Paul Lafayet：賞心悅目小圓餅 SeeWide

難得入到嚟屯門，就無理由食個晏就閃，所以，都周圍逛吓，不過，星期六嘅屯門，一樣多人到不得了，結果就只喺行咗一陣就返歸。費事兩手空空，除買咗啲零食，就有少少「專登」過嚟屯門市廣場嘅Paul Lafayet，買件片裝蛋糕（Loaf Cake）返去同老婆下午茶。

因為上次試過佢哋出品嘅Lemon Cake，入口有實在感，又滲出檸檬清香，配一杯咖啡真喺幾嘆架。所以，今次咪「專登」買嚟教敬佢。

Hazelnut and milk chocolate cake $25

蛋糕口感微微濕潤，但質感結實，加上朱古力味非常香濃，內藏不少榛子及果仁，榛子更沾滿朱古力，甜蜜濃郁，喺下午茶嘅好拍檔。

Marble cake $25

喺經典嘅款式，以牛油蛋糕包住朱古力口味，雖然唔及上述嘅榛子牛奶朱古力口味咁有驚喜，但襯杯紅茶，同樣喺一份享受。

此外，見一櫃色彩繽紛嘅馬卡龍，齋睇都賞心悅目，原來，最少買兩個都有個小盒裝住，真喺有心思。今日嘅下午茶就加加碼，片裝蛋糕配馬卡龍。

開心果 Pistachio $20

佢哋出嘅馬卡龍晌質素上無庸置疑，睇睇賣相就知手功了得，小圓餅做得好細緻，外觀完整，無崩無爛。青綠色嘅開心果味，睇見就有種清爽嘅感覺，小圓餅入口煙韌富質感，滲出點點杏仁香氣，又加入咗開心果仁碎；而中間餡心好軟滑，開心果味算得上濃郁，感覺嚟得自然。

紅莓 Raspberry $20

嬌艷嘅紅莓味似得火辣辣，又會否綻放另一份驚喜？外層同樣煙韌，口感細緻，餡心嘅紅莓果醬慢慢散發出酸活嘅紅莓香，不造作，唔浮誇，格外討人歡喜，但甜味超重就要接受一下佢哋依個個性。

以往，都曾經試過唔少味道，如柚子、荔枝、伯爵茶、玫瑰……等等，但每次再試，就總有份喜悅，甜點就喺有咁嘅化學作用，而咁精美嘅甜點，化學作用就更大。

個人評分
味道：8/10
環境：7/10
服務：7/10
抵食：7/10
平均每人消費：HK$45

餐廳資料：

Paul Lafayet
屯門屯盛街1號屯門市廣場1期1樓Kiosk 2號舖
2411 1211

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

~END~

商店	Paul Lafayet (屯門店)


(0)	(0)	(0)