[尖沙咀] 新派韓國料理 ● The JOOMAK
27 NOV, 2015
一得閒晚上就要約下好姐妹黎開心一下，作為小師奶既我真係好需要見下朋友，成日吽係屋企我就黎發霉霉喇！不過我又好深閨，可能大肚關係，一夜又出得特別旺既地方呢～一食完飯行上條街我就有想返屋企既衝動，哈哈！
但每次我搵親既餐廳都好早食，然後好早完，傾到唔夠喉，決定下次要黎小溫家作客先得！今次揀左間新派韓國料理，JOOMAK 位於尖沙咀LCX，地理位置方便，大家放工後可以趕到。
時間尚早，餐廳不算太多人客
點菜既店員係韓國人，用簡單英文溝通便可，店員有介紹邊款菜式較受歡迎，我典型港女師奶，問完又唔跟佢既介紹，叫自己想食既，哈哈哈！不過我地前後點左四道菜，店員話已經夠我地食。
好姐妹話食炸雞要啤啤佢，可惜餐廳唔借提供韓國啤酒
Draft Kirin beer 麒麟啤酒 ，睇個樣好似係生啤版，解渴一流吧！
酸甜炸雞
YEAH ！ 炸雞炸雞！好想食好味道炸雞好耐喇！雖然呢道係炸無骨雞件，但味道酸甜，脆漿唔算太多，只是薄薄一層，沾上酸甜汁剛剛好，唔會太油膩！GOOD！
食完呢道炸雞令我想食真係有骨既炸雞雞喇！
JOOMAK FRUIT
呢杯個樣咁清純既當然係屬於我架啦！係MOCKTAIL黎既，其實有D似溝出黎既橙汁, 我又無攪攪佢，仲覺得幾好飲丫，唔會好甜，點知飲到個底底好甜呀！原來我無攪勻佢～哈哈
GIMBAP
韓國飯卷真係我最愛呀！姐妹們都大愛～
我唔記得呢道係咩Gmbap，係再配上醃製蘿蔔，同辣魷魚～味道不錯！
燒 L.A.牛肋骨
雖然呢道菜個樣唔靚仔，但醃得好韓式牛肉味，甜甜地，燒得剛剛好，唔會太乾，仲有肉汁！
海鮮豆腐鍋
店員建議我地配碗飯去食呢道湯，不過呢個海鮮豆腐鍋唔太好食，味道唔正宗，完全唔辣，
有點失望！因為我去韓國餐廳都鍾意叫個湯送飯，好正架嘛！
短短兩小時相聚，食飽飽佢地仲陪我行ＢＢ用品店，我暫時仲係只睇唔買既階段，我一買我相信我唔會買得少～哈哈哈！有你地陪我一路成長，真係好幸福呀！
The JOOMAK
address : 尖沙咀海港城海運大廈3樓LCX 34號舖 (2111 0851)
open hour : 星期一至日: 12:00-22:30
感謝 仙蒂小溫太 提供以上資料
個人日誌: http://cindylittlemrswan.blogspot.hk/
| 
