「赤山」主打日式放題，屬街坊放題小店，因為地方唔大，而且，瑟縮晌商場之內嘅幾個鋪位，但意外地都有幾多街坊幫襯。講得喺放題，唔使多介紹，成人$218（+10%）任食兩個鐘（星期五、六、日、公眾假期及前夕收$228 + 10%），小童咩時候都收$148（+10%）。

最大賣點，就喺有任食生蠔，亦喺到訪嘅主因。之前去過啲有蠔食嘅餐廳，散叫確喺唔便宜，雖然自肋餐都有蠔食，同樣，喺高消費場所，依家二百蚊鬆啲，就可以任食，覺得都搏得過。

未講啲食物前，先講吓有咩食，以類別嚟講有天婦羅、一品料理、日式炸物、爐端燒、壽司、刺身、3款新推介，另外有幾款額外付款項目，如海膽、牡丹蝦，就自不然唔會點，反正朋友話依啲都唔喺非食不可嘅嘢。

此外，門口旁及入門口位，放有飲品、冷盤小食及甜品，自取任飲任食。不過，冷盤及甜品放晌個開放式凍櫃，無遮無掩，有欠衛生。

冷盤小食

都喺啲常見嘅款式，如八爪魚、味咐螺肉……等等，老友隨意拎幾小客返嚟作過場，晌好多放題店依類冷盤嘢都喺來貨，所以，味道唔會有太大驚喜。

飲品

一系列「道地」紙包飲品，以及數款汽水，只可以講喺好基本嘅供應，無咩令你想一試再試嘅衝動。反而，外邊有即沖嘅柚子蜜同菊花蜜，潤一潤仲啱我。

刺身

食放題，較回本就喺剌身，所以，第一轉就當然先點，刺身共有9款選擇，有咩款式？影晒成張點菜紙就一目了然，9款選擇其實唔算多，所以索性一次過點晒唔使煩。

9款刺身連埋生蠔一齊上，加上放晌刺身船之上，擺得整齊靚仔，份外有睇頭之外，食慾都增加不少。試勻9款之後，個人以油甘、活鯛、帶子較為出色，鮮甜好味；三文、鮑片、蠑螺依幾款質素都唔錯；較失色喺啲蟹棒，似有解凍未透嘅感覺。

美國生蠔

接住落就自然喺講講啲生蠔，亦喺個放題嘅亮點。其實，啲美國生蠔真喺唔錯，既大隻，色澤顯得新鮮，質感帶爽脆，海水味適中，唔會過鹹，不過，缺點喺開蠔做得唔好，小弟食四隻有兩隻都食到碎殼。

天婦羅

共6款選擇，唔使多講全部點晒。依一環做得有水準，脆漿薄而不油，南瓜、蕃薯都粉甜，海老亦爽甜，唔喺太多挑剔嘅地方。

一品料理、湯麵

湯麵飽肚嘢就無點，而一品料理睇落唔太吸引，亦都無點。

日式炸物

我哋只揀其中兩款炸：北海道元貝及北海道蟹鉗，前者唔錯，幾彈牙，但後者麻麻，唔覺有蟹味，質感亦比較粉。

爐端燒

大家都似乎幾鍾意燒烤嘢，所以，10款選擇中，就點咗其中6款，所以，就慢慢逐樣講。

鯖魚

燒鯖魚唔錯，魚質挺實焦香。

七味虎蝦

雖然話喺虎蝦，但體積又唔算好大，都喺比啲大蝦大隻啲，燒出嚟嘅效果亦一般，肉質有點實。

羊鞍

依個就非常好食，燒得焦香，入口肉質頗嫩滑，又富肉汁，燒得啱啱好，少少羊羶味，相信大部分人都接受到。

汁燒可樂骨

可樂味就食唔到喇，不過，汁燒得嚟都好惹味，豬軟骨又入晒味，鬆鬆軟軟，唔錯唔錯。

汁燒牛舌

同樣以汁燒處理，所以，香濃惹味，不過，個人就覺得啲牛舌過腍，失咗牛舌嗰份煙韌感。

芝士年糕

大大件年糕燒得暖暖，口感軟綿綿，如果糕內加重多少少芝士味道就更突出。

壽司

既然湯麵類都無點，壽司都算喺易飽肚嘢，就自然唔點，上載張點菜紙，等大家知道有咩選擇。

濃湯野菜浸什菌

喺點菜紙中新推介之一，不過幾款新推介都唔喺好有特色嘅嘢，還好嘅喺依道浸什菌個湯底確喺幾濃香，令個素菜一啲都唔淡口。

甜品

上文都講過，近門口嘅凍櫃及門外個雪糕櫃就喺甜品嘅所在地，好老實，真喺一啲都口吸引，涼粉、凍綠豆沙、啫喱、綠豆薏米、雀巢雪糕杯。

最後食完堆熱嘢，都喺貪口痕，食咗啲雪糕；反而，老婆話啲綠豆薏米幾好食喎。

整體上，食物嘅類別如市面好多放題店咁，嚟嚟去去都喺嗰啲，就算有幾款新推介，亦未見有咩嘢好突出。而且，咪睇小甜品、飲品，往往為啲放題增值不少，可惜晌度依兩樣都無，反而更顯得屋村水平。加上位置吊脚，較難吸引區外客，嚟幫襯嘅相信都喺區內客同附近返工嘅工友居多，客源窄，鬥平鬥賤價無意思，要做大個生意實在要再花點心思晌食物嘅款式上。

個人評分
味道：6/10
環境：6/10
服務：7/10
抵食：7/10
平均每人消費：HK$240

餐廳資料：
赤山日本料理 Akayama
新蒲崗崇齡街新蒲崗廣場2樓C38舖
2267 7913