|
陪你倒數
|
|
技巧樹熊
2016-01-09
266
0
|
分享
收藏
今年的除夕，沒有酒精，沒有慶祝什麼，沒有倒數party，我決定，乖乖的和媽媽倒數，食餐簡單的飯。 做了三十多年人，除夕除了有次和她在前女友家打邊爐外，很久沒有陪過媽媽，難得她也是放假，一於和她食飯，做過孝順仔。 如果有印象記得，她是特別喜歡吃韓國菜，當然，為了佢喜歡又不會投訴，選她喜歡的就最好，而害怕係呢啲特別日子，唔同餐廳會有乜乜乜乜的特別餐，食得最開心就係任食，我當然唔會去那些滿佈紅肉梨乜韓乜的任食場，在網上見到有間任食年糕和麵食的BBQ The Military 新店，仲要新張推薦期間買一送一，平到咁，好難唔引起我的興趣試吃一下。 不知你有冇聽過呢個大鴻輝中心?從GPS上看，我真係唔知原來就係以前的英皇，在這附近找了一會，問人才知道，原來英皇已經改了名。 可能是明天假期的關係，也可能是食肆太多了，這裡排隊搭電梯都好多人，幾個蛇餅一如以往是常識，幾經辛苦排隊排左幾十分鐘排電梯才到了這裡，BBQ The Military X Norayo The Tteokbokki! 原來這裡都是BBQ7080的朋友，佈局是典型的燒烤場，枊暗花明又一村，另一邊燒烤外就係任食的像鍋隊般的打邊爐，除了韓國現炒年糕，還有好多不同的食物任你選擇。 最開心應該係黎食野嘅女人，呢度差唔多全部侍應都係Oppa，總要都幾靚仔，不過佢地服務唔係唔好，不過好似做唔切，好似做得好辛苦咁，有心無力，大媽見到實我見猶憐，可能都係似韓劇時間動作都較慢一點，但係呢啲小鮮肉慢慢執枱捧餐又真係幾適合大媽或女人慢慢欣賞。 The Tteokbokki提供了八種不同風味的醬汁，當中以辣為多，由於表妹都有來的關係，選了少辣的蕃茄汁為主，但原來蕃茄汁的風味都有少少的辣，切合韓式風格。 我今晚最開心唔係見到芝士，唔係見到韓國公仔麵，唔係食到唔同樣嘅年糕，反而係呢種韓式魚蛋，之前係濟洲見過，吃過覺得難忘，就咁食得，然後點湯食又得，得左，想像不到竟然係呢個任食場見到，任食情況下食左好多好多串，好受歡迎的情況下人人攞到出邊經常無貨，是必搶item。 這裡其實主角係年糕，年糕有幾種不同款式，睇過openrice 知道其實應該有更多選擇，但係原來有隻好正有餚料係裡面嘅年糕銷量太好，今晚無左貨。今晚食唔同年糕其實味道差不多，形狀不同，吸收蕃茄汁同辣度的程度都不一樣，雖然我不特別喜歡年糕，但這裡的都不錯幾好食，煙煙韌韌，難得是個個都喜歡，這個主角陪你倒數，大時大節，不一定大魚大肉，簡單吃下都高興，最重要是和家人一起是最窩心。 麵其實本身有十幾種，但係今晚只得三隻，其中一隻最出名係薯仔麵，食親韓國野一定會有呢隻麵，最好食都係呢隻，最正係放埋芝士落去，配合鍋裡面嘅蕃茄同類似鍋隊鍋的一點點辣，惹火又滋味，欲罷不能起碼食幾個麵。 還有我覺得好食係呢個睇樣估不到是什麼的東東，炸粉絲卷，上次吃過類似食品係Goobne chicken ，用紫菜包著粉絲可口又美味，如果你像媽媽喜歡熱氣食物，準是沒錯的。 其實呢度仲有好多任食的食物，菜都有好多種，冇想過菜有好多偏向香港人口味的，魚蛋，腸仔，冬菇，蘿蔔，龍蝦丸，金菇，西洋菜，韮菜，無論你是韓國大媽或香港大媽，一定會適合你。 還有這裡的韓式茶，入口甘香，最適合熱氣飲多兩口，好過飲水。 沒有想過飯團也可用作部隊鍋，看電視知道佢地推薦咁食，放入油壓兩壓，加上那些碎碎的紫菜，麻油香勁重，加上每粒飯都沾上那醬汁，混合起來好美味。 吃了個多小時，非常飽又非常滿足，最重要係埋單時候，我們四個人只係四百蚊到，即係一人一百，聽說原來新開張期間買一送一，咁平咁抵食，仲要大時大節，多謝朋友的推薦，後來再講番原來佢係BBQ7080 fans，她說這個優惠做到1月10日，如果有時間，一定可以去多次。 表妹絕對就好似G dragon 跳舞一樣咁快，見平到咁佢已經同班韓迷學生妹一齊book左位，後生，真係唔同啲。 係我還在計算食左好多年糕的倒數晚上，她已經準備再吃另外一次年糕，又再倒數佢朋友個生日了.... 我卻還在寫文同自己回憶2015最後一餐，原來2016已過了一個星期，光暗似箭，遲來的還想說句，新年快樂。 Norayo The Tteokbokki 荃灣眾安街55號大鴻輝(荃灣)中心18樓
感謝 技巧樹熊 提供以上資料 技巧樹熊的網誌: http://www.openrice.com/zh/gourmet/reviews.htm?userid=718688&city=hongkong
|
~END~
人均
$100.00
| 商店 | BBQ Military (BBQ 7080 荃灣店) |