|
友聚。陸陸雞煲+Pacific Coffee吹水
|
|
Yanomi
2016-01-20
567
0
|
分享
收藏
1月15日(Happy Friday)~好早前...暫定左依日同baby笠食飯 諗住飛起二個男人..2個女人仔可以好好傾下計~早幾日回港 等星期三得閒d~再問問飯局係咪ok? 仲搵定去食"陸陸雞煲" 不過baby笠近排有私人野攪~所以話未肯定出唔出到黎食飯 最遲要依日16:00先覆到我~咁我都訂定檯..食唔到就由佢呢 朝早同老闆飲茶+四圍行下~就返屋企休息! 諗住飯局唔成 都係同老闆係附近食雞煲~最終16:00 baby笠覆我話ok 飯局如期進行~約佢18:15係旺角地鐵等..再一齊行去食店 * * * * * * * * * * 打去"陸陸雞煲"訂檯..話2人限食1.5hrs~反正食完去cafe坐 無所謂啦! 剛坐底都未放好手袋..職員就催我地點左雞煲先 我話等陣先..轉頭點!真係轉個頭又即刻黎催我地點雞煲(唉!) 我地點個"例牌雞煲(小辣)"($148)~雞煲送上後 阿姐開蓋準備攪拌~我話唔好攪住..影張相先 佢竟然話..面頭得菜(定唔記得話綠色)有咩好影 攪拌完再影一張..開始可以食! 雞煲的確係好味 麻辣醬汁底好濃郁夠味~雞件走過油..皮層焦香帶微脆 小辣食唔到辣~麻味就越食越出~條脷麻到d細胞不停跳躍 雞件用最慢火heat住..無咁易老+鞋口 食到咁上下..叫baby笠點定火鍋料~不過唔好點菜 因為菜好吸辣~見雞煲食剩2件雞..叫阿姐加湯轉食火鍋 佢話夾埋2件雞再加湯~最尾講句..食埋火鍋8點交檯 我同baby笠打個突..望下錶只係7點(催完落雞煲..7點就催8點交檯) 火鍋料.."鮮鵝腸"($70)~輕灼進食..質感爽口 "陸陸六寶丸"($80) 有潮州魚蛋,貢丸,龍蝦丸,牛筋丸,墨魚丸,墨汁丸 整體丸類無驚喜~普普通通 "水餃"($40/8隻)~餡料唔算豐富..味道普普通通 19:40仲有4隻餃子~阿姐黎收碟..話倒埋d餃子入火鍋 我話未必食得晒~佢話食唔晒都無辦法..唔會要(我知唔會要) 再話..8點夠鐘交檯~我真係覺得好煩..不停催不停提住交檯 總之夠鐘我就會走啦~唔駛下下係咁催住呀! 19:50都未食完..張單送到叫我地埋單先~話8點交檯有85折 我真係想問..唔要85折係咪可以繼續坐? 真係食餐飯好無癮 埋完單即刻送埋2粒"雪糕糯米糍"~20:00我起身著外套 阿姐問..係咪可以收檯d野~下一張準備入座~我真係好鬼滾 我話..收啦! 收啦! 由7點催我地交檯催到8點(足足講左2次..真係好嬲) 老實講..食餐飯係咁不停催趕~我唔會再幫襯囉(總消費:$318) 之後轉場去朗豪坊Pacific Coffee坐 因為無食菜..想飲果汁中和下 baby笠又比零食我..話幫手清~一睇就知包榛子夾餅特登買啦 因為我講過好食~味道比較甜..但送齋啡真係一流(多謝晒笠子33) 依道坐得好舒服..傾傾下baby笠聽電話~我望下錶21:45(好早啫) 之後再傾傾傾..老闆line我地話Goodnight~原來23:07啦(哈哈) 傾計既時間唔覺又過左~其實仲未傾夠! 不過太夜要走啦 上到去見保安都鎖剩一隻大門(哈哈)~依晚傾得好開心 希望好快又可以再出黎..一齊飯聚再吹水啦!(奸笑)
感謝 Yanomi 提供以上資料 Yanomi的網誌: http://www.yanomichung.blogspot.hk//
|
~END~
| 商店 | 陸陸雞煲火鍋 (旺角奶路臣街店) |