|
香港人咁早放工咩....
|
|
oasiswong
2015-09-08
1097
0
|
分享
收藏
可能落雨, 今天街道超少人, 由旺角中心那邊, 經地鐵出入口, 行過雅蘭中心的一邊, 無人阻住, 可以直行直過, 好暢通. 無事忙, 早放工, 約了友人, 食最早一更的日式放題, 下午五時半便開始. 最平的時間: 5:30-8:30, 成人只需用208. 準時上到三樓, 門口設計, 哈! 好有夜總會酒吧feel.... 好正囉... 時間5:30pm, 入內, 竟然坐了七成滿, 好神奇, 香港人依家可以咁早放工既咩...? 每張餐檯上放置了一本點菜筆記簿, 依家個個用手機google記事, 文具鋪的筆記簿大派用場了. 幾隻大型汽水櫃, 多款汽水果汁任攞任飲, 好豪爽. 兩款任飲啤酒: SKOL 獅威 和 韓國的 d-dry, 唔使問阿貴, 一定韓貨! 近期的韓國餐廳都改了供應d-dry, 一罐都收廿幾蚊, 這裡任飲....睇怕...今晚要坐的士回家了... 麻雀檯的設計, 不過...唔係放錢, 而是匙更和叉, 友人見到與麻雀(唔識飛個隻, 又要四人一齊個隻)有關的物件, 都會全身痕癢, 眼睛發亮, 手心發熱... 先食刺身, 分開落單, 但一齊上檯, 味道先淡後濃, 先吃油甘魚和三文魚, 油甘魚, 價錢矜貴些, 肉質嫩滑. 三文魚食得太多, 但食放題, 循例都要吃一點吧.... 切得厚身, 入口極有質感, 清新滋味. 刺身質素極好, 靚貨 就不要用芥辣, 否則影響鮮味, 蘸些少醬油, 已是極品美食. 香港人食咗咁多年魚生, 都重係用"泥水"蘸刺生, 唔係講地盤的"泥水", 而是豉油溝芥辣, 重要用筷子不斷攪, 攪到好肉泥水一樣, 先將塊魚生浸落去, 食個吓, 重要懶陶醉咁既樣... 我今晚面前就有一位.... 哈哈..未攪我, 食刺身, 唔用芥辣都無咩所謂, 三文魚刺物, 連埋薄薄的近皮部份, 入口有油香, 味濃可口. 鮑魚刺身, 入口彈牙之餘, 微微爽脆, 一點點的鹹鮮味道. 珍寶赤海蝦刺身, 真係超巨型, 連尾穀和蝦頭, 如果是一般日式餐廳, 食完蝦肉刺身, 會再作炸蝦頭或煮面豉湯, 最平也收七、八十元, 今晚要吃過夠... 新鮮海蝦, 肉質微微的甜, 入口軟嫩, 黏黏質地, 芥辣...? no way.... 些少醬油, 鮮甜味, 無得輸! 劍魚腩刺身, 肉質細膩, 鮮甜美味. 一般觀察, 三文魚刺身, 可以由白色脂肪間條 來判斷其肥美度, 但劍魚腩不同, 因為脂肪已經平均地分布在魚腩上, 就好似 牛舌一樣, 看不到脂肪, 但其脂肪程度是百分之五十, 感覺特別油潤可口. 帶子刺身, 質地肉厚, 多汁鮮甜, 爽口彈牙. 京蔥三文魚壽司, 輕輕燒過魚皮的三文魚, 更香, 加了京蔥和沙律醬, 多了一份爽口和甜味. 帶子壽司, 巨型帶子, 味道鮮甜, 略爽, 彈牙, 軟潤, 在平價元氣壽司, 也要$35 一碟, 今晚任你食. 玻璃蝦壽司, 雖無珍寶蝦的甜, 但鮮味不差, 還放上了一點點黑松露醬, 爽脆中帶有香氣. 鹽燒左口魚, 又是另一款脂高魚類, 單看不覺多脂肪, 但入口的肥美程度, 直迫劍魚腩, 尤其經過輕輕燒炙, 油份釋出, 更加甘香. 海膽手卷, 迷你型, 海膽水準好, 表面沒有呈現溶解狀態, 仍是粗糙沙粒狀, 入口甘香和鮮甜. 主攻刺身和壽司, 熱食吃不了太多, 芝麻雞翼, 皮香脆, 肉嫩, 芝麻灑面, 香口. 鹽燒海蝦, 中型大小, 燒得微微焦燶, 脹卜卜, 沒有霉身下陷, 粘穀程度不高, 咬落新鮮彈牙. 燒羊鞍, 燒烤技高, 顏色顯示燒得剛剛好, 不燶之餘, 表皮香脆, 羊肉惹味不羶, 油脂中等, 香草味濃. 海蝦天婦羅, 比不上商級日式店, 但水準絕不差, 酥脆口感, 彈牙蝦肉, 蘸淡醬醋汁, 配蘿蔔泥, 清香好味. 鮑魚天婦羅, 外皮脆, 內餡超彈口, 送酒佳物. 放題必食的炸生蠔, 粉醬薄, 極鬆脆, 內裡蠔, 熱爆多汁. 一口芝士, 皮薄鬆化, 芝士熱得半溶解狀態, 入口香滑濃郁. 紫心香芋, 脹卜卜, 波波狀的香芋丸, 咬一口, 內裡谷著的熱氣立即釋放, 聞到強烈芋香. 食飽後, 再到朗豪坊行行街, 購購物, 消消費, 有助消化.
感謝 oasiswong 提供以上資料 oasiswong 的網誌: http://www.openrice.com/zh/gourmet/reviews.htm?userid=85184&city=hongkong
|
~END~
人均
$210.00
| 商店 | 大瀛喜日本料理 Daieiki Japanese Restaurant |