|
布甸狗cafe香港開喇！
|
|
stellaluk
2015-12-26
1531
4
|
布甸狗終於由日本跑到嚟香港喇！POMPOMPURIN Cafe聽日（21/12）正式開幕喇。 今次食店港式茶樓做主題，更特別為布甸狗設計咗新造型添！淨係門口裝潢已經好靚，入到去肯定會影相影到停唔到手！
3大必試主菜記者已經急不及待搶先試食咗，發現食物除咗得意之外，味道亦好有質素，食完仲有得意布甸狗杯送添！ 今次我哋就為大家精選咗9款必試食品，真係每款都得意到唔捨得食落肚呀！先同你試下3款，造型cute爆燈的主菜先！
1. 布甸狗椰汁雞肉咖喱飯 $99呢隻咁得意嘅布甸狗，係由日本珍珠米加入黃薑粉製作而成，咖喱汁好有質素，好香椰汁味，而且偏甜，
記者食到停唔到口！不過由於要將飯壓成布甸狗造型，所以飯嘅質感比較實， 女孩子們相信食一隻耳仔都已經開始飽，建議大家都係share嚟食。 2. 煙肉蘑菇卡邦尼意大利粉 $149卡邦尼意粉味道差不多，值得一讚係佢有沙律菜伴碟，令到食起上嚟唔會太膩。 而且碟上面呢隻咁得意嘅布甸狗杯，食完仲有得拎走添！不過每日限量送出， 所以想拎走布甸狗杯就要早d嚟排隊喇。$149就有得食又有得拎，推介！ 3. 歡樂野菜拼盆 $139
野菜拼盆同出面嘅All Day Breakfast類似，上面嘅Egg Benidict煮得啱啱好，蛋黃流心，抵讚！唔講唔知， 原來呢個野菜拼盆擺咗好多心思入去，除咗布甸狗之外，仲用咗佢嘅朋友仔Muffin、Scone同埋Bagel嚟做食材添！
4. Bagel特製！班㦸塔 $149班 㦸塔由5層班㦸組成，中間夾住焦糖、朱古力、吉士醬等，味道好有層次，而且份量十足，食4分1個已經好飽！ 記者個人最欣賞層朱古力醬，食落唔會太甜，就算 夾埋焦糖一齊食都唔會太過份， 不過吉士醬食落個感覺就有d似普通cream，冇乜吉士味。另外，除咗前面介紹過嘅意粉之外， 呢個班㦸塔亦都會送布甸狗杯。 5. 記者心水推介！布甸狗芒果芭菲 $119芒果芭菲真係好好好好好好食！特別推介最面層嘅布甸，硬身得嚟又唔會太甜，配合埋芒果雪糕同底層嘅海棉蛋糕， 食完個感覺真係好滿足！而且除咗芒果之外，仲有橙、士多啤梨等等水果，中和返甜品嘅甜味，推介！ 6. 布甸狗吉士布甸 $49得意嘅吉士布甸本身已經好好味好夠甜，個人認為唔加焦糖醬比較好食，加咗反而蓋過布甸味，變咗食緊焦糖醬咁。 不過最可惜嘅，就係呢個布甸杯係冇得外賣拎走㗎，如果想要返個杯，都係要由日本搬返嚟。 7. 布甸狗香蕉焦糖班㦸 $119班㦸食落唔會太甜，加埋少少焦糖醬就啱啱好，而且中間以香蕉隔開兩層班㦸， 所以唔會太膩，不過就略嫌多咗少少cream。
8. 好邪惡！焦糖布甸牛奶 $64呢杯牛奶絕對係記者嘅另一推介，連平時唔太鍾意飲牛奶嘅我都想飲多杯！將最底層嘅布甸味焦糖同牛奶攪勻之後， 味道出奇地夾，而且唔會太甜。加埋面層嘅cream同焦糖醬，真係好邪惡呀！ 9. 熱戀棉花糖牛奶咖啡 $69咖啡面放咗布甸狗同埋Macaron造型嘅棉花糖，夠晒sweet～ 店員話趁棉花糖融化嘅時候飲就最好飲， 不過記者就覺得咖啡嘅溫度似乎唔夠融化棉花糖，所以選擇咗就咁飲。雖然話係牛奶咖啡， 不過味道就偏酸，似齋咖。 提提你：每order一杯飲品，都會送一個布甸狗杯墊，飲完記得拎埋杯墊先走呀！ Pompompurin Cafe （2015年12月21日開業；時間：6:00pm-10:00pm）
地址：銅鑼灣軒尼詩道525號澳門逸園中心B1F
分享自：新假期周刊 |
| 商店 | Pompompurin Cafe |