|
銅鑼灣。悠蔬食(Leisurely Veggie)
|
|
Yanomi
2016-02-24
824
0
|
分享
收藏
1月27日(星期三)~媽咪聽日生日..上星期約定佢 同佢食素餐慶祝~因為爸爸好抗拒聽到"食素"兩個字 費事一陣多野講..所以無諗住預佢~記得有年"大年初一" 一心諗住返娘家拜年+食埋晚飯先走~又可以相聚足全日 媽咪+我同老闆大年初一都食素ma~叫爸爸煮2個齋就ok 點知由入屋開始..就話食素乜乜乜~仲話我迫老闆食素 其實老闆唔like做既野..一定迫唔到囉~佢自願主動話食架 所以果次之後..以後大年初一都唔返去~費事多野聽(煩) 同埋..媽咪生日想食素餐~決定同佢去"悠蔬食"試下 * * * * * * * * * * 老闆想去..不過我話唔預爸爸~所以都唔會預佢 等兩母女可以靜靜地吹下水(哈哈)~點左兩個套餐 三款前菜(香摏伴雙翠, 紅菜頭蘋果合桃沙律 & 涼拌百頁黑木耳配藜麥) "香摏伴雙翠"..雙翠有毛豆 & 萵筍(=油麥菜頭) 觀感好green~食材脆口..醬料帶點點清淡鹹度~惹味 "紅菜頭蘋果合桃沙律"..超like依個組合 色彩艷麗又有營養~紅菜頭本身味道淡淡 配搭蘋果香甜味道..合桃又脆香~整體非常夾 遲d我會係屋企整依個沙律~真係方便易整又好味 "涼拌百頁黑木耳配藜麥" 除左幽閉恐懼症~原來我都有密集恐懼症(衰) 一上檯見到好多粒粒..即刻唔舒服~媽咪反應好快 話等佢食晒先~真係完全感受到媽咪既愛囉 老闆都知我驚~平時佢會用手機開定d相(密集粒孔類/昆蟲) 扮無野呃我去睇~見到我極度驚恐..就開心到呢(勁變態) 依個醬汁主要用醋..酸酸地好開胃~食材爽口又有咬口感 餐湯有兩款選擇~"黑松露淮山杞子濃湯 & 茶樹菇黃耳燉湯" 我地同樣揀"黑松露淮山杞子濃湯"~個湯質感唔係幼滑 食到新鮮食材打茸~味道清淡帶好香菇味~有杞子又甜甜地 手卷又係有兩款選擇..兩款點晒試試 "露筍素香鬆苜蓿芽手卷" & "香芒牛油果苜蓿芽手卷" 兩款手卷都好味~苜蓿芽好多..爽脆清新 紫菜片非常新鮮脆口~紫菜卷蔬菜..唔滯又好味 主菜共有六款選擇 "紅咖哩野菜猴菇丸配印度薄餅及珍珠糙米飯"($238) 餸料好豐富..蔬菜熟度剛好~口感好脆身 猴菇丸好似真肉丸味道~口感又有咬口..味道唔錯 但咖哩醬汁底..唔夠咖哩香味~椰奶味偏重+偏甜 印度薄餅..放耐左都依然keep到脆口 珍珠米mix糙米~面頭仲有少少芝麻點綴 "風乾番茄野菜燴意大利飯伴香草焗雜果仁"($228) 雜果仁好豐富~茄味超濃香..酸酸地好開胃 飯粒黏黏帶咬口~加上雜果仁令整個飯多份香脆感 飲品可以(+$)另配~媽咪話唔飲..咁我都唔飲lu 套餐"甜品"有兩款選擇..班蘭椰汁糕(2件)/檸香乳酪蛋糕(1件) 我再order個"蘋果酥"~套餐外..任選甜品(正價 -$10)($38) 訂檯時..特別叫餐廳係甜品碟寫字(寫字費:$30) 媽咪好驚喜~開心到呢! 碟邊係熱情果醬 & 玫瑰花碎作裝飾 乳酪蛋糕非常軟滑好味~檸檬味好fresh..加上乳酪帶酸(正) 班蘭香味好突出~整體甜品甜度唔太甜..非常岩口味 蘋果酥同一般食既一樣~酥皮乾身好脆口 餡料都幾多~蘋果&葡萄都香甜~肉桂味唔突出 整體餐廳以藍白色+歐陸設計為主~環境非常舒服 訂檯時仲特別訂卡檯座~而整體食物用心製造 賣相款式好吸引..味道好好~服務有禮貌(總消費:$587) 好驚喜! 老闆娘仲親自送份小禮物比媽咪..祝賀一番
感謝 Yanomi 提供以上資料 Yanomi的網誌: http://www.yanomichung.blogspot.hk//
|
~END~
| 商店 | 悠蔬食 Leisurely Veggie |