今次嘅「好友狂嚐曲」系列有少少特別，所謂「好友」喺公關好友，有幸獲邀出席咗最新嘅日本過江龍、東京超人氣伴手禮Tokyo Milk Cheese Factory嘅新店發佈活動，晌東京已開設咗8家分店，而全球首家海外專門店正式落戶香港，自不然會隆重其事。店家實在犀利，一口氣就晌香港開設3家分店，包括西貢總店、銅鑼灣希慎廣場期間限定店（Pop-Up Store）、及率先登場嘅上環西港城分店，不單選址特別，一開就3間，膽色過人！
既然喺新店發佈，店家各款人氣產品一定會全部「晒冷」：艾登芝士蛋糕、牛奶芝士餅、海鹽芝士曲奇、蜂蜜芝士曲奇，晌場內每個角落都有佢哋蹤影，最得意喺唔同嘅產品，都加上唔同嘅配襯嚟突出產品嘅特點。據說西貢總店會偏向田園風格，配合牧場牛乳嘅形象，有機會真喺要入去睇吓。
此外，更晌場中擺設一幅由芝士曲奇、芝士條及多款道具所做成店家嘅招牌標誌，牛頭則變成牛乳牧場，而據介紹整幅圖案中嘅每個公仔、字樣都可以放入口，但做得咁有趣，又點好意思食咗去呢！
原以為嚟到直接試食各款產品，點知店家頗有心思，將芝士曲奇加點小魔法，變成多款派對小食，讓小弟了解到產品嘅可塑性。
的而且確，利用曲奇鹹鹹甜甜嘅個性，配煙三文、巴馬火腿、生果、甚至生薑絲，都有意想不到嘅驚喜效果。
幾款小食中，以巴馬火腿捲住菠蘿（餐牌原先寫喺桃肉）配海鹽芝士曲奇最得小弟歡心，鹹香中湧出一份芝士香味，頗特別。
除咗曲奇，招牌產品仲有兩款蛋糕：牛奶芝士餅及艾登芝士蛋糕，細細個的的骰骰，啱晒三幾個老友共享！
![bowl]() 牛奶芝士餅（Milk Cheese Cake）$180
據店家稱，為求保證品質，暫時每店每日只有限量50個供應。店員介紹，依一款芝士餅喺以法國芝士與北海道牛奶混合製作，上層牛奶芝士慕絲，下層忌廉芝士，所以一個蛋糕食到兩種口感，幾得意，而且，上層慕絲綿滑富奶香，下層則口感實在而芝士味濃。雪凍啲拎出嚟即食，更會有食雪糕嘅效果。
![bowl]() 艾登芝士蛋糕（Edam Cheese Cake）$158
另一款以荷蘭艾登芝士為賣點嘅芝士蛋糕，混入忌廉芝士及檸檬汁以烘焗製作，所以，凍食熱食都得。入口雖然芝士味獨特且香濃，不過，質感有點鬆散，所以，個人比較喜歡牛奶芝士餅。
是晚到訪，除品嚐其獨特嘅芝士產品之外，更收到份意想不到嘅「手信」，就喺印有自己個「嘜頭」嘅芝士曲奇。店內設置一部「影相機」，可以將你鬼馬嘅表情做成貼紙印晌包裝盒同曲奇嘅包裝袋上，非常有趣。只可惜，部機只得今晚放晌度，不過，之後可以透過網上預訂，同樣可以做到獨一無二個人化嘅包裝。
![bowl]() 海鹽芝士曲奇（Salt & Camembert Cookie）$78/10片裝 / $148/20片裝
外層曲奇以北海道牛奶及法國海鹽製成，帶點點鹹味，中間夾住一片金文畢芝士，以為會重鹹味，嗒落又唔喺，反而有啲鹹鹹甜甜嘅感覺，原來就喺店員所指加入白朱古力所做成嘅效果。
![bowl]() 蜂蜜芝士曲奇（Honey & Gorgonzola Cookie）$83/10片裝 / $158/20片裝
另一款嘅曲奇嘅夾心芝士就用咗蜂蜜、古岡左拉藍芝士及白朱古力內餡，搭配出不平凡嘅味道，濃重嘅藍芝士味，又滲出些微蜜糖香，要細意慢慢嗒先出到個效果。此外，咁嘅外形，仲有一種好似食緊「菠蘿油」嘅感覺，當然，無咩油膩感啦。
若想一次過試齊兩款，芝士曲奇禮盒裝就最合你心水，分兩種份量：$153（各10片裝）及$290（各20片裝）。
既然啲芝士曲奇可以有咁多變化，派對一定大派用場，聖誕、新年、生日搞派對時就最啱，就算平時送俾朋友仔，相信人家都會好喜歡！
個人評分
味道：8 /10
環境：- /10
服務：- /10
抵食：- /10
平均每人消費：HK$0（新店發佈活動）
餐廳資料：
Tokyo Milk Cheese Factory
上環德輔道中323號西港城地下4-6號舖
6010 9635
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
