「龍閣」跟一般大眾火鍋店唔同，裝修華麗好多，無論卡位或圓枱，都令人坐得舒服。而且，斯文客又較多，所以，環境唔會好嘈炒。服務亦都好好，店員頗有禮，就連傳菜嘅阿姐每送上一碟火鍋料都加句多謝，唔喺間間酒樓啲阿姐都有咁嘅禮貌。

幾位家人都唔喺大食之人，所以，點嘅份量就唔敢預太多，免得浪費就唔多好。一大張點菜紙，分門別類，基本上嚟嚟去去都喺嗰啲，款式無話太多花巧嘢，但就有啲店方或原創推介。雖然佢哋有啲前菜小食，不過，我哋慳番啲集中火力食火鍋嘢。

鍋底未到，先嚟醬料盆，讓客人自行混醬。9款配料分別有：蔥花、生蒜、芫茜、金蒜、辣椒、薑蓉、XO醬、蝦米醬同麻醬，以及豉油，試過佢啲自家製XO醬，又幾好食喎。順帶一提，醬料費收$20，要唔要都收，就梗喺點都撈番兜啦；晚市小菜茶位收$12，不過，打邊爐就唔計，可能預你會叫嘢飲，嗰度賺番你，當然加一服務費就走唔甩。

菜乾豬肺湯 $148

鍋底共有7款，都較正路，唔會古靈精怪嘅湯底，家人想潤潤，所以，菜乾豬肺最啱大家。菜乾喺甜菜乾，味道較甜，但嫌佢落得少，唔太有朕菜乾味，豬肺雖然有唔少，食落無羶味或豬燥味，只喺入口偏韌。然而，之後加湯，都喺一樽樽嘅雞湯，唔喺加水咁低檔次。

特級手切肥牛 $248 

打邊爐又點可以無肥牛，幾款牛肉類中，揀咗中價少少嘅手切肥牛，睇落質素相當唔錯，色澤紅潤，厚薄、大小均一，而且，雪花紋分佈平均，灼十秒八秒都可以放入口，肉嫩油香，又有肉味，果然高質素。

蝦籽海蔘餃 $88

一客有8大粒，喺自家原創出品，其實，搵海蔘做餃都已經幾有賣點。由於包得幾大隻，餡料又多，所以比平時要烚耐少少，否則會煮唔透，我哋就喺咁犧牲咗第一粒。餃內蝦肉幾爽彈，滿佈鹹鮮嘅蝦籽，但海蔘唔多，所以，口感上唔會太明顯。

鮮打黑白墨魚丸 $98

店內好多鮮打丸類選擇，我哋一口氣揀咗兩款，先嚟個「黑白無常」，同樣一客8粒，粒粒閃爧爧。墨魚丸不愧新鮮手打，好爽口，墨魚味濃郁，不過，加咗墨汁嘅「黑丸」味道有點怪，唔知喺咪墨汁影響個新鮮度。

粒粒鮮黑四寶丸 $98 

顧及唔食高膽固醇墨魚丸嘅親友，依位四寶丸就啱佢多啲。四寶包括牛肉、鯪魚、蝦丸、墨魚丸。佢哋一致公認最好喺牛肉丸，既爽口，又有陳皮香，好食到不得了，至於其他幾款，喺穩穩陣陣。

帶子片 $108

海鮮類當然唔會平，所以，只揀帶子及花枝兩款，啲帶子新鮮嫩滑，輕灼過後，入口非常鮮甜。

花枝片 $98 

白雪雪嘅花枝片，同樣，唔使灼太耐，一捲曲就差唔多，食落好軟腍，帶少少爽口感。

鮮炸魚皮 $48

既可當酥炸小食，入口非常脆，又唔油膩；又可灼一灼，等佢吸啲沙汁，令食落仲有脆口感之餘，又有湯汁鮮香味。

鮮炸響鈴卷 $48

店員話喺自家炸，所以，更落足力試吓先。響鈴炸得金黃而層次分明，放晌湯中灼幾秒，再入口，外層吸滿汁，內層仲有香脆嘅口感，唯入口有少少油膩感。

野人爆籃 $88

即喺菜籃一盆，有生菜、白菜仔及南瓜，排列整齊放晌玻璃碗內，質素夠新鮮，不過就有點貴咯！

本來無打算點甜品，但有啲甜品出奇咁平，無乜理由都唔試吓佢㗎！

忌廉香芒卷 $28 / 4

雖然個糯米皮做得有丁點韌，今夾埋卷心嘅奶凍（初時仲以為喺忌廉）及芒果粒，又幾唔錯喎，尤其打完邊爐，食件涼涼哋嘅甜品，感覺良好。

桂花水晶紅豆糕 $19 / 4

比芒果卷，依個紅豆糕仲平仲好食，三層夾雜紅豆糕、椰汁糕、桂花糕，層層做得唔錯，又足料，所以，真喺平靚正，抵食！

原味紅棗糕 $19 / 4

紅棗糕喺熱食，即叫即蒸，所以，好遲先上到枱。一客3件，件件都幾大粒，外觀睇到糕身暗間一層層，一啲唔迤做。雖然紅棗味唔算好強，但熱辣軟綿，入口煙煙糯糯，一啲都唔差喎。

其實有一點好好奇，烏冬、出前一丁……幾類粉麵標單價為$48，究竟一客俾幾多個出前一丁你呢？無理由一個吧，哈哈！

餐廳嘅用料確實夠精，就如丸類，唔會買啲普普通通嘅乜丸物丸，不過，定價確實唔低，新張期內9:00pm後有半價，怪不得第二輪都仲有咁多客。所以，想嚟試，不妨考慮依個優惠，但先打電話再問問，以妨優惠已完結。

個人評分
味道：7/10
環境：8/10
服務：8/10
抵食：7/10
平均每人消費：HK$280

餐廳資料：
龍閣極上火鍋料理 Dragon Court Premium HotPot Cuisine
旺角西洋菜南街51號友誠商業中心2至3樓
3422 8222