|
性價比優質放題
|
|
chickenandpp
2016-01-20
634
0
|
分享
收藏
| 對上次食放題已經係幾個月前既事喇~ 難得搵到同道中人，又肯同我增肥XD 當然唔好有負人地～～呵呵～ 今次去左平日大家都冇去過既放題餐廳食， 其實大家最主要都係想搵多啲新鮮感～ 雖然食過佢新開業既涮涮鍋，覺得質素唔錯， 今次放題唔知會唔會有驚喜呢～ 因為有BOOK枱，而且約既時間又早，可以講話唔洗等坐！ 6點半入到黎，人數唔多～因為放假關係，緊係愈早食愈好～ 岩岩坐熱個位，就要睇下有咩好食囉～餐廳講到明任食兩小時， 緊係要把握好時間，另外加$50可以享受埋「升級體驗」， 如果計埋加一服務費，大約$250一位，計計埋埋都算抵 五行壽司，BOOK枱先會送既五行壽司，味道一級棒～款式夠特別， 同朋友一人一件，壽司雖然分唔勻，但仍然好想一食再食～ 大家如果想去八幡屋放題，建議先BOOK枱，又唔洗等位，又有壽司送XD 胡麻番茄沙律，先來個沙律前菜，胡麻醬加番茄簡直絕配， 兩種酸酸混合既味覺，食完夠晒開胃，但如果番茄多啲就更好～ 刺身方面，當然要嗌我最愛既三文魚同鮑片，另外仲有馬刀貝、虎蝦等等 刺身大致新鮮，但唔夠凍，食落鮮甜爽口，味道唔錯！但因為朋友唔多好刺身， 只會幫我食少少咁大把，所以都唔咁嗌咁多～刺身食左一輪就冇再嗌LU~ 再黎就係升級體驗～有珍寶帶子、赤蝦、生蠔等等， 因為份量唔多，所以上既時候都放係同一個凍盆到， 珍寶帶子，鮮嫩有口感，食落甜甜地，肉質讚好！ 赤蝦，鮮甜得黎唔覺腥，肉質夠爽韌，而且都幾大隻～ 生蠔，肉質肥厚，有輕微既海水味，但都可接受～ 和牛壽司，半生熟既和牛壽司，口感較煙韌，同時食到果陣和牛香 胡麻豆腐，愛食胡麻既我當然讚好，豆腐夠滑，配胡麻醬亦好夾，但唯獨份量太細 燒物有鹽燒雞翼、帆立貝等等，咸味溫度適中，食落都唔錯，可以一試 串燒，燒得較偏乾身，而且菇類有陣苦味，蝦則可以接受 炸物，大部份都達到水準，雞翼特別出色，雖炸但唔會太油膩， 但容易飽肚，可以一試～ 天婦羅，味道雖唔錯但唯獨等得太耐，要吹單先出到比我地， 炸得偏軟淋，但仍然覺得唔錯～ 水晶玄餅，推薦一食！睇落去晶瑩剔透，中間仲有花瓣係入面， 口感似啫喱，味道則淡淡的花香，好少放題餐廳有咁特別既甜品～ 大部份都幾好食，泡芙由其讚好，有朱古力同雲尼拿味～ 焦糖菠蘿又脆又多汁，口腔充滿菠蘿香～ 另外仲有個係富士蘋果一口大福，食完再食既甜品～！ 外皮煙靭，內裡充滿蘋果香氣，有一食再食既衝動～～ 整體黎講，八幡屋放題係性價比之上，食物用料新鮮，味道大部份都達到水準， 服務方面，店員收碟速度快，跟單情況良好，但唯獨天婦羅需要吹一吹單先出到， 大致上食物勝於服務同環境，係可以一試亦都抵食既放題～
感謝 chickenandpp 提供以上資料 chickenandpp的網誌: http://www.openrice.com/zh/gourmet/reviews.htm?userid=51033932&city=hongkong
|
~END~
人均
$250.00
| 商店 | 八幡屋日本料理 |