|
低於HK$40 嘅午餐，香港就快冇哂！
|
|
井底龜龜
2015-12-17
527
0
|
分享
收藏
| 一向欣賞吉野家嘅出品，每年幫趁次數一定係云云連銷快餐店之中最多，一年起碼都四至五次，特別係早餐同下午茶，二十幾蚊嘅牛肉出前一丁係我覺得佢地最抵食嘅食物。 今日天氣顯然轉冷，晏晝想食碗大飯暖胃，途經上水地鐵站，又未夠鐘做野，本來想去石湖墟食义燒飯嘅我，突然轉軚入左入吉野家。 不嬲都有食佢地嘅大牛肉飯餐，叫嘅時候望倒佢地個温泉玉子嘅介紹相好省鏡，加左隻，收銀話: 『先生HK$42.5，唔該！』突然好感慨，依家食個吉野家套餐都超過40 蚊喇，真係生活艱難！ 温泉玉子牛肉飯餐 雖然覺得吉野家貴左好多，但我依然覺得性價比好高，蛋係分開上嘅，大家睇下碗飯啲牛肉幾咁多，未煮果陣估計有200克以上。佢地用日本面豉做嘅秘制醬汁非常香甜，同牛肉真係天作之合！講下隻温泉玉子先，蛋味好香，但做得就差少少，正宗温泉玉子應該係蛋白形態流質，而蛋黃會熟小小，呢度嘅蛋白唔多夠『流』，效果唔太理想。 上圖係嚟自一家名氣日本料理嘅温泉玉子，大家可以比較一下。 餸講完，輪到啲飯，好香，好滑，好軟熟，好有飯味，高班過街外大部份酒樓同菜館嘅所謂香米好多多多........ 其實碗飯真係好鬼正，特別係天寒地凍嘅日子，好過食件16安士嘅安格斯牛朳。好食嘅原因嘅佢地墊托盤張紙度有答案，牛肉係來自北美嘅穀飼牛，包括安格斯牛種。米係來自中國嘅東北珍珠米，唔好睇少呢隻國貨，我食過日本新瀉米，覺得東北嘅除左細粒過日本新瀉產嘅少少之外，無論軟滑程度同飯味都一啲都唔輸蝕！
感謝 井底龜龜 提供以上資料 井底龜龜 的網誌: http://www.openrice.com/zh/gourmet/reviews.htm?userid=59113883&city=hongkong
|
~END~
人均
$42.50
| 商店 | 吉野家 (港鐵上水站店) |