上星期尾，香港嘅濕度跌到得廿零個巴仙，啲皮膚乾到呢……不過講到個「燥」字，就諗起「火辣辣」喇，早幾日經過美心西餅，見到新出嘅情人節蛋糕系列「#Cakefor2」，當中紅噹噹、火辣辣嘅辣味朱古力慕絲蛋糕非常搶眼，亦喺最感興趣嘅一個，一於換依個試試。
今次嘅情人節蛋糕系列共有3款：#Pure（士多啤梨忌廉蛋糕）、#Naughty（綠茶慕絲蛋糕）及#Wild（辣味朱古力慕絲蛋糕），原來代表住三種唔同嘅戀愛滋味：夢幻單純嘅戀愛、鬥氣冤家嘅戀愛或激情如火嘅戀愛，既有心思，又有寓意。細細個好啱情侶二人分享，每個定價$98。
![bowl]() 辣味朱古力慕絲蛋糕
成個蛋糕一身噴上紅色朱古力粉絨面，火辣嬌紅，周旁貼上紅色朱古力脆片，賣相已成功搶點。
由下而上，一層又一層，包括朱古力海綿蛋糕、朱古力軟心夾層及辣味朱古力慕絲。其實，以美心一貫嘅水平，個蛋糕嘅製作唔算複雜，不過，勝在用料不賴，因為幾個部份都用上朱古力，尤其朱古力軟心夾層，故此，啖啖都食到濃郁嘅朱古力香味。而海綿蛋糕部份好鬆軟，慕絲部份則好幼滑，至於個辣味唔會好強，要食多幾啖先會慢慢滲出嚟，非常有趣。正好比喻為甜蜜嘅濃情中，間唔時都有啲辣刺刺嘅衝激。
情人節又就快到，唔知邊一款可以代表着你同佢嘅戀愛滋味？其實邊一款都好，都喺一種愛意嘅表達。而今次所品嚐嘅辣味朱古力慕絲蛋糕，佢嘅味道本身都已經幾特別，就算唔喺當情人節蛋糕與愛侶共嚐，同家人、朋友分享一樣適合。
個人評分
味道：9/10
環境：7/10
服務：7/10
抵食：8/10
平均每人消費：HK$25
餐廳資料：
美心西餅 Maxim's Cake Shop
美孚港鐵美孚站KEF 3號舖
2745 4739
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
