|
譽江南飯店 Yu Jiang Nan：更勝譽期
|
|
山區麵包王
2015-11-20
955
0
|
分享
收藏
朋友間相聚，小弟真喺食乜都無所謂，有提議食京川滬菜，實啱㗎，而且，亦好一段日子無食！最緊要喺唔使我諗去邊度食就最好不過啦，哈哈！選址喺荃灣食廈大輝鴻近頂層嘅譽江南，據講喺間較新嘅餐廳。
晌翻閱餐牌期間，發現有個4人套餐，好啱我老婆，皆因喺全素，真喺好少見啲非素食餐廳推啲全素套餐，9道菜嘅「素食主意」只賣$398，仲要全包，即喺每人放低一嚿水就走得，超划算。
此外，仲見到佢哋有啲一人午餐，真喺抵到爛，隨時平過上快餐店，分兩個價錢；$38 / $45，包一碗白飯或菜飯，加一客例湯或酸辣湯，講明免茶芥，免加一，可惜依啲機會唔屬於我，只限星期一至五午市供應。
今次同枱嘅朋友都唔喺大食之人，我哋亦無乜點啲貴嘢，所以，今餐食得好經濟。況且，睇過佢啲定價，都頗為實惠！光顧嗰日仲做緊大閘蟹，當然食大閘蟹或其他蟹粉菜就要付出多好多啦，此外，若然食鮑參翅肚，又當別論，故此，晌度食一餐，平有平食，貴有貴食。
先嚟啲前菜，有好多選擇，超過廿款，相信總有三幾款啱你口味。
馬蘭頭刴得夠幼細，菜葉味清新，加入少少豆乾，整體食味不俗，只嫌豆乾落得少。
碟口水雞正喎，雞肉幾滑溜，皮下脂肪又少，靈魂喺個麻辣汁，夠晒香辣，丁點麻，刺激而唔會嗆喉。
煙燻味好濃，一上枱就散發出嚟，不過，佢同燻魚唔同（店家都有燻魚買，$68客），燻魚質感硬身少少，然而燻小黄魚啲肉質仲保持嫩滑，但入口帶濃濃煙燻香味。
依道京醬肉絲，甚有滬菜特色「濃油赤醬」，肉絲炒得相當惹味，搵啲薄餅包住食，無咁油膩之餘，感覺更飽肚。
嗜辣嘅老友自不然好想一試水煮菜式，食道水煮牛肉應該滿足到佢，因為真喺好辣，非常刺激，餐廳冷氣都幾夠，但小弟食幾嚿之後都開始冒汗，而啲牛肉都幾腍滑，整體真喺唔錯，如果唔怕辣，汁底下嘅粉皮就更唔好錯過，不過，頂咗幾嚿牛肉我都夠皮，確實好辣。
雖然喺兩面黃，但覺得做得唔夠脆身，亦唔焦，但配雜菌，食落就讓自己覺得健康啲。
實在斤兩十足，個個飽滿，實質真喺填滿人肉餡，有肉味，又富肉汁，而外皮煎得甘香脆口，好食。
其實，晌大輝鴻搵食真喺有好多選擇，不過，等搭電梯真喺好煩人嘅事，我最擔心喺安全逃生嘅問題，只望佢幢大廈有足夠防火設施。而今次晌度餐飯，亦比預期中好，雖唔喺有咩太大驚喜，但穩打穩紮，收費又唔算貴。
個人評分
味道：7/10 環境：8/10 服務：8/10 抵食：8/10 平均每人消費：HK$120
餐廳資料：
譽江南飯店 Yu Jiang Nan 荃灣眾安街55號大鴻輝中心21樓B室 2461 1288
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | 譽江南飯店 |