雖然話零售市道差咗，又話步入寒冬，不過，眼見今晚幫襯嘅客人都唔少。就算過咗飯市，都仲陸續有客人嚟食甜品。當然，食物有水準，就不愁無客，亦喺做生意長遠之道。

因為餐廳一邊堂座採半開放形式，所以，晌商場外已可以睇到室內環境。整間店一室光猛醒神之餘，天花五光十色嘅圓燈，令餐廳更富時代感。

餐廳頭尾牆上掛有嘅日本和服及應是西陣織之類嘅飾物，都喺店中較具和風嘅裝飾，不過，嗰套紫色嘅和服，實在搶眼。

食物選擇方面，細餐牌喺散點菜式，簡單嚟講已包括有烏冬、意大利粉、咖喱、飲品、甜品，尤以甜品嘅種類及款式之多，就明白點解飯市後仲咁旺嘅原因！

而大餐牌原來喺以套餐為主：烏冬甜品餐、飯麵甜品餐、午餐、蛋糕茶套餐……等等。

店員見我哋研究咗餐牌好耐，提議我哋試吓佢嘅海藻烏冬配甜品特價餐，只賣$99 + 10%，就有一客麵類，配一件甜品及一杯指定款式高級斯里蘭卡紅茶（註：餐牌無提，原來咩套餐都多配一客生菜絲沙律），仲喺全日供應。老實講，以尖沙咀區大商場而言，的確超值，加上又有我哋想試嘅海藻烏冬，唔使多諗，先嚟一客依份特價餐。

醬油海藻烏冬麵

麵類8揀1，有烏冬，有意粉，我哋要咗既簡單又傳統嘅醬油湯底海藻烏冬，晌散點嘅餐牌見到單單一客都要$74，所以，個特價餐喺咪好抵呢！咪以為得淨烏冬，仲有兩片叉燒、筍乾、鳴門卷、粟米同蔥花，初時望落仲好似細細碗，撈起有幾多烏冬麵。海藻烏冬食起嚟味道又無話好特別好特別嘅感覺，但口感仍然好滑溜，混入海藻，點都覺得健康啲，哈哈；而叉燒多肉少肥，較啱我哋口味，入口亦算鬆化，筍乾又帶點爽脆，醬油湯底亦不俗，清甜不膩，整體就喺一碗健康嘅烏冬麵。

想抵食，自然繼續向套餐進發，飯麵甜品餐就正正有多款選擇，咪會錯意「飯麵」就喺指一喺要飯，一喺要麵嘅套餐，其實喺一客細飯，再加一客細份海藻烏冬麵，配一件甜品及一杯指定款式高級斯里蘭卡紅茶。我哋所揀嘅京燒銀鱈魚飯套餐，都只喺賣$140 + 10%，實在又喺另一超值之選。

京燒銀鱈魚飯

餐牌禁明使用秋田米，雖然，無可能一入口就分得到咩米，但飯粒軟熟煙糯，口感不俗；兩大件銀鱈魚，既有油香，淋下醬汁，及灑下芝麻，好食！

海藻烏冬麵
湯底比起上面個醬油更清，烏冬麵質卻保持滑溜，細細碗，但拼埋個飯，實在好夠飽。

生菜絲沙律

簡單嘅生菜絲、甘筍絲、粟米粒及車厘茄，拌點黑醋，酸香開胃。

草莓香紅茶

每款套餐都包一杯高級斯里蘭卡紅茶，雖然共有4款，但每日都只供應其中一款。今晚有幸試到嘅喺草莓香紅茶，茶底清幽，細味下有少少士多啤梨果香，雖然唔重，但徐徐滲出，感覺舒服。

草莓小蛋卷、抹茶小蛋卷

「宏」嘅蛋卷的確做得出色，無論草莓，還是抹茶，海綿蛋糕部份做得鬆軟有彈性，中間嘅忌廉又夠輕柔，少甜更喺現代人嘅喜好，而草莓小蛋卷中間嘅士多啤梨果肉好清甜，而抹茶小蛋卷嘅抹茶香味突出且幽香。

不過，套餐所包嘅蛋卷喺「小」型份量，食完都仲喺有啲意猶未盡，所以，我哋再追加一客店中嘅甜品推介，一於搜「茶」到抵。

京都宇治抹茶軟雪糕芭菲 $88

食吓食吓先知個軟雪糕芭菲有咁多嘢，自家製嘅抹茶軟雪糕非常香滑，抹茶味濃郁；配料仲有紅豆、抹茶羊羹、團子、蛋白脆餅、杏仁片……等等，口感豐富，好鍾意羊羹依種古老和果子嘅口感，軟軟韌韌，亦鍾意團子嘅咬口煙糯。

匆匆趕去餐廳，臨走時先發覺有唔少產品仍外賣，如：蛋卷、個裝蛋糕、件裝蛋糕、杏仁蛋白餅（馬卡龍）、曲奇、餅乾條、煎茶，以及在餐廳內食到嘅海藻烏冬麵，所以，就算唔入內幫襯都可以睇睇有咩啱買買走。

如果話今晚餐飯好味到暈，未免有少少誇張咗啲啲，但主食、甜點都做得甚有水準，加上環境舒適，唯一喺晚市有時限要求，食餐飯當然問題不大，但打算同朋友會傾得耐，就要有心裡準備需按時交枱。

個人評分

味道：8/10
環境：8/10
服務：8/10
抵食：8/10
平均每人消費：HK$180

餐廳資料：
宏 Hiroshi
尖沙咀彌敦道100號The ONE 5樓502室
2737 2665