|
何洪記 Ho Hung Kee：洪心壯志
|
|
山區麵包王
2016-01-13
1118
0
|
分享
收藏
希慎去得較多都應該喺誠品，不過，小弟自問唔喺文青，肚內半滴墨水都無，死剩把口，但講嘢唔叻無口才，淨喺識食。今晚嚟到何洪記，試試米芝蓮一星嘅麵檔喺點？
要做到一星，食物質素好故然重要，但環境一環亦無怠慢。一室潔白光猛，雲石餐枱，湖水藍燈籠吊燈，清雅柔和，打破麵檔傳統模樣。
雖然以雲吞麵起家，但到依家已經非簡單只賣碗麵，有粥粉麵飯、腸粉、點心、廚師推介（小食）、糖水……等！主餐牌印刷精美，中英日文對照，依家咁多韓國人嚟玩，唔知將來會唔會加埋韓文，部份菜式圖文並茂，順帶一提，晌度食嘢唔同出面普通麵檔啊，收茗茶每位$3，另加一服務費，但凡惠顧飲品，可免茗茶費。
好多人都會揀食乾牛河，因為算喺招牌之一，但少弟近排食得油膩嘢多，所以，大膽試試佢嘅沙嗲牛肉炒河。雖然喺「濕炒」，但一樣做得有水準，河粉唔會黐埋一炷，兼有炒嘢嘅鑊氣，沙爹味香濃而帶有辣勁，頗惹味，牛肉腍滑，卻無嗰種用鬆肉粉「瘌」到散嘅感覺。
再嚟多碟炒河，真喺「河」去「河」從，同樣，河粉炒得夠晒鑊氣，個蛋漿茨做得既香且滑，而啲蝦仁又大隻，又鮮爽，用料絕無欺場。
咪睇佢個樣好似杯清茶咁，查實真喺好清潤，充滿冬瓜蜜嘅香味，飲落非常潤喉。天氣乾燥嘅日子，就最啱喇！
要再潤啲，又唔介意俾多啲啲，依碗南北杏清炖雪梨糖水就最好不過。清澈嘅冰糖糖水，滲出雪梨嘅自然清香，甜蜜滋潤，南北杏又有潤肺止渴、化痰止咳嘅功效。
晌何洪記食嘢無疑消費高，但除環境雅致，服務熨貼之外，用料嘅質素都可以晌每道菜式中反映出嚟，所以，都可以講喺物有所值！
個人評分
味道：8/10 環境：8/10 服務：8/10 抵食：7/10 平均每人消費：HK$120
餐廳資料：
何洪記 Ho Hung Kee
銅鑼灣軒尼詩道500號希慎廣場12樓1204-1205號舖 2577 6060
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | 何洪記 (銅鑼灣店) |