|
做生意既嘢, 我真係識條鐵...
|
|
oasiswong
2015-05-27
360
0
|
分享
收藏
位於Mira Mall 的二樓, 我先到, 已晚上九時半, 友人行了又行, 都搵唔到. 佢打電話問我: “….所有店舖都關門了, 都唔見有餐廳….好似行錯喎….” 友人是路盲, 但路盲都未算是死局, 而路盲, 又加上唔肯開口問路, 才真是大大一隻鑊…. 當然, 唔係友人大鑊, 而係”我”大鑊, 唔知要等到佢幾點才到….咿呀…. 坐低無耐, 店員送上免費的麵包. 有三款, 一款是普通樣式的軟身麵包, 包味不重, 但皮煙韌, 暖身, 幾好. 另一款是類似Focaccia的香草麵包, 散散碎碎的口感, 有香草味, 有些rosemary香味. 第三款是類似印度的Pappadam款式的薄脆, 但味道比較淡口, 有麥香. 麵包配以橄欖油和黑醋, 個人喜歡鹹一點, 就如牛油也有分”有鹽”和”無鹽”, 通常會加些少鹽在橄欖油, 味道更勝一籌. White Wine: Chardonnay & Trebbiano, Capezzana Monna Bianca IGT 2012, Region: Tuscany, Glass: $80. 兩種葡萄, Chardonnay唔使多介紹, 而Trebbiano少見, 義大利中部最盛產, Trebbiano製酒, 味道偏清淡清爽, 網上甚至形容淡到水一般, 還帶有檸檬的酸度及礦石風味, 要嘗到後者所言的境界, 並非我等平傭之輩可達, 留比高手領會吧. 順道為大家介紹一下香港食肆的餐酒價格, 這枝來自Tuscany的白酒, 網上售價大約HK$50-HK$60, 而餐廳的餐牌價是HK$400. 嗱…! 我無話貴呀, 各位最好自行判斷, 自己用自己既經濟學理論來套一套和解一解吧….哈哈.. Sparkling Wine: Zardetto Prosecco Brut NV, Region: Veneto, Glass: $80. 網上有評: Simple and light. 無咩嘢character, 但clean and refreshing. 又有另一位專家話: richer and Creamier. 基本上講咗等於無講, 還有再另一位形容: ripe yellow peaches, with flowers… 這反而較具體, 但我領略唔到, sosad..….. 然而, 第一啖入口, 覺得帶些少蘋果味, 主觀感覺偏甜, 酒味輕. 查一查網上售價, 這枝就比較浮動了, 由HK$50-HK$95. 無論如何, Sparkling Wine的杯裝售價, 應該要比紅白酒為貴, 因為有”氣”關係, 開樽後可放的時間相對較短. PIZZA, PIEMONTESE, $158. Bell pepper, Pork Sausage, Onion, Anchovies cream sauce, Mozzarella & Tomato sauce. 餐牌上寫著有”Pork Sausage”, 但上檯時, Pizza表面只看到幾粒類似碎肉的物體, 食落, 一點Sausage的口感也沒有. 其實食材佔整體成本很少, 既然價格訂得高, 材料放多些少, 成本唔會貴很多吧?? 另外, Anchovies cream sauce, 我衰多口, 落單時, 問了女店員一下: Anchovies醬是”現成”調味醬? 還是師傅用真”鹹銀魚仔”打磨成醬? 可能我問得衰, 又問得尷尬. 當然, 又加上美女店員熱心為顧客, 誤會了-以為我們不想食鹹魚, 她曾經提議可以為我們減去Anchovies sauce. 上檯, 切開, 入口, 完全無咸香味道, 應該無落醬….. 友人笑個不停, 係…恥笑我….我承認，係我過失，我不敢再問了....... 薄餅皮做得非常好, 我好滿意的薄度, 就好Pizza Express的差不多, 烘得比Pizza Express的更脆, 微燶, 可惜Mozzarella 濃度不夠, 味道略偏淡. 眼見幾檯都食緊Tiramisu, 唔好執輸, $88. 用尖形杯裝上, 是否ladyfingers..? 辨認唔到, 也食唔出, 因為已經浸得溶溶了. Mascarpone cheese 好滑好軟, 好好味, 份量唔姑寒, 兩人分享也覺有些少膩. 餅干部份, 如所說, 已被酒浸至十分軟淋, 酒味雖重, 但偏澀, 無酒香, 整體甜度中等, 滿意. 聽到隔離檯話: HSBC卡有優惠, 我都有喎…, HSBC, 見單時, 原來只計食物, 不計酒水, 最終平咗廿四蚊, 真係好大優惠囉，好感激!! 好感動！！….哈哈…心諗… 到底咩嘢名目呀!?? 點解市場上既酒店餐飲食肆優惠, 都唔包括酒水既呢??? 真係唔太明… 酒水已經係食肆賺得最多啦, 成十倍markup. 既然比得優惠, 好心比埋啦, 比得咁難睇……唉…真係…做生意既嘢, 我真係識條鐵呀….
感謝 oasiswong 提供以上資料 oasiswong 的網誌: http://www.openrice.com/zh/gourmet/reviews.htm?userid=85184&city=hongkong
|
~END~
人均
$180.00
| 商店 | Assaggio Trattoria Italiana (尖沙咀店) |