出去散步到差唔多天黑我哋就回程返酒店了，冇乜街燈，又有啲狗走嚟走去，都有啲怕怕～

回程經過社區會堂，原來有慶祝國慶嘅活動呢，望一望裡面，好似擺咗好多圍，應該有晚餐聚會又有啲表演睇下咁，好熱鬧呢～

我哋返房休息一陣就出去酒店嘅餐廳Tai O Lookout晚餐啦﹗餐廳係玻璃屋，係舊建築嘅天台上面加建，整個餐廳天然採光，又可以睇到海景，加上枱椅有啲距離，叫人坐得好舒服～餐廳見我哋有未識自己坐嘅BB同行，俾我哋坐咗卡位，都好丫～:D

點知⋯坐低冇耐曉就開始喊﹗係喎，你要開餐了，五個幾月嘅曉開始食固一排，仲未代到一餐，暫時都係先奶後固，要食啲奶打打底先，冇咁餓先有心情試固體食物～day拿拿聲急急腳幫我返房拎番條圍奶巾先～

曉打一打底時我哋嘅前菜亦嚟咗了，好靚丫～而家隔咗咁耐先打番blog(已經係兩個幾月後了⋯)，都唔係記得太清楚食咗咩同埋啲味道⋯^^"不過記得最右邊嗰個係煎鮮鮑魚，又嫰又鮮味，我哋當時講過，新鮮鮑魚好味過乾鮑咁多，點解乾鮑咁貴呢？另外中間嗰個好似係花膠凍，左邊嘅係咪芝士？未至於驚為天人，但樣樣都幾好味嘅～

好啦，輪到你啦﹗而家可以食成大碗粥嘅曉(差唔多八個月了)，當時食呢啲細細樽babyfood都食唔晒呢，比較起嚟變化都真係好大﹗而家俾佢食肯定唔夠飽啦～

當時嘅佢都好享受嘅，不過口仔未合得好叻，成日都出晒界～hee～

龍蝦湯好香濃呢～

兩款主菜係牛扒同埋魚柳，我哋習慣都係share食啦～曉出世之後好耐冇試過咁樣係西餐廳度食全餐了～

嚟到甜品冇咁手忙腳亂，搵侍廳幫我哋影張一家三口合照﹗曉唔望鏡頭都唔奇，但奇在⋯點解影到歪晒？﹗>.<"

day嘅餐茶揀咗熱咖啡，我就特別啲試咗佢嘅洛神花茶，可以自己加蜜糖嘅多少，唔咁甜酸酸地都幾啱食飽咗飲～難得地Macaroon好好味呢，好多時食都覺得太甜，呢個外脆內軟都算係食過數一數二嘅好味道～

奶凍上面仲有燕窩呢，更加矜貴了﹗

呢個晚餐已經包括係訂酒店嘅package入面，價錢甚麼都可以唔駛理了﹗雖然味道冇話特別好，但餐廳好舒服，食得好愉快，day生日晚飯開心嘛？

我哋食飽飽返房就係沖涼嘅時間了，開頭見有個靚靚大浴缸，諗住可以好開心兩母女一齊浸浴，但事情唔係想像中咁順利，係曉曉係陌生環境沖涼怕怕，大喊特喊，都唔知有冇嘈到隔離房，所以快快脆脆沖完就算，而且冇帶bb沖涼液來，沖得好似都唔係好乾淨咁⋯爸爸湊住曉我可以照浸浴？哎吔，第二個問題對我嚟講更嚴重，因為⋯原來呢度係郊外，好多四腳爬爬﹗﹗﹗好驚呀～～～～浴缸嘅左邊一條、右邊一條，我係前所未有地沖得咁快囉，雖然係bb四腳蛇冇乜殺傷力，而且媽咪從小教導我，佢哋係益蟲，我哋要和平共處，但好驚佢哋越走越近，呢個涼完全冇享受囉⋯>.<“好可惜丫～係咪佢哋鍾意潮濕？房間入面嘅四腳蛇就爬到好高，唔似浴室嗰啲咁近，遠離我就ok，你哋慢慢enjoy～

好在床好大好舒服，曉係生保床都瞓得唔錯，希望遲啲一月去旅行時都乖乖瞓覺啦～

前往其他香港遊樂blog

分享此文：

• Twitter
• Facebook

請按讚：

Comments

comments

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================