位於荃灣海壩街的「荳子 Beans 」由2013年年尾開業至今，其實小妹已幫襯過無數次了。餐廳由從前的一個較小的鋪位，到現在擴張至隔離鋪，小妹都繼續有幫襯。相都影了一堆，就是一個懶字，一直都未有在這裡分享過，所以今次的食文分享都會沿用返以前影落的一些相片，所謂「用得唔好晒嘛!」。

↑相片係餐廳剛擴張個時影的，原先個張因為入黑影反晒光，所以都係拎返舊相出黎用

仲記得「Beans」新開張時，每次經過都見到長長的人龍，個時唔想排隊，就為有等佢差唔多開鋪時排定隊。不過近年人流開始緩和，人龍沒以前的誇張，這樣便可以得閒去嘆返杯咖啡了，還有最重要係這裡沒有用餐時間限制，是小妹喜愛這裡的另一個原因! 雖然兩個鋪位都係同一間餐廳，但都係分開兩條龍黎排的。剛好到我地的時候得返對外的吧檯位，不想再排便坐吧。

餐廳的環境以木紋為主調，簡約舒適，看到最前方的開放式廚房，旁邊更設有蛋糕櫃，坐位多以二人坐位、向外的吧檯位、及一張大長檯為主。

以下兩張都係之前幫襯時影的

「Beans」以輕食為主打，主打供應全日早餐、小食、意粉、甜品和咖啡等。咖啡更可選擇要立體拉花呢 (但不能自選圖案)，所以都吸引了不少人來潮聖。而就算是普通拉花，圖案都拉得頗清晰實淨，頗美的!

甜品方便見到他們的出品愈來愈細緻和漂亮，包括近來推出的一系列綠茶甜品，真係睇見都想食，可謂越戰越勇! 而鹹食方面都叫做一直保持到水準，值得一讚!

伯爵茶拿鐵 $27 (原價$35，跟餐-$8)

大部份的拿鐵都可指明要立體拉花啊，不過等的時間就要稍耐一點。

每次黎這裡都忍不住會點立體拉花，一望到可愛的拉花就會感覺身心特別放鬆呢，真的很療瘉系啊。這裡大多數的拉花都是可愛的小熊和貓圖案，也有次試過得到走樣版既米奇拉花，真係唔知好笑定好嬲。所以感覺到他們的立體拉花唔係每次都保持到水準，要睇睇拉花師傅的心情和運氣吧。

講返杯拿鐵吧，這次得到浮在杯子上的可愛小熊拉花，面頰還有粉色作點綴呢! 拿鐵入口順滑，帶有濃濃的伯爵茶香，不錯!

小食拼盤 $98

這一份小食拼盤包括左啤酒洋蔥圈、肉醬薯條、焦糖雞翼和香辣雞翼，本身雞翼仲有一隻孜然口味的，餐廳話客人可在三款口味內選兩款喜歡的也可。

啤酒洋蔥圈和肉醬薯條都炸得熱辣辣，食落脆口不油膩，肉醬的份量給得滿多的，還有些芝士在內，我倆都食得津津有味!

孜然和焦糖單骨雞翼，每款味道有4條單骨。其實三款味道都好食，不過小妹就至愛焦糖雞翼那股香甜的味道，又帶少少脆口，每次黎到都會叫返份。

黑松露軟殼蟹意粉 $95

喜歡這裡的軟殼蟹意粉，已經黎食過三、四次了。意粉收汁的情況剛剛好，不會太稀和太杰，入口有好重的松露味啊，裡頭也放了滿多蘑菇片。面頭還有兩三件炸得夠酥脆的軟殼蟹，好味!

焙茶燉蛋 $52

用上小木砵盛載的焙茶燉蛋，客人落單時才放上紅豆茸、麻糬、鳥結糖和黑白芝麻脆片，視覺上很豐富呢!

焙茶燉蛋面層用火槍輕輕噴過，食落帶微脆，燉蛋質感好細滑，幼嫩的質感，帶有陣陣焙茶的甘醇味，味道有驚喜。另外所配的鳥結糖和麻糬，這樣的配搭還滿特別的，麻糬食落煙煙韌韌，好喜歡呢。

荳子 Beans

地址: 荃灣海壩街99號地下

(港鐵荃灣站 A1 出口, 步行約5分鐘)

電話: 5537 7465 / 2205 1911

營業時間: 星期一至日: 11:00-23:30