抱歉,發生點錯誤。
重新載入
川龍開心坊農莊樂園:川秋水燒烤樂
山區麵包王
2015-09-26
2132
0
分享
收藏
去郊野公園燒烤嘅人感覺越嚟越少,當然,始終仍有唔少喜歡到郊野公園燒烤嘅捧場客,小弟就喺其中之一。不過,燒烤場卻漸漸興盛起嚟,以前就通常晌啲新界區先有,如大埔、元朗、屯門、西貢……等等,依家就連市區都有唔少,甚至工廠區嘅廠廈又有,市區天台亦有,好豪華嘅一樣有,真喺百花齊放。今晚同幾個朋友嚟到荃灣川龍開心坊,喺一邊燒嘢食,一邊迎月睇月光。
以前嚟川龍嘆茶、行山,都偶遇過依個燒烤場,實際開咗幾多年就唔知,但環境依然頗新簇,比起小弟屋企附近嘅「吉吉」同「九華徑」兩個燒烤場,就光猛闊落好多,而且中央有一大片空地,可以俾啲細路仔玩吓。是夜經過下午一場雨,天色更清,皎月就晌頭上。
如果坐小巴上到川龍,都仲要行一段路先入到嚟,幸好朋友有車,可直驅燒烤場,而場外大把泊位,點泊都得。

入場第一件事就喺俾錢,幾個主理人棟晌門口櫃枱,就即時以唔多好嘅態度問你收錢,憑貼紙記認,貼甩咗隨時會再問你收過。而最搞笑,想攞多張櫈擺袋都被佢哋話,好在有個男負責人開聲先無問題,當時成個場大把吉櫈,真喺唔知佢哋做乜咁都要管制!
嚟得依類燒烤場無非為咗兩個字:「方便」,第一方便,就喺起爐,師傅仔拉住支石油汽過嚟,一開火「咋咋聲」搞掂,前後唔使5分鐘就起好爐,仲火光熊熊。
第二方便,唔使講就梗喺唔使買、唔使洗、唔使醃就有得燒嘢食。不過,未講燒烤,先講講收費,星期一至四,成人收$128,小童收$88,而星期五至日、假期,成人收$148,小童收$108,無時限,但據知特別日子就有分時段。5人以下一個細爐,包一樽蜜糖及一包炭,而5人以上就一個大爐,包兩樽蜜糖及兩包炭,額外再要炭就每包$28。其實,一包炭真喺唔夠燒,好彩我哋6個人,有兩包炭用,不過,事後發覺佢哋俾咗一樽蜜糖過我哋。
此外,每位客人都附送一支750ml蒸餾水及一罐汽水,收費時會派張換領卡,自行前往裡面櫃台換取,不過,張換領卡喺孖住,即喺一次過要同時換領蒸餾水及汽水各一,依樣有啲唔彈性。
額外飲品、雪條、甜筒或一啲零食,就成為自費項目,店方當然唔歡迎自携飲品,不過,自携食物佢哋就無任歡迎,所以,我見唔少熟客都帶啲私伙海鮮嚟燒。
食物方面,一大個雪櫃放晒所有生肉、蔬菜,不時補充,走咗幾轉,都甚少見某款食物缺貨。款式都算幾多,憑相片記錄,一次過打晒出嚟等大家有個參考,包括:黑椒牛扒、漢堡扒、黑椒豬扒、蒜香豬扒、蜜汁金沙骨、蜜汁豬頸肉、黑椒雞扒、蒜香雞扒、黑椒雞翼、蒜香雞翼、咖喱雞翼、瑞士汁雞翼、香茅雞翼、黑椒雞腎、獅子狗魚蛋、芝士腸、雞肉腸、紅腸、咖喱魷魚、三文魚頭、秋刀魚、多春魚、雜丸、燒賣、金菇、雞脾菇、冬菇、韭菜、菠蘿、車厘茄、茄子、豆卜、粟米及蕃薯,應該都無乜點打漏。
雪櫃旁仲有一列調味品及錫紙,作用喺用嚟包吓啲雜菌拎去烤焗。
講咗咁多資訊性嘅嘢,究竟啲嘢食味道喺點?大部份肉類都醃得幾入味,而且,同一種肉類,有多款味道選擇,好似雞翼咁就最多,就足足有5款味道:黑椒、蒜香、咖喱、瑞士汁及香茅,而且,每款味道都做得錯,唔會食嚟食去都喺嗰隻味,不過,始終喺任燒任食,貴價嘢就欠奉,好似成本貴啲嘅牛扒,就只有黑椒味。唯一問題喺,普遍性有少少過鹹嘅情況,食咗好幾款扒都如是,個人而言,雞翼、魷魚醃得最好,恰到好處。
烤焗秋刀魚
除咗蕃薯,飽肚嘅澱粉類就喺方包,唔知老友喺有心關照定靠害,一次過拎咗成磅方包返嚟,拎咗嚟就當然唔好拎返去咁唔衛生,一人一塊搞掂佢,小弟就夾塊豬扒成為蒜香豬扒多,又幾正喎。
其實,對依一類燒烤場都唔會抱太大期望,反正,味道其次,純粹過吓燒烤癮。雖然服務態度差咗啲,不過,不得不讚佢哋晌衛生方面搞得幾好,場地乾淨企理,而所有食物都放晌雪櫃裡面,有不銹鋼夾可以用嚟夾生料,側旁嘅方包亦有蓋冚住。大家燒咗3個幾鐘,又有明月相伴,夠晒盡興。第三方便,就喺食完拍拍「蘿柚」就走得,乾手淨腳!

個人評分
味道:6/10
環境:7/10
服務:4/10
抵食:7/10
平均每人消費:HK$148

餐廳資料:
川龍開心坊農莊樂園
荃灣荃錦公路川龍村橫龍121地段
2490 9222 / 5114 4534


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 川龍開心坊農莊樂園