表姪女貴為表哥表嫂嘅小公主（其實都唔細，已經喺中學生），蛋糕款式揀番「小公主」，都好順理成章。基本味道喺士多啤梨雪糕，可免費轉指定雪糕口味，所以表嫂就轉為曲奇雲呢嗱口味，而定價為Mini $359、Regular $469、Large $579，我哋依個就喺Regular裝，有兩磅重。如轉意式脆底，則需另外加錢，Mini加$20，Regular加$30，Large則加$40。

好老實，賣相就真喺夠晒萌，細路女就一定鍾意。

雖然，買嗰時都溫馨提示，建議食之前兩小時拎出嚟攤，仲教你用熱水熱住把刀嚟切蛋糕，不過，效果都未喺好理想，等小弟負責切嘅時候，個餅心好似冰封咁，真喺鋼刀都插唔入，用盡九牛二虎之力啦，切到我手軟呀。

蛋糕嘅下層喺曲奇雲呢嗱雪糕，我哋齊齊都再攤多一陣，感覺好啲，無咁硬，開始軟化番，但始終唔及齋買雪糕就咁食咁理想，雲呢嗱雪糕中藏有好多濃郁嘅朱古力碎曲奇；而雪糕面上邊喺牛奶雪糕及士多啤梨醬，整體味道都只可以話喺OK。

小弟一向諗標題都耍小聰明，搞吓食字，不過，今次就無食字成份，「冰封我心」只喺語帶相關。為人父母，養育孩兒真喺一擔心機，不過，今晚見表嫂為表姪女專登買個咁靚嘅雪糕蛋糕俾佢慶生，但佢仲一臉不歡，平時又唔多乖，有啲冰封我心嘅心感覺，依家啲細路真難教！

個人評分
味道：6/10
環境：- /10
服務：- /10
抵食：6/10
平均每人消費：HK$60

餐廳資料：
Häagen-Dazs
尖沙咀彌敦道63號國際廣場地下低層5B舖
2655 9070