|
享受＊健康夜
|
|
mohkc
2015-09-17
412
0
|
分享
收藏
| 男友屋企會拜神信佛，係某一啲日子會齋戒，平日都係多菜少肉，適逢Auntie生日，當然要舉家慶祝啦！ 哈哈，但我嘅烹調手藝未精，暫時都係唔好獻醜。為免嚇親人，我們都係選擇出街食！ 留意到好多唔唔同嘅素菜館鐘意用一啲蔬菜喬裝成肉類，好似傳統嘅素叉燒、素燒鵝等等。其實呢類嘅菜色好多色素。又紅又黃咁，見到都打咗個突，經朋友介紹，得知呢間餐廳唔會有以上問題，菜式都以西同日式的烹調手法為主，款式有別於其他餐廳，見到日式蔬果手卷好似好吸引，訂位先！ 7:30 黎到，幾近滿座，建議預先訂座！餐廳一邊是藍色卡位，軟件梳化坐得舒服，另一邊就有二至四人枱，另有廂房可供12-24位朋友聚會，店長推介晚市套餐，有三款前菜、手卷、餐湯，主食、甜品及飲品，餐牌上列明餸菜中會包含咗雞蛋或牛奶，亦可減去蛋白質嘅材料， 用其他材料代替，方便全素食者 慢磨紅菜頭蘋果汁，果汁中充滿纖維，原汁原味，飲品溫度係室溫㗎 首先有頭盤麻醬青瓜粉皮，紅菜頭蘋果合桃沙律，泰式柚子沙律 用三小碟分開送上，顏色豐富，近幾年，紅菜頭成為注重健康生活嘅餐枱常客，營養充足兼具抗氧化、降血壓等功效，本身味道較淡，配搭蘋果增加咗甜味，令食客更易接受。泰式柚子沙律攪拌後，柚子嘅果汁滲落沙律菜入面，味道清新，而其中兩款沙律都加入少量堅果，因為全素食者，好少機會從食物中吸收油脂，而身體其實需要適量嘅份量㗎！ 松露椰菜花忌廉湯 特別鐘愛黑松露嘅濃郁味，天呀！絕對係我心目中最正嘅香料！ 湯嘅密度較高，包括椰菜花及上湯等材料，都用融為一體，只是喝一啖，口內已經充斥住黑松露嗰陣香味 香芒牛油果苜蓿芽手卷 我就係因為你而黎，哈哈！咬落去時好脆身，細心再睇，手卷就用咗兩層紫菜包住，唔怕配料嘅水分整軟紫菜而影響口感，我食嘅係香芒牛油果及苜蓿芽，味道互相配合，造型好可愛呵 黑松露菌金菇炒芙蓉 $138 炒芙蓉蛋就似賽螃蟹嘅做法，用文火將蛋白炒至碎短的形狀，如果火候控制唔夠熟練，就好難做得好，再加入切成差唔多長度嘅金菇，重要環節就是廚師毫不留情地加入大量黑松露！令味道豐富，食嘅時候，根本唔會想配搭飯或其他食物，口中只想被一種香味霸佔！ 紅咖喱野菜猴頭菇丸配印度薄餅及珍珠糙米飯 （跟餐加$ 20) 用小鍋送上，濃濃咖喱汁遮住配料，等我搵下鍋中有咩先，當中有幾款蔬菜，青椒、椰菜花等，最為特別嘅係猴頭菇丸，醬汁滲入，顏色及口感真係似肉丸，配珍珠米同薄餅一齊吃，味道濃郁，珍珠糙米飯黏性較高，我哋都好鐘意 黑芝麻奶酪 $28 熱嘅黑芝麻浮於凍奶酪上，就像道理中嘅黑白分明，配炒香咗嘅芝麻，唔會過甜，夠晒健康 跟餐甜品 班蘭椰汁糕 同樣口味唔太甜，多食一件都覺得飽飽濟濟，如果可翻熱一下糕點就更加好 推介此餐廳 5/5 這新派素菜店，感覺煥然一新，菜式都以西、日式的烹調手法，款式有別於其他餐廳，各款菜色非常吸引，精緻嘅環境與到位嘅服務。另外我哋成餐都食得好自在，如果有怕食蔬菜嘅小屁孩，可以嘗試帶佢黎試一卜試，由不同蔬菜做成嘅菜式，帶黎新鮮感，令人印象深刻 悠蔬食 Leisurely Veggie 星期一至日: 11:30-22:30 銅鑼灣渣甸街50號渣甸中心25樓 Tel: 3565 6393
感謝 mohkc 提供以上資料 mohkc 的網誌: http://www.openrice.com/zh/gourmet/reviews.htm?userid=717759&city=hongkong
|
~END~
人均
$250.00
| 商店 | 悠蔬食 Leisurely Veggie |