一離開青山道，入到內街就好靜，不過，估唔到入到店內卻有唔少客喎，其實，Choo Choo屬小店經營，全場都喺得25個位，都幾易爆，所以，有心嚟嘅話，最好訂定位就穩陣啲。

“Choo Choo”就喺蒸汽火車起動時所發出嘅嗚嗚聲，所以，你就會發覺全店就喺以蒸汽火車為主題，兩旁嘅電視屏幕營造出窗外嘅風景（事後先知喺店主旅行時所拍），而「車窗」更架設幕簾、行李架，甚至大件、細件行李在其上，絕對一絲不苟扮得似模似樣，加點幻想讓人猶如置身火車中用餐。

就連上到二樓嘅洗手間都有掛起啲旅行地圖，洗手盆之上都加插一張黑白嘅世界地圖。

是晚仍然天寒地凍，但一坐低店員就送上兩杯熱水，實在窩心。枱上「布拉格」小蠟燭杯，精緻美麗，柔柔燭光更添幾火暖意。

餐牌共有兩頁，好似無咗晚餐供應，因為嚟之前睇過其他人嘅食評做參考。此外，餐牌以食材嚟分類from the Land、from the Sea，Crab up……等等主菜菜式，唔會好似一般餐廳咁有餐湯、沙律、頭盤……等等，所以食物種類唔算多，亦都有少少焗限。

香辣蘿勒葉醬炒魷魚圈意大利麵 $108

個意粉都幾辣吓，所以，餐牌上俾多隻辣椒公仔都不為過，但的而且確辣得刺激惹味，又有唔少蘿勒香。魷魚圈柔韌有咬口，最有趣喺意粉用上一般意粉及墨魚汁意粉，而意粉煮出嚟個韌度啱啱好，好有咬口，不過，個人而言，略嫌有少少油，雖然都只不過喺橄欖油而已，但落少一點會令個感覺更好。

牛肩胛配露筍黑松露波特菇 $198

好鍾意佢隻「碟」，樹木形連埋啲年輪，好有原始味道，所以，賣相亦唔花巧，催向基本。牛肩胛扒幾大件，面面刨上香草牛油，慢慢咁溶化，充滿香汽；而牛肩胛燒得恰到好處，色澤粉嫩，食落果然富牛肉香，唯未有想像中咁軟腍，不過，亦算好食。

反而更愛配菜嘅露筍仔及波特大菇，前者爽口無渣，後者菌香味濃，再者，肉汁與牛油滲進其中，味道更香。

店中有3款甜品供應：Scenery In Glass、L.J.K.、Gold Rush，單睇名字及其成份組合，雖然定價實在唔平，但都非一般大路嘅芝士餅、慕絲蛋糕，每款都感受廚師嘅心思及創作。我哋揀咗個平平嘅Scenery In Glass一試，睇睇質素如何！

Scenery In Glass $78

當廚師捧出以雞尾酒杯盛載嘅Scenery In Glass出嚟向我哋解釋當中成份時，原來，其中嘅威士忌泡沫喺後加，故小弟未影得徹之前嘅模樣。眼前嘅甜品，就喺唧上威士忌泡沫及加上紅桑莓乾嘅成品，內裡仲包括由下而上嘅大豆意式奶凍、熱情果漿及芝麻脆餅（餐牌原先喺用上花生金寶）。一羹過插到底試晒幾樣食材唔容易，但其實，每個部份都做得唔錯，奶凍夠挺有豆香，熱情果漿酸香鮮活，脆餅脆香滿滿芝麻味，威士忌泡沫輕盈帶酒香。

Mango Banana $48

以芒果及香蕉打造嘅果汁，由於無溝水，所以，表姨甥女話飲落幾似奶昔，不過，由於無加過其他嘢，所以，果香味重，尤以芒果味較為突出，飲落亦會滲出香蕉味。

Latte $42

佢哋嘅鮮奶咖啡沖調得唔錯，甚有水準，無需要加糖，入口平衡順滑，濃縮咖啡跟奶泡都唔會各自為政；拉花拉得細膩標緻，就喺額外獎勵。

後話：依家仲有無蒸汽火車？喺有架，小弟有幸早年去澳洲旅行，就晌墨爾本市郊坐過一次「普芬比利蒸汽火車」Puffing Billy（www.puffingbilly.com.au）遊一小段丹頓農山脈，喺一段非常有趣嘅體驗。晌片段中小弟都有出鏡架，不過，距離有啲遠，相信應該搵我唔到。

Choo Choo做嘅菜式，幾有新意，而且，環境幾有特色，不過，以長沙灣依等舊區而言，會俾人覺得定價有點偏高，但只以做到質素，相信仍然好有競爭力。

個人評分
味道：7/10
環境：8/10
服務：8/10
抵食：6/10
平均每人消費：HK$260

餐廳資料：
CHOO CHOO
長沙灣順寧道364-368號昌暉大廈地下1號舖
3707 1034