|
絕對物超所值，酒店級小甜點，好有heart老闆！
|
|
poortravellers
2015-10-21
280
0
|
分享
收藏
食甜品都可以有咁靚既擺盤，真係好靚好有心機！ 估唔到元朗都會有咁有水準既甜品店，門口有粒鈕係度，好易認 甜品店細細間，但座位唔少架，可以揀坐入面／入出面 入面裝修都係以“鈕”為主，好colourful睇到人都開心埋。 今次揀既係大糖鈕特選拼盤($198)，總共有8款甜品，但邊8款甜品日日都唔同架，5款係餐牌入面有既甜品，其餘3款係神秘甜品，真係要上到枱先知會有咩食！ 未食之前先揀野飲 真係估佢唔到會係呢種present方式，乾冰效果超勁，杯野好似滾湯咁卜卜卜，呢杯係蜂蜜桂花茶($29)，味道飲落似桂花糕，天然得黎好香，唔會話太甜，桂花既香配甜品食唔錯。 另一杯都有乾冰效果，香檸薄荷梳打($29)，呢杯飲落似Mojito，檸配薄荷好香，清清地既梳打，呢杯好飲！ 未食甜品之前，老闆好有心機咁逐一介紹唔同既甜品，話畀我地知每款甜品係咩黎，有咩材料係入面等等，最重要係佢會教埋我地點樣食，個次序點樣食先會最好味，因為如果先食左d好濃味既甜品會令之後食淡味d既失色不少，覺得老闆教埋客人點食證明佢真係想客人品嚐得到當中既味道，想客人食到最原味既甜品，睇得出佢好有heart下，老闆加分不少！！ 先食呢個因為雪糕會好易溶，底係apple crumble，蘋果煮得岩岩好，唔會話煮得過火，稔稔地既蘋果配crumble好味，下層有微溫而雪糕既凍相撞之下，水準相當高！ 冧酒香蕉慕思，配芒果汁，呢個甜品香蕉味相當濃，會似真係食緊香蕉咁，上面有crumble仲有煮稔左少少既香蕉，中意香蕉既一定會中意食 綠茶燉蛋配雙式紅豆，綠茶味道濃且回甘，紅豆唔係一味靠甜既紅豆，食到原味紅豆味，抹茶控1號見到完全心心眼 薑汁椰子河粉(第一個神秘甜品)，食落似食緊椰子肉，好香 玫瑰荔枝(第二個神秘甜品)，荔枝味好出，好香，食食下會有淡淡玫瑰味出黎，好滑唔會過甜，之後就開始食較濃味既甜品 傳統芝士蛋糕，蛋糕既芝士味好香濃，食呢個甜品食增添飽肚感哈哈，上面既唔係blueberry，係初生cherry，幾特別 暖朱古力Brownie酥皮卷(第三個神秘甜品)，雖然去到而家先食，但食落竟然仲有暖暖地既溫度，brownie朱古力味好濃，口感好滑，出面既酥皮竟然可以減少左膩既感覺，呢隻真心好食 70％特濃朱古力慕思杯，呢個配埋鮮橙Jelly，70％食落係特濃帶苦，食得出朱古力份量相當多，但新鮮橙Jelly令到朱古力無咁苦而且帶黎清新既感覺，作為最後一個甜品呢個結尾相當唔錯！ 走果時見到有爆谷賣，好多唔同味道，下次經過買包試下先！
感謝 poortravellers 提供以上資料 poortravellers 的網誌: http://www.openrice.com/zh/gourmet/reviews.htm?userid=58550255&city=hongkong
|
~END~
| 商店 | 小糖鈕甜品專門店 |