去澳門通常大家可能都係飲飲食食~ 本住最鍾意踩住單車於城市穿梭既精神，前個兩星期我地就同幾位朋友來到澳門踩左次迷你既「環澳門之旅」。我地先由澳門碼頭開始踩，逆時針先向北區出發，經過一些舊唐樓區（老實講，個人覺得最有feel 就係呢區），同我地平時見到既五光十色既娛樂天空完全唔同。之後一路踩落市中心紅市場個邊去飲茶。然後我地再經海旁既大馬路一路經過李錦記醬油廠，再到媽祖廟同西灣湖畔。我地發覺左一樣非常重要既野，就係澳門既司機非常禮讓。其實之前都有朋友講過，但唔親身試過真係唔信。

我地一開始就由碼頭經過水塘邊踩到來來到北區（水塘內的行人路不可踩單車）。個人覺得北區最正最有feel~ 我地最鍾意踩單車穿梭呢d 最有本地特色既環境。呢度有一d 好矮好舊既唐樓，亦有呢d好高2﹣30層既窗花由鐵網組成既大廈。踩單車經過個陣覺得幾特別的。想要見到澳門local 一面既記得要黎兜兜~

之後另一條好正既路段就 雅廉訪大馬路 、美副將大馬路 同 高士德大馬路 呢3條平衡既馬路。大家唔好比佢地個名嚇親，個名叫大馬路，其實就arm arm 好適合我地踩。如果好天氣既話有d樹蔭曬落黎好有feel~ 呢度既感覺係唔會好繁忙令你好有壓力，有d 悠閒外國街道既感覺~

我地之後去左一間茶樓飲茶。個日我地2:05pm 踩到去，去到先見到原來佢地既營業時間到 2pm。原本諗住走人，但老闆見我地幾個小朋友特登踩單車過黎，就招呼埋我地。之後最估佢唔到既係，老闆竟然叫我地7部單車擺上去餐廳入面。因為老闆話其實佢地成日都會有客人踩單車過你飲茶，有次試過有客人泊部單車花係下面轉個頭就唔見左，所以佢見我地又係特登踩單車過黎就叫我地放上黎。如果係香港應該不太可能gua…

最無敵係有個露臺

吃完玩完一輪之後老闆同我地講解下鋪頭既好多歷史，我地都聽得津津有味，因為呢度真係好似一間老闆既私人收藏博物館。

離開之後我地就一直沿著 沙梨頭海邊街 踩，一條直路踩到尾。首先就會見到李錦記蠔油庒。呢條路段就會比較多車，無踩馬路經驗既朋友不建議踩呢短。如果有踩開馬路既朋友，呢短同樣係幾有特色既路，會見到就是既例如五金鋪頭等，充滿歲月的痕跡。踩了段既時候記得同司機互相禮讓，我地就係踩呢段完全無被司機 beep 過，仲好讓我地，多謝晒各位司機大佬~

再一直往前踩來到河邊新街，然後就會來到媽閣廟附近的海事博物館，是一幢漂亮的墨綠色建築。呢個位影相同休息一流~

而媽閣廟就在20步之遙，這裡有塊小空地，晴天的下午大家可以坐在這裡盛涼。不過要留意星期六日黎既話可能會比較多遊客，所以要留意咯~ 不過如果時間黎的arm 既話，其實影相會好正~

另一個一定要同大家介紹既路段就係西灣湖旁的民國大馬路。呢度既環境非常寧靜，而且人車都少，所以氣氛超舒服超正。第一次來既時候我都係聽澳門朋友話呢度好踩，無諗過真係唔錯~ 感覺類似我地既九龍塘、淺水灣咁。好似我影相個日有陽光仲正~

有睇過「激戰」既朋友有印象吧，賤輝就係係度練跑

第一次去我仲帶左部天涯機 Canon G3x 去，有成 25倍對焦，俾我影到塔上既人 xp

踩完馬路個邊，之後我地就兜個圈返返入市區~ 下個點就係最刺激既﹣過橋！如果帶著單車既朋友想由澳門到氹仔既朋友，只有嘉樂庇大橋過可以過。不過過橋係好友秩序既：行人須與車的方向相反；行人必須排排隊過；而且天橋不可以踩單車，如果犯規即罰 1500 MOP。如果天氣好既話經過橋頂既時候睇日落應該會好靚。我地個人都有兩位外國遊客步行過橋。全程大概40分鐘~ 都算係非常特別既體驗。我地行到橋頂而咁arm 有巴士經過既時候仲感受到明顯搖動 xp !!

順利過完橋之後就黎到氹仔，黎到呢邊路好簡單，睇 google map 好易就搵到路，我地由橋踩左15分鐘左右就到左官也街呢頭，可惜今日一開始因為有雨，所以令到我地係碼頭等左成一個鐘，時間有d 燜。如果如果之後有機會既話好像踩埋落去路環試下個400轉手打咖啡，睇下下次會唔會有機會同大家一齊踩去啦~

咁其實路環有咩特別既呢~ 個人認為呢度係澳門四個區中其中一個最有 feel 的之一。位置其實係澳門既最南邊既海岸。呢度有出名既安德烈葡撻，而且有下面個座好靚既路環聖方濟各聖堂。如果你由安德烈葡撻走過去，仲會經過一d 小巷到好靚好有feel。如果鍾意影相既朋友就唔好錯過~ 呢度仲有租單車既鋪頭添！以下有d相吊下大家癮 xxxxxp

澳門自攜單車溫馨小提示：

香港係可以帶單車搭船過澳門的。每部單車每程 ＄65。如果大家係一 group 朋友去既話要先聯絡船公司，否則佢地有可能拒絕你地上船。

單車有可能會被放在船的甲板上，佢地會綁好，但絕對有可能日曬雨淋，好似上次我地去既時候就淋浴淋左成個鐘，錫車既朋友請留意~

澳門既司機一般比較禮讓，如果大家踩馬路的時候，記得亦同樣和司機互相尊重，不要沖燈。單車不要亂放。法例規定不可以再行人路上踩，同樣也不可逆線。

如果大家想過嘉樂庇大橋（由澳門到氹仔或相反）既話，記得，行人的方向和車子必須相反。行人道係單邊移動。我地上次係因為臨時有工程所以改變了方向。如果大家之後去的話記得留意。另外橋上不可踩單車，否則罰款1500 mop。

如果大家無單車既話，可以係澳門借，氹仔個邊一d遊客景點附近會有單車租借店，但澳門個邊就好似無~ （我地問過一d澳門本地既朋友都無頭緒）。

============================================

感謝BikeTheMoment 提供以上資料

BikeTheMoment的網誌: http://bikethemoment.com/

============================================