檸檬調製，入口芳香清新；而後者冰凍泰式咖啡，據說是用咗泰國咖啡豆沖製，喝起來苦味少，入口帶回甘，為這頓下午茶完美作結。
感謝 mjqueen7e 提供以上資料 mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong
|
~END~
人均
$150.00
| 商店 | 泰燒遙 |