|
豐盛晚餐 過年一流
|
|
Hunger Hunter
2015-02-11
369
0
|
分享
收藏
| 因為朋友快要移民外國，念到佢係外地將不再食到中菜，就決定一行四人到大角咀為他設歡別宴。 福門海鮮酒家開在街角當眼位，所以好易見到，我們亦順理成章黎試試呢間海鮮菜館。呢間雙層酒樓燈光猛烈，地方都算寬敞，坐的櫈亦有高高椅背，坐得舒服亦方便大家冬天安置大衣。 難得食中菜，我地決定食豪啲，讓朋友在香港留下難忘回憶，所以在侍應推介下我們要了數款小菜： 旺年鮑撈起 好有新年感覺的第一道菜，用黎祝賀朋友在美國撈得風山水起，很有意思。 呢道菜係以青瓜、蜜瓜、西芹、火腿和鮑魚切成方條狀長短粗幼無異的冷盤，另有海蜇、草莓和原粒鮑魚，配上福門特製的沙律醬，上碟時由侍應為我們撈起整盤菜，同時我們亦為朋友贈上句句祝福。由於青瓜西芹清爽而脆口，蜜瓜甜甜的而火腿鮑魚鹹鹹地，加上海蜇的鮮味爽口同沙律醬酸酸的開胃感，醬汁與食材極度匹配，食呢碟菜實在令人食慾大增。另外有薄脆的春卷皮，啱哂口痕鍾意食香脆小食的朋友。 旺年鮑撈起色彩斑斕，先餵飽我們的眼睛和相機；而且多重味覺口感，豐富我們的味蕾和舌頭；加上爽甜開胃，填補了飢餓的肚子，亦為晚宴揭起序幕。 即燒化皮乳豬($538全隻) 乳豬往往是晚宴必備菜式，當然黎到呢度都要試下啦。 呢度既乳豬好特別，先講其皮脆而不硬身，燒得啱啱好。乳豬肉質肥美而滑嫩，食落口非常幼滑，應該係一隻有份量的乳豬，但脂肪層卻很薄，沒有厚得喧賓奪主，不過同樣食到幼綿滋潤的口感。呢個就係我地諗唔通的地方，點解食落咁肥滑的乳豬，脂肪卻只是薄薄的一層呢？ 原來廚師有獨特的刀法，先將部分膏脂切走，但不影響乳豬的外觀和賣相，脆皮豬肉如常相連，在食客不知情下已細心為大家的健康下功夫，實在難得。 叉燒 平時係出面餐廳酒樓食叉燒都只為過口癮，無食過一試難忘的叉燒，所以亦認為呢道菜很普通。 但黎到福門才發覺原來呢個諗法是錯的，因為呢度的半肥瘦叉燒肉質幼嫩，一啲鞋口感覺都無，只覺叉燒肉綿，應該亦係一隻幼豬，而且肥脂不多，讓我們食得特別安心。加上香甜蜜汁，配埋白飯簡直一流。 金銀菜白肺湯 食左咁多美食，的確好需要一鍋健康的湯水清清喉嚨。這鍋白肺湯認真足料，先講有大量煲到軟冧的白菜，平衡少菜多肉的都市人，豬肉雞肉的軟綿程度更是讓人容易入口，最啱大家大刷一餐時稍作中場過渡之用。 龍躉兩味($268) 食兩味最好就是能品嘗到一款美食的兩款不同口感。 炒龍躉 保留了其鮮味，食落口不但啖啖肉，而且感受到骨膠原的滋潤口感，女士們更需要多食，keep住皮膚靚靚。加上此食法讓龍躉肉如常滑嫩，厚肉質感實在難得。 脆炆頭腩 另一種不同的食法，咬落香脆食落滑嫩的又是另一種享受。不過由於筆者最近太熱氣喉嚨痛，所以食到呢味已不敢吃太多，非常可惜，只能望住友人食得滋味。 紅荳沙 食中菜如果無紅荳沙作結，總會覺得有點不足。呢度既紅荳沙不但夠粉，而且紅荳特多，每啖食落都有大量紅荳，加上唔會太甜，最啱飯後食黎過口癮。 福門不但食物質素高，侍應服務質素亦相當好，有禮貌而服務到位，無論斟茶裝湯全部代勞，在遠處只要感受到需要協助，就會馬上到來問有咩需要，敏感程度令人欣賞。 所以筆者好快就安排好要帶家人來食團年飯，同佢地過肥年！
感謝 Hunger Hunter 提供以上資料 Hunger Hunter 的網誌: http://www.openrice.com/zh/gourmet/reviews.htm?userid=50295832&city=hongkong
|
~END~
| 商店 | 福門海鮮菜館 |