|
極好味，創意十足日本餐廳
|
|
kelvinfoodki
2015-12-26
398
0
|
分享
收藏
係中環新開業既日本餐廳 - 馥 foodki認為食物質素真係極高，除左傳統既日本料理，foodki最欣賞既係佢地將好多新既元素融入日本菜。味道絕對一流，創意都值得欣賞。 店內主廚主理懷石料理超過35年，將京都美食完完整整帶到香港。而且佢地既食物都來自日本馥既食物都每日空運到港。勁正 勢子蟹 $160 一道傳統懷石料理菜式。先拆下蟹膏、蟹子及蟹肉，然後放在蟹蓋吃，大量蟹子真係滿足度爆燈，配上土佐醋啫喱，以啫喱既原因係避免醋過酸，影響蟹肉鮮甜味，入口帶微酸，蟹肉新鮮無比。令食客食指大開，亦非常適合作為前菜。表面加上金箔，黑松露同青蘋果，望落去更靚亦非常好食。 湯葉海膽 $160 超鮮甜肥美湯葉海膽，一啲都唔腥，底層有好似腐皮既豆腐，入口滑溜無比。作為前菜確實蠻開胃的。 特選刺身拼盤 $588 刺身拼盤有青森左口魚，愛媛油甘魚，長崎拖羅，鯖魚，牧丹蝦，赤貝，帶子，宮崎金目鯛。店員哥哥教大家由淡味開始食起。左口魚肉質結實，口感帶點韌韌的，味道很清甜。帶子實在太好食，入口爽口嫩滑，大大粒都完全覺得唔夠食。牧丹蝦色澤光鮮，透出點點光芒，入口爽口，蝦味濃。 FOODKI最滿意，不得不提好好食既拖羅。食刺身係無可能唔食拖羅既。拖羅魚脂好似似正好靚好明顯，細望會見到遍佈純白色既脂肪絲。優質拖羅望落好似和牛咁好食，夾起來肉質結實，入口油感脂肪味重，真係入口即溶。 整個刺身拼盤極為新鮮，以呢個價錢食到，確實物有所值。 豬腩肉生薑燒套餐 $288 來自岩手縣既豬肉配上生薑，係一道幾傳統既日本料理。肉質非常嫩滑，生薑將豬肉的膻味完全消去，確實美味。食左唔少凍野，食番呢道熱辣辣既豬腩肉套餐，真係感到特別溫暖。 銀鱈魚西京燒套餐 $268 foodki非常鍾意呢個銀鱈魚。銀鱈魚煎得恰到好處，味道鮮甜無比，配上店方特製既白麵豉醬，同銀鱈魚又夾又好食，真係嫩滑無比。 鵝肝 $298 foodki 最鍾意食呢到既鵝肝，來自法國鵝肝真係極級好食。鵝肝本身質素極高，表面煎香脆可口，入口即溶，脂肪味極濃！但最正最正既地方在於佢地選用左用梨製成既醬汁。醬汁消除左鵝肝入口過膩既感覺，竟然帶出少少清新既味，真係喜出望外，絕對必食之選。 配上青蘋果乾，更中和鵝肝油膩感 可看清楚鵝肝裡的脂肪是多豐富吸引，真係口水都流曬出黎 壽喜燒風照燒日本黑毛和牛西冷伴溫泉蛋 $488 牛肉燒到4成熟，清楚見到入面嫩紅既肉，望一望都覺得好食。入口極嫩滑，肉質鮮嫩無比，雖然無問到黑毛和牛係咩級數，但食落去都知道無A5 都必定 A4 架啦。 肉質上佳，和肉點上半熟溫泉蛋，濃郁蛋味令黑毛和味道更鮮更可口。 鰻魚釜飯 $488 鰻魚釜飯foodki就比較失望，鰻魚皮燒得有點過硬。可幸鰻魚質素極高，表面雖有過硬，但魚肉肉質依然滑嫩，而且鰻魚汁撈飯可以話係人間極品，唔洗幾分鐘，我地就清左成個鰻魚飯。哈哈，好食 精選壽司拼盤 $598 大拖羅，鯛魚，金目鯛，左口魚，油甘魚，鯖魚，深海池魚，海饅魚，三文魚子，海膽，燒拖羅。 魚質上佳，師傅功力了得。好好味既壽司就完成。壽司酸度合適。每款魚亦有其特色，而壽司新鮮才是重中之重。 最滿意亦不得不提大拖羅。大拖羅即吞拿魚前魚腹位置，油脂味極濃，入口油脂味遠遠不能四散，真的極為滿足 十月開始係三文魚子當造既季節。每粒魚子晶瑩剔透，放入口，我只能食用食神瀨尿牛丸的感覺黎形容。＂從來冇試過有咁清新脫俗既感覺，魚子既鮮、壽司飯既質素，溝埋一齊既味道竟然比老鼠斑有過之而無不及，簡直比我既初戀更加詩情畫意，所謂「舉頭望明月，低頭思故鄉」，好詩！好詩！＂哈哈，無聊話講完，三文魚子質素確實夠好味。海膽滿滿亦非常好味，鮮甜無比。 日本時令雜果 $268 馥時令雜果，包括由日本空運到港既靜岡蜜瓜，福岡士多啤梨，梨，等等。每款水果都水份極之充足。由其靜岡蜜瓜入口極多水份，鮮甜蜜瓜香係其他產地的蜜瓜絕對不能比擬。 綠茶餡蜜 $58 綠茶熱潮係香港一直都無任何退卻既跡象，馥既綠茶都非常好食。軟雪糕質地較挺身唔易溶，亦都幾滑，白玉好煙韌，簡單配搭，絕對係比食物質素。全部食物都來自日本既馥真係無得輸 北海道牛奶布甸 $48 北海道牛奶香極濃得黎，彈性極之動L，放上匙上好似成龍既頭髮一樣，郁黎郁去，係點都唔會郁既，作為最後一道甜品真係極為滿足！ 題外話/補充資料 整體實在太滿意,fusion 菜加上日本料理，實在擦出不少火花
感謝 kelvinfoodki 提供以上資料 kelvinfoodki 的網誌: http://www.openrice.com/zh/gourmet/reviews.htm?userid=58271625&city=hongkong
|
~END~
人均
$1500.00
| 商店 | 馥 |