|
一刻觸感 * 勾起濃濃回憶
|
|
mohkc
2016-01-12
327
0
|
分享
收藏
中學時期，家規比較嚴厲，放學後就要盡快回家，不得到旺角去，有一次搭小巴經過，先見到朗豪坊嘅雕像有幾咁高大，有大排長龍嘅章魚燒店，好想大個幾年可以同同學放學行吓，係一種免費娛樂同樣又最值得掛念。 高中後，認識了其他學校的朋友，因為地區不同，要約見面就會係假日，一啲活動過後，緊係一齊食飯繼續傾，而個陣又想扮大人，就揀咗好多人去嘅一間拉麵店，我同幾位朋友買單時先知，餐廳會有加一服務收費，10%即係每十蚊消費就加一蚊，原來原始 哈哈。 到今日，拉麵店都係充滿回憶嘅地方，咩心情都想嚟重溫一下，睇到instagram blogger介紹呢間豚道樂拉麵店，荃灣區嘅朋友食個都覺得好值得推介，就黎試吓啦！ 去到餐廳，特別會留意佢哋準備比客人嘅儲物方法，特別係香港地舖租金昂貴，係窄少空間要做到方便有實用嘅真係唔容易，而餐廳高枱位有兩款大牌子叉電器，又有wifi可以一邊睇片食拉麵，座位旁邊有小鐵鈎，可以放個手袋，又可貫徹工業味風格！ 餐廳無加一收費，每逢星期一至五12:00-3:30，凡穿着校服學生惠顧拉麵及飲品，都可享有八五折！另外會定期更新節日限定，為食客帶來驚喜！ 特上海老湯拉麵 $98 睇過一套烹飪做主題日本電視劇，兩位廚師比賽，要做好嘅晚餐比餐廳店員食，一位煮嘅面恰到好處，軟硬適中係滿分嘅作品，另一位得特意將麵條煮得淋一啲，令經過一日疲勞工作嘅同事，可以舒舒服服食一餐。呢個小小嘅舉動令他得到冠軍，之後我都會選擇比較淋嘅麵。 拉麵送上時，大家可以先試一啖湯底，溫度就最適合，味道濃郁感覺厚身，而海老湯拉麵喺星期六、日供應，蝦湯再加入蝦油、櫻花蝦，令蝦味濃郁。揀咗曲麵，口感彈牙，豬腩肉半肥半瘦，油脂香氣吸引，肉質比一般店都滑，經過燒焦特別吸引！ 餐廳兩位負責人係日本留學時候認識，喜歡日本文化學習日文，留下一年多嘅時間係大阪跟拉麵師傅學習，將原汁原味帶到香港，其中一位從事設計工作，所以餐廳嘅環境裝修都好別緻，所有掛飾裝飾品都用細個"玩"做靈感，有滑板、木球等，仲用鮮紅色貨櫃做洗手間，成為店內特色嘅裝置。 紫菜 $8 另外點左紫菜，將佢放湯，吸收埋剩返嘅精華，特別係海老湯底，食完拉麵仲有啲櫻花蝦乾，用紫菜配埋又有咬口。 一口氣食清乾！ 餐廳係正巴士站對出，行過小公園就到，都好方便會再有下次，試埋其他口味嘅湯底 嘿嘿 豚道樂 Butadouraku 星期一至五: 12:00-15:30; 17:30-22:30 星期六、日及公眾假期: 12:00-22:30 荃灣大河道63號卓明大廈地舖 Tel: 3956 9163
感謝 mohkc 提供以上資料 mohkc 的網誌: http://www.openrice.com/zh/gourmet/reviews.htm?userid=717759&city=hongkong
|
~END~
人均
$98.00
| 商店 | 豚道樂 |