|
物超所值．日本料理
|
|
poortravellers
2015-10-13
268
0
|
分享
收藏
| 今晚去到元朗咁遠食日本菜，絕對係慕名而來，一直聽身邊好多唔同既人推薦黎食，食完感覺係－絕對值回票價、物超所值。 識食一定係坐bar枱食，睇住師傅即切即食，無得再新鮮啦掛？不過都要book位先可以確保係坐呢度，睇住師傅唔同既功架好賞心悅目。 食日本菜點少得Sake，林林總總都有，睇到眼花撩亂，未食野已經想飲番杯。 擺設好有特色，真係有少少覺得自己身處係日本，品嚐最鮮味既刺身壽司，呢間食既野都係廚師發辦，只要揀左想食邊個套餐，師傅會跟據當日最值得、當造、新鮮既食材而去製作，比起自己去揀食咩好，由師傅去發辦更加可以食到魚生最新鮮既時刻，係岩既時候食岩既食材最重要，當造呢家野我諗都係交比師傅呢d有經驗既人去幫我決定好了，哈哈。 今晚揀左「正」呢個套餐，有4款刺身、6件壽司、1條手卷、魚湯、蒸蛋同甜品。 先食前菜，呢個係蕃茄、豆腐、水菜以柚子汁Mix埋一齊食，水菜好爽口，豆腐食落有d似豆腐花既質感，蕃茄帶稔，配埋微酸既柚子汁，作為一個前菜絕對合適，好開胃。 另外仲有醃製過既銀魚仔，鹹中帶魚鮮，作為小食好好。 食完前菜師傅就已經準備好第一款刺身 野生油甘魚，呢種油甘魚比平時食既油甘魚更加濃味，食落更係有入口即溶既效果，好鮮甜，嫩滑既口感可以配旁邊既山葵，呢種山葵唔係一味辣一味攻鼻，帶有淡淡既Wasabi味又可以帶出油甘魚既鮮味，呢種對比絕對令人回味無窮。 深海池魚，就咁睇個色澤好靚，呢個池魚要配埋薑蔥豉油食，豉油有中式既感覺，池魚有咬口，肉質結實，薑蔥豉油帶出其鮮甜，讚。 秋刀魚，呢個都係配薑蔥豉油，當中秋刀魚既油脂分佈好平均，油脂既香係口腔久留不走，一絕。 帆立貝，作為帆立貝既愛好者，呢件安排係咁多款刺身後上場絕對無失色或被比下去，呢個帆立貝係大隻果種，輕咬一細啖已經可以食到佢既鮮甜，作為刺身既結尾相當唔錯。 食啖熱菜之後就食黑松露蒸蛋，未食已經聞到黑松露既香，令到人引唔住快快影完相就食 食之前先推開上面既黑松露，更加平均分佈，咁樣啖啖都會有黑松露既味。蒸蛋夠滑，而且比起平時食既蛋味更加濃同突出，入面仲有蟹柳同蝦肉，除左黑松露既香，更加鮮甜滑嫩。 差d唔記得講sake，必點，簡直係絕配，簡單「梵」既純米大吟釀，聽聞呢個曾經係皇室貢品，世界級既清酒黎到一定要一試 飲之前店員比左各式各樣既清酒杯我地揀，揀番隻岩自己既再飲！ 飲一啖就知道點解會係世界級，味道相當醇厚，濃郁得黎帶甘醇滑順，必定要凍住黎飲先可以更加發揮到當中既香醇。 到壽司時間，呢間既壽司飯會見到同平時出面色既唔同，有少少豉油既顏色，其實係赤醋飯，價錢比平時壽司醋貴，但係較正宗，酸味較強，但食落更好味。 金線鯛，日本既紅衫魚，紋路相當靚，粉粉黃黃，魚皮既位置比較有咬口，魚肉鮮甜且軟，面頭既蔥提升左魚既鮮味。 大拖羅，上面掃上薄薄一層既豉油，魚脂既分佈十分平均，可以見到拖羅既油花，令到成片帶點粉紅，有入口即溶既效果，魚既鮮味再係口度慢慢散出，好耐無食過呢種味道，回味。 牡丹蝦，好貼心咁去左蝦尾殼，可以成舊放入口食，牡丹蝦亦係相當鮮甜。呢度既所有壽司都唔需要點豉油食，鮮甜得黎唔會淡。 吞拿魚醬油漬，呢個係岩岩坐底嗌完野師傅就將片吞拿魚放左係醬油度浸住，到差唔多要食既時候再拎起用紙吸乾，本來以為浸咁耐會鹹，點知食落完全唔係果回事，食到既有淡淡醬油味，但無蓋過吞拿魚既鮮，相當新鮮。 呢度一定要食既當然係呢個紅遍網絡既海膽杯 底係赤醋飯，上面有堆得滿滿既馬糞海膽，面頭有隻甜蝦，有條好靚既蝦尾係上面，就咁睇已經好吸引，食一小啖發現係欲罷不能，馬糞海膽入口即溶，帶淡淡既海水鹹味，配以底下既赤醋飯，大滿足。 手卷係黃蘿蔔加拖羅手卷，師傅即卷，見到入面既材料相當足料，呢個配搭係日本最常有既配搭，簡單得黎好味，脆口既黃蘿蔔配上鮮味拖羅，輕點一下醬油鮮味更突出！ 魚湯，成碗呈奶白色，可想而知魚味有幾濃，底更有豆腐粒，令到湯飲落更滑更香。 最後甜品係蜜瓜，甜得誇張，蜜瓜原來可以咁甜，清甜得黎帶蜜瓜既香味，作為成餐既結尾好完美。
感謝 poortravellers 提供以上資料 poortravellers 的網誌: http://www.openrice.com/zh/gourmet/reviews.htm?userid=58550255&city=hongkong
|
~END~
| 商店 | 鮨文 |